Read Iban Jeremiah 13 Bible Online

Jeremiah 13 - Iban bible

Jeremiah 13

¹TUHAN ngasuh aku mupuk lalu meli tanchut pandak ti digaga ari linin, lalu ngerasukka tanchut nya. Tang TUHAN enda ngasuh aku masu tanchut nya.

²Aku meli lalu ngerasukka tanchut pandak nya.

³Udah nya TUHAN lalu bejaku baru ngagai aku, ku Iya,

⁴“Alai nuan mansang ngagai Sungai Eupratis, lalu lalaika tanchut pandak nya dalam lubang selikap batu.”

⁵Aku mupuk, lalu ngelalaika tanchut nya semak Sungai Eupratis.

⁶Nyau kelama udah bekau nya, TUHAN ngasuh aku mansang baru ngagai Sungai Eupratis ngambi tanchut pandak nya.

⁷Nya alai aku mansang baru ngagai Sungai Eupratis, lalu lebuh aku tetemuka endur alai aku ti udah ngelalaika tanchut pandak nya, aku meda iya udah rusak, lalu nadai tau diguna agi.

⁸Udah nya TUHAN bejaku baru ngagai aku. Ku Iya,

⁹“Tu meh chara Aku deka ngerusak penyumbung menua Judah, enggau penyumbung Jerusalem.

¹⁰Bala orang ke jai tu enggai ngasika Aku. Sida udah kieh sereta jai baka selama, lalu udah nyembah sereta betuaika petara bukai. Nya alai, sida deka nyadi baka tanchut pandak tu ti nadai tau diguna agi.

¹¹Baka tanchut pandak ti lekat erat ba punggung, baka nya meh Aku ngasuh semua orang Israel enggau orang Judah bepegai erat ba Aku, ngambika sida nyadi nembiak Aku, lalu meri puji enggau basa ngagai nama Aku. Tang sida enggai ngasika Aku.”

¹²Ku TUHAN Allah Taala bejaku ngagai aku, “Jeremiah, padahka ngagai orang Israel, genap igi benda wain patut diisi penuh enggau wain. Sida deka nyaut, madahka diri nemu semua benda wain endang patut diisi penuh enggau wain.

¹³Udah nya padahka ngagai sida, Aku ti TUHAN deka numi sida raja ke ari peturun David, sida imam, sida nabi, enggau semua orang ke diau di Jerusalem, enggau wain datai ke sida mabuk.

¹⁴Udah nya Aku deka mangkaka sida baka ke mangkaka benda ngagai pangan diri, sida ke tuai enggau ke biak. Aku deka munuh sida abis lengis enggau nadai penyinu, penyiru tauka pengasih.”

¹⁵Orang Israel, TUHAN udah bejaku! Diau enggau ati ti baruh, lalu pendingka Iya.

¹⁶Kemesaika TUHAN Allah Taala kita sebedau Iya mai pemetang lalu kita tesangkut ba sebelah bukit, sebedau Iya ngubah penampak ti diadang kita nyadi pemetang ti enda dipeda achuk mata.

¹⁷Enti kita enggai mending, aku deka nyabak belalai ketegal penyumbung kita. Aku deka balat nyabak lalu lilih ai mata laban bala nembiak TUHAN udah ditabanka nyadi orang tangkap ngagai menua bukai.

¹⁸Ku TUHAN bejaku ngagai aku, “Asuh raja enggau indai iya nurun ari kerusi diraja seduai iya, laban makota seduai iya ti manah gaya udah labuh ari pala seduai iya.[15]

¹⁹Nengeri ti di selatan menua Judah benung dikelulung munsuh. Nadai orang ulih tama ngagai nengeri nya. Semua orang di menua Judah udah ditabanka magang ngagai menua bukai.”

²⁰Jerusalem, peda nuan bala munsuh nuan benung nurun ari utara! Dini alai orang ke udah diasuh ibun nuan, bala nembiak ke balat dikemegahka nuan?

²¹Nama jaku nuan lebuh orang ke dikumbai nuan pangan, ngalahka nuan, lalu merintah nuan?[16] Kita deka pedis baka indu ke radai deka beranak.

²²Enti kita nanyaka kebuah semua utai tu nyadi ba kita - kebuah gari kita udah diruntun ari tubuh kita, lalu kita dipasung orang - utai nya nyadi laban kita balat bedosa.

²³Kati mensia ulih ngubah chura kulit diri? Kati engkuli ulih muai petik kulit diri? Enti sida ulih, kita ke nadai ngereja utai bukai tang semina ngereja penyai, pen ulih mega ngereja utai ti ngena.

²⁴TUHAN deka ngachirka kita baka rumput ti rangkai ti dikebuka ribut ti muput ari menua puang.

²⁵TUHAN udah bejaku madahka nya endang pengujung kita. Nya meh utai ti deka dikereja Iya ba kita, laban kita enda ingatka Iya, lalu udah arapka petara ti pelesu.

²⁶TUHAN Empu deka ngeruntun gari kita ari tubuh kita ngambika kita malu ke diri telanjai.

²⁷Iya udah meda kita ngereja utai ti dipegedika Iya. Iya udah meda kita nitihka petara orang kapir ba sebelah munggu enggau ba sebelah padang, baka lelaki ke inginka bini pangan diri, tauka baka kuda lelaki ti tetengukka kuda ti indu. Tulah meh kita orang Jerusalem! Ni maya kita deka belabuh diau tuchi?