Read Iban Jeremiah 14 Bible Online

Jeremiah 14 - Iban bible

Jeremiah 14

¹Ku TUHAN bejaku ngagai aku pasal kemarau panjai nya,

²“Menua Judah diatu benung ngulit. Semua nengeri di menua nya mati magang. Orang di nengeri nya gali ba tanah laban sida balat tusah ati, lalu Jerusalem nyabak minta tulung.

³Orang ke kaya ngasuh bala orang gaji sida ngambi ai. Bala orang gaji nya mansang ngagai telaga, tang nadai tetemuka ai. Sida pulai tang tepayan sida puang. Sida tusah ati sereta asa ngapa, lalu ngelalaika mua diri.

⁴Laban hari nadai ujan lalu tanah nyau rangkai, orang bumai tusah ati, lalu sida ngelalaika mua diri.

⁵Indu rusa di babas ninggalka anak diri ke baru ada laban nadai rumput.

⁶Raban keledai babas bediri ba tuchung bukit sengah-sengah nyintak seput baka pasun. Mata sida nyau kelabur laban sida nadai pemakai.

⁷Bala nembiak Aku ngangauka Aku, ‘Taja pen dosa kami besalah kami, tulung meh kami, TUHAN, munyi ti udah disemaya Nuan. Kami udah suah ninggalka Nuan. Kami udah bedosa ngelaban Nuan.

⁸Semina Nuan siku aja ke dikarapka orang Israel. Nuan siku aja ke ngelepaska kami ari penusah. Nama kebuah Nuan baka orang ke ngampar di menua kami, baka orang kampar ke bemalam semina semalam aja?

⁹Nama kebuah Nuan temati-kutu, baka soldadu ti nadai kuasa nulung? Nuan tentu bisi enggau kami, TUHAN! Kami tu nembiak Nuan. Anang ninggalka kami.’ ”

¹⁰Ku TUHAN bejaku ngenang pasal orang nya, “Sida rindu rari ari Aku, lalu sida enggai nagang pengingin diri. Nya alai Aku enda lantang ati ngagai sida. Aku deka ngingatka penyalah ti udah dikereja sida lalu ngukum sida ketegal dosa nya.”

¹¹Ku TUHAN bejaku ngagai aku, “Anang minta Aku nulung orang nya.

¹²Enti sema sida bepasa, enggai meh Aku mendingka sida ke nyabak minta tulung. Lalu enti sema sida ngenjuk piring tunu enggau piring tepung, enggai meh Aku nerima sida. Aku deka munuh sida ngena perang, lapar pungkang, enggau penyakit.”

¹³Udah nya aku lalu bejaku, “TUHAN ti Pemadu Tinggi, Nuan nemu, sida nabi diatu benung madahka ngagai orang mayuh menua tu enda kena laban perang tauka lapar pungkang, laban kenu ku sida, Nuan udah besemaya deka ngasuh orang di menua tu seruran diau dalam pemaik.”

¹⁴Tang ku TUHAN nyaut, “Bala sida nabi nya madahka utai ti bula dalam nama Aku. Aku nadai ngirumka sida, lalu Aku pen nadai mega meri atur ngagai sida, tauka bejaku ngagai sida. Genera ti dipadahka sida nya ukai datai ari Aku. Jaku tujum ti disebut sida nya nadai guna, semina jaku ti ditempaka sida ngapa.

¹⁵Aku ti TUHAN madahka ngagai nuan utai ti deka dikereja Aku ngagai bala sida nabi ke ukai dikirumka Aku, tang bejaku dalam nama Aku madahka menua tu enda kena laban perang tauka lapar pungkang. Aku deka munuh sida ngena perang enggau lapar pungkang.

¹⁶Orang ke udah alai sida madahka utai tu, deka mega dibunuh baka nya. Bangkai sida deka dibuai ba sebelah jalai raya di Jerusalem, lalu sida nadai orang ngubur. Utai tu deka nyadi ba semua sida, nyengkaum bini, anak lelaki, enggau anak indu sida. Aku deka malas penyai sida.”

¹⁷TUHAN ngasuh aku madahka ngagai orang mayuh pasal penyinu ati aku, lalu ngasuh aku bejaku: “Awakka ai mata aku bekeberai siang malam, awakka aku enda ngetu nyabak laban bansa aku balat bakal sereta balat pedis.

¹⁸Lebuh aku bejalai ba sebelah padang, dia aku tepedaka bangkai orang ke mati beperang. Lebuh aku tama ngagai nengeri, dia aku tepedaka orang mati keberuran. Sida nabi enggau sida imam majak ngereja pengawa sida, tang sida enda nemu utai ti dikereja diri.”[17]

¹⁹TUHAN, kati Nuan udah nulak menua Judah? Kati Nuan begedika orang Sion? Nama kebuah Nuan balat ngemediska kami datai ke kami nyau enda ulih suman? Kami begigaka pemaik, tang nadai utai ti manah nyadi. Kami ngarapka diri suman, tang utai ti balat ngenakut datai.

²⁰Kami udah bedosa ngelaban Nuan, TUHAN. Kami ngaku dosa kami empu enggau dosa aki ini kami.

²¹Kingatka semaya Nuan, lalu anang mechat kami. Anang ngemaluka Jerusalem endur alai kerusi diraja Nuan ti bemulia. Anang mungkir ari sempekat ti udah digaga Nuan enggau kami.

²²Nadai siku engkeramba orang bansa bukai ulih ngasuh hari ujan. Langit enda ulih ngasuh hari ujan. Kami andal ati ke Nuan, O TUHAN Allah Taala kami, laban Nuan siku aja ti ngereja utai nya.