Read Iban Adat Lewi 9 Bible Online

Adat Lewi 9 - Iban bible

Adat Lewi 9

¹Sehari udah tembu pengawa nyirika imam, Moses mesanka Aron enggau bala anak lelaki iya, enggau bala tuai orang Israel.

²Ku iya bejaku enggau Aron, “Bai siku sapi ti lelaki, enggau siku bedus ti lelaki, ti nadai penimpang, lalu beri sida ngagai TUHAN. Sapi ti lelaki nya nyadika piring pengampun dosa, lalu bedus ti lelaki nya nyadika piring tunu.

³Udah nya, asuh orang Israel mai siku kambin ti lelaki nyadika piring pengampun dosa, siku anak sapi ti umur setaun, enggau siku anak domba ti umur setaun, ti nadai penimpang, nyadika piring tunu,

⁴enggau siku sapi ti lelaki enggau siku bedus ti lelaki nyadika piring pemaik. Sida enda tau enda nyerahka piring nya ngagai TUHAN, sama enggau piring gandum ti dichampur enggau minyak. Sida enda tau enda ngereja utai tu, laban TUHAN deka pegari di mua sida sehari tu.”

⁵Sida lalu mai ngagai penama Langkau Kain TUHAN semua utai ti diasuh Moses, lalu semua orang Israel begempuru dia nyembah TUHAN.

⁶Ku Moses bejaku, “TUHAN udah ngasuh kita ngereja semua utai tu, ngambika mulia Iya pegari di mua kita.”

⁷ Udah nya, Moses bejaku enggau Aron, “Alai nuan mansang ngagai alta, lalu beri piring pengampun dosa, enggau piring tunu kena muai dosa nuan, enggau dosa orang mayuh. Beri piring nya kena muai dosa orang mayuh, nitihka pesan TUHAN.”

⁸Aron lalu mansang ngagai alta, lalu nyayat sapi ti lelaki ti agi biak nya, ti diungkup nyadika piring pengampun dosa iya empu.

⁹Bala anak lelaki iya lalu mai darah jelu nya ngagai iya. Iya lalu nyepuhka tunjuk iya ngagai darah nya, malitka darah nya ngagai tanduk sukut alta, lalu nuang teda darah nya ba kaki alta nya.

¹⁰Udah nya, iya lalu nunu lemak, semua tungkul sengayuh, enggau isi atau ti pemadu manah retung ba alta nya, nitihka pesan TUHAN ngagai Moses.

¹¹Tang iya nunu isi, enggau kulit jelu nya, di luar kem.

¹²Iya nyayat jelu ti digaga nyadika piring tunu ke iya empu. Bala anak lelaki iya mai darah jelu nya ngagai iya, lalu iya ngunsaika semua darah nya ngagai semua empat iti tisi alta.

¹³Sida nyuaka ngagai iya pala enggau perengka bukai ari jelu nya, lalu iya nunu utai nya retung ba alta nya.

¹⁴Udah nya, iya masu semua perengka dalam, enggau kaki belakang, lalu nunu utai nya retung ba alta, ba atas semua piring tunu nya.

¹⁵Udah nya, iya nyerahka semua piring ti diberi orang mayuh. Iya ngambi siku kambin ti diungkup kena muai dosa orang mayuh, nyayat jelu nya, lalu nyerahka jelu nya, baka ke udah dikereja iya ngagai piring ti dikena muai dosa iya empu.

¹⁶Iya mega mai jelu kena ngaga piring tunu, nitihka adat.

¹⁷Iya nyerahka piring gandum, lalu ngambi segenggam tepung, lalu nunu tepung nya retung ba alta. (Tu nambahka piring tunu ti endang diberi tiap hari.)

¹⁸ Iya nyayat sapi ti lelaki enggau bedus ti lelaki nyadika piring pemaik ke orang mayuh. Bala anak lelaki iya mai darah jelu nya ngagai iya, lalu iya ngunsaika darah nya ngagai semua empat iti tisi alta nya.

¹⁹Aron ngengkahka lemak sapi ti lelaki enggau ari bedus ti lelaki nya

²⁰ba atas isi dada jelu nya, lalu mai utai nya ngagai alta. Iya lalu nunu lemak jelu nya retung ba alta

²¹lalu nyerahka isi dada, enggau kaki kanan belakang nyadika piring ngagai TUHAN, ngarika bala imam, nitihka pesan Moses.

²² Lebuh Aron udah tembu ngaga semua piring nya, iya lalu ngangkatka jari iya atas orang mayuh, lalu merekatka sida, lalu udah nya nurun ari endur nya.

²³Moses seduai Aron lalu tama ngagai Langkau Kain TUHAN, lalu lebuh seduai iya pansut ari endur nya, seduai iya merekatka orang mayuh, lalu mulia TUHAN pegari di mua orang mayuh.

²⁴Tekala nya TUHAN lalu ngasuh api datai, lalu api nya nganguska semua piring tunu, enggau semua lemak ti ba alta. Lebuh orang mayuh meda nya, semua sida nyerauh magang, lalu nyungkurka diri ke tanah nyembah TUHAN.