Read Iban Jeremiah 11 Bible Online

Jeremiah 11 - Iban bible

Jeremiah 11

¹Ku TUHAN bejaku ngagai aku,

²“Pendingka jaku ti disebut dalam sempekat tu. Padahka ngagai orang Judah enggau ngagai orang di Jerusalem,

³Aku ti TUHAN Allah Taala ke disembah orang Israel udah nyumpah semua orang ke enda ngasika jaku ti disebut dalam sempekat tu.

⁴Tu meh sempekat ti udah digaga Aku enggau bala aki ini sida lebuh Aku mai sida pansut ari menua Ejip, menua ti baka serumbung api ke sida. Aku udah ngasuh sida ngasika Aku, lalu ngereja semua utai ti udah diasuh Aku. Aku udah madahka ngagai sida, enti sida ngasi, sida deka nyadi nembiak Aku, lalu Aku deka nyadi Allah Taala sida.

⁵Nya baru Aku deka ngamatka semaya ti udah digaga Aku enggau bala aki ini sida, semaya Aku ti deka meri sida menua ti kaya sereta ami, ti dikembuan sida diatu.” Ku aku, “Au, TUHAN.”

⁶Udah nya TUHAN bejaku ngagai aku, “Alai nuan mupuk ngagai semua nengeri di menua Judah, enggau ngagai semua jalai raya di Jerusalem. Padahka pesan Aku dia, lalu asuh orang mayuh mending sereta ngasika jaku ti disebut dalam sempekat nya.

⁷Lebuh Aku mai bala aki ini sida pansut ari menua Ejip, Aku nangkan sida enggau jaku ngena sumpah ngasuh sida ngasika Aku, lalu Aku majak meri jaku tangkan nya ngagai orang mayuh nyentuk ngagai sehari tu.

⁸Tang sida enda mending tauka ngasi. Semua sida majak kieh sereta jai baka selama. Aku udah ngasuh sida nitihka sempekat nya, tang sida enggai. Nya alai Aku ngasuh sida ditinggang semua ukum ti disebut dalam sempekat nya.”

⁹Udah nya TUHAN lalu bejaku ngagai aku, “Orang Judah enggau orang Jerusalem benung bepekat ngelaban Aku.

¹⁰Sida udah pulai baru ngagai dosa aki ini sida ke enggai ngereja utai nitihka jaku Aku. Sida udah nyembah petara bukai. Israel enggau Judah udah sama ngelanggar sempekat ti udah digaga Aku enggau aki ini sida.

¹¹Nya alai diatu Aku ti TUHAN, meri sida jaku tangkan tu: Aku deka ngasuh pengerusak ninggang sida, lalu sida enda ulih ngerarika diri. Lalu lebuh sida ngangauka Aku minta Aku nulung sida, Aku enggai mendingka sida.

¹²Udah nya orang Judah enggau orang di Jerusalem deka mansang ngagai bala petara ti diberi sida piring, lalu ngangau minta bala petara nya nulung sida. Tang bala petara nya enda ulih nyelamatka sida lebuh pengerusak nya datai.

¹³Petara orang Judah nyau ngemayuh nengeri sida empu, lalu pemayuh alta ti udah didirika orang ke diau di Jerusalem alai sida ngenjuk piring ngagai petara Baal ti jai nya, nyau ngemayuh jalai raya di nengeri nya empu.

¹⁴Jeremiah, anang besampi ngagai Aku tauka minta kasih ari Aku ngarika bala orang nya, laban lebuh sida ditinggang penusah, lalu ngangau minta Aku nulung sida, Aku enggai mendingka sida.”

¹⁵Ku TUHAN bejaku, “Orang ke dikerinduka Aku majak ngereja utai ti jai. Baka ni ku sida tau bisi hak tama ngagai Rumah Aku? Kati sida ngumbai semaya enggau jelu ti dienjuk sida nyadika piring ulih nagang penusah ti besai ninggang sida? Lalu udah nya sida rami gaga?

¹⁶Dulu suba Aku ngumbai sida nya kayu kana ti lebat daun, penuh laban buah ti manah, tang diatu, ngena nyawa ti meletup munyi guntur, Aku deka nyelup daun kayu kana nya ngena api, lalu matahka dan iya.

¹⁷“Aku, TUHAN ti Pemadu Bekuasa, udah nanam Israel enggau Judah, tang diatu Aku deka ngasuh seduai iya ditinggang penusah ti besai, ketegal penyai ti udah dikereja seduai iya, lalu nyungkak Aku ringat lebuh seduai iya ngenjuk piring ngagai Baal.”

¹⁸TUHAN madahka ngagai aku pasal bala munsuh aku ke bepekat ngelaban aku.

¹⁹Aku nyau baka anak domba ti jinak ti dibai pansut lalu disayat, lalu aku enda nemu sida ngaga pelan ti jai kena sida ngelaban aku. Ku sida, “Aram kitai nebang kayu nya kala lebuh iya agi galak.[13] Aram kitai munuh iya, ngambika orang nadai agi ingatka iya.”

²⁰ Aku lalu besampi, “TUHAN ti Pemadu Bekuasa, Nuan endang Hakim ti lurus. Nuan ngabas runding enggau ati mensia. Aku udah ngengkahka pekara aku ba jari Nuan. Nya alai, awakka aku meda Nuan malas penyai bala orang tu.”

²¹Orang di Anatot deka munuh aku, lalu sida madahka ngagai aku, sida deka munuh aku enti aku majak madahka pesan TUHAN.

²²Udah nya TUHAN ti Pemadu Bekuasa bejaku, “Aku deka ngukum sida! Sida ke agi bujang deka mati beperang. Bala anak sida deka mati keberuran.

²³Aku udah ngeletak maya alai Aku deka ngasuh penusah ti besai ninggang orang di Anatot, lalu lebuh maya nya ila, nadai siku sida agi idup.”