Read Iban Jeremiah 10 Bible Online

Jeremiah 10 - Iban bible

Jeremiah 10

¹Orang Israel, pendingka pesan ti diberi TUHAN ngagai kita.

²Ku TUHAN bejaku, “Anang nitihka ulah orang bansa bukai. Anang irau ati ke tanda ti nyelai ti dipeda kita di langit, taja pen bansa bukai balat takut,

³laban agama orang bansa bukai nya agama ti nadai reti. Kayu ditebang dalam utan. Kayu nya dipansap orang ke landik begagaka utai,

⁴lalu diias ngena pirak enggau emas. Sida mantangka iya ngena paku lawang ngambika iya enda rebah.

⁵Engkeramba nya baka engkeramba ti dikena muru burung ba kebun semangka. Sida enda nemu bejaku. Sida enda tau enda disan laban sida enda nemu bejalai. Anang takutka sida, laban sida enda ulih ngemediska kita lalu sida pen enda mega ulih nulung kita.”

⁶TUHAN, nadai orang ke sebaka enggau Nuan. Nuan kering, lalu nama Nuan besai sereta bekuasa.

⁷ Sapa enggai ngemesaika Nuan ti Raja ke semua bansa? Laban Nuan endang patut dikemesaika. Nadai orang ke baka Nuan ari bala orang ke bepenemu-dalam ari semua bansa, tauka ari bala raja sida.

⁸Sida nya beli sereta lap magang. Nama utai ti ulih dipelajarka sida ari engkeramba ti digaga ari kayu?[11]

⁹Engkeramba sida disampak enggau pirak ari menua Spain enggau ngena emas ari Upas, semua digaga jari orang ke landik. Sida diberi gari ti digaga ari kain ti mirah puda enggau kain ungu ti ditenun orang ke landik betenun.

¹⁰Tang Nuan, TUHAN, endang Allah Taala ti bendar, Nuan endang Allah Taala ti idup Raja ti meruan belama iya. Lebuh Nuan ringat, dunya begetar. Semua bansa enda ulih natka pengeringat Nuan. (

¹¹Kita enda tau enda madahka ngagai sida, petara ti enda ngaga langit enggau dunya deka dirusak. Sida deka dibuai ari semua endur di dunya tu.)

¹²TUHAN ngaga dunya ngena kuasa Iya Empu. Ulih penemu-dalam Iya, Iya ngaga dunya sereta mintarka langit.

¹³Lebuh Iya bejaku, ai ti ari atas langit[12] lalu beguru. Iya mai mua hari ari tisi dunya. Iya ngasuh kilat nyelar lebuh hari ujan lalu ngirumka ribut ari bilik setor Iya.

¹⁴Lebuh orang meda utai nya, sida berasai beli sereta nadai nemu utai. Sida ke begagaka engkeramba, deka asa ngapa, laban petara ti digaga sida nya petara ti pelesu sereta enda nemu enseput.

¹⁵Petara nya nadai guna, lalu patut dipechat. Sida deka dirusak lebuh TUHAN datai lalu nyamah sida.

¹⁶Allah Taala Jakop enda baka bala petara nya, laban Iya nempa semua utai, lalu Iya udah milih Israel nyadika nembiak Iya. Nama Iya TUHAN ti Pemadu Bekuasa.

¹⁷Orang Jerusalem, kita dikelulung munsuh! Gumpul utai kita.

¹⁸TUHAN deka muai kita ari menua tu. Iya deka ngeredakka kita, datai ke nadai siku kita agi tinggal. TUHAN udah bejaku.

¹⁹Ku orang Jerusalem nyabak, “Naka meh pemalat kami telih! Abi telih kami nyau enda ulih suman. Kami udah ngumbai diri ulih natka utai tu!

²⁰Langkau kain kami nyau rusak. Tali bantil langkau kain kami udah putus. Bala anak kami udah bejalai ngagai endur bukai. Nadai agi orang tinggal nirika langkau kain ke kami baru, nadai agi orang ngantung kain tirai sida.”

²¹Ku aku nyaut, “Bala tuai kitai endang beli. Sida nadai minta iring ari TUHAN. Nya meh kebuah sida puntan, lalu bansa kitai pambar pendiau.

²²Dinga! Berita bisi udah diterima! Utai bemunyi inggar amat di menua ti di utara. Bala soldadu iya deka ngasuh mayuh nengeri di menua Judah nyadi menua puang ti alai pasun diau.”

²³TUHAN, aku nemu, nadai siku kami bisi kuasa ngatur pengidup diri. Nadai siku kami bisi kuasa atas seput diri empu.

²⁴Ajar nembiak Nuan, TUHAN, tang anang kelalu kasar enggau kami tauka ngukum kami lebuh Nuan ringat, enggai ke kami mati.

²⁵Kuingka pengeringat Nuan ngagai semua bansa ti enda nyembah Nuan enggau ngagai orang ke nulak Nuan, laban sida udah munuh bala nembiak Nuan. Sida udah ngerusak kami abis lengis lalu ngaga menua kami nyadi tembawai.