Read Iban Jeremiah 12 Bible Online

Jeremiah 12 - Iban bible

Jeremiah 12

¹“TUHAN, enti aku betalatka pekara aku enggau Nuan, Nuan tentu deka ditemu ngena. Tang taja pia, aku enda tau enda nanya ngagai Nuan pasal pengelurus: Nama kebuah orang ke jai kaya-raja? Nama kebuah orang ke enda betul ati, mujur?

²Nuan nanam sida, lalu sida beurat. Sida tumbuh lalu bebuah. Sida selalu bejaku muji Nuan, tang ati sida jauh ari Nuan.

³Tang Nuan, TUHAN, nemu aku. Nuan meda utai ti dikereja aku enggau pengerindu aku ke Nuan. Irit bala orang ke jai tu kebukai baka ke ngirit bedus ti deka disayat. Seraraka sida nyentuk ngagai maya sida disayat.

⁴Ni pengelama menua kami tu mengkang rangkai, lalu rumput ba semua padang layu magang? Jelu enggau burung mati laban penyai bansa kami ke nyebut, ‘Allah Taala enda meda utai ti dikereja kitai.’ ” [14]

⁵Ku TUHAN bejaku, “Jeremiah, enti nuan lelak belumba ngelaban mensia, baka ni ku nuan ulih belumba ngelaban kuda? Enti nuan enda ulih bediri ba menua ti nadai utai nekul, baka ni ku nuan ulih bediri dalam utan ti ngimbai Sungai Jordan?

⁶Indah kaban belayan nuan, kita sebilik, deh udah nipu nuan. Sida sama enggau orang ngelaban nuan. Anang ngarapka sida, taja pen sida bejaku manah enggau nuan.”

⁷Ku TUHAN bejaku, “Aku udah ninggalka Israel. Aku udah nulak bansa ti dipilih Aku. Aku udah nyerahka bansa ti dikerinduka Aku ngagai jari munsuh sida.

⁸Bansa ti dipilih Aku, udah mutar ngelaban Aku. Sida tu baka singa ti dalam utan merakka nyawa sida ngelaban Aku. Nya alai Aku begedika sida.

⁹Bala nembiak ke dipilih Aku sebaka enggau burung ti disambarka burung lang. Kangauka jelu babas ngambika sida datai ngagai pengerami makai besai!

¹⁰Mayuh raja menua bukai udah ngerusak kebun anggur Aku. Sida udah ngelunjak umai Aku. Sida udah ngaga menua Aku ti manah nyadi menua puang.

¹¹Sida udah ngaga iya nyadi menua ti kusi. Menua tu nadai orang nguan. Semua menua tu udah nyadi menua puang magang, lalu nadai orang ibuhka iya.

¹²Orang udah datai ngerumpak ba sebelah emperan ti ba atas bukit di menua puang tu. Aku udah ngasuh orang nyerang lalu ngerusak semua menua tu. Nadai orang ulih diau dalam pemaik.

¹³Bala nembiak Aku nanam gandum, tang sida ngetau rumput. Sida udah bebendar gawa, tang nadai bulih utai. Laban Aku balat ringat nya alai utai ti ditanam sida nadai mansutka asil.”

¹⁴Ku TUHAN bejaku, “Aku bisi utai ti deka disebut Aku pasal bansa bukai ti udah ngerusak menua ti udah diberi Aku ngagai nembiak Aku orang Israel. Aku deka muai orang ke jai nya ari menua sida, baka rumput ti dichabut, lalu Aku deka ngelepaska Judah ari sida.

¹⁵Tang lebuh Aku udah muai sida, Aku deka kasihka sida. Aku deka mai siti-siti bansa nya pulai baru ngagai tanah enggau ngagai menua sida empu.

¹⁶Enti sida deka nerima agama bala nembiak Aku enggau pengabis ati sida, lalu deka besumpah, ‘Dalam nama TUHAN’ - baka sida ke udah ngajar bala nembiak Aku besumpah dalam nama Baal - nya baru sida deka mega nyadi raban nembiak Aku lalu deka nyadi kaya-raja.

¹⁷Tang enti bansa nya enda ngasi, nya baru Aku deka nyabut lalu ngerusak iya abis lengis. Aku ti TUHAN, udah bejaku.”