Read Iban Jeremiah 15 Bible Online

Jeremiah 15 - Iban bible

Jeremiah 15

¹ Udah nya TUHAN bejaku ngagai aku, “Enti sema Moses seduai Samuel bediri ditu minta kasih ari Aku, enggai meh Aku ngayanka pengasih ngagai orang nya. Buru sida. Asuh sida rari ari mua Aku.

² Lebuh sida nanya ngagai nuan kini ke sida patut mupuk, padahka ngagai sida Aku udah nyebut tu: Sekeda sida deka diukum mati laban penyakit. Nya meh tunga sida deka mupuk! Sekeda sida deka diukum mati beperang. Nya meh tunga sida deka mupuk! Sekeda sida deka diukum mati keberuran. Nya meh tunga sida deka mupuk! Sekeda sida deka ditabanka nyadi orang tangkap. Nya meh tunga sida deka mupuk!

³Aku ti TUHAN udah ngeletak empat bengkah utai ti jai deka nyadi ba sida: sida deka mati beperang. Bangkai sida deka diperibitka ukui. Burung deka bepakaika sida, lalu jelu babas deka makai teda bangkai sida.

⁴ Aku deka ngasuh semua bansa di dunya tu geli meda sida. Aku ngereja nya ketegal utai ti udah dikereja Manasi anak Hesekiah di Jerusalem, lebuh iya nyadi raja menua Judah.”

⁵Ku TUHAN Bejaku, “Sapa deka kasihka kita, kita orang Jerusalem, lalu sapa deka sinu ati ke kita? Sapa deka ngetu lalu nanyaka pasal pengerai kita?

⁶Kita udah nulak Aku. Kita udah ninggalka Aku. Nya alai Aku nyengkau kita lalu ngeredakka kita laban Aku nyau lelak nagang Diri ringat.[18]

⁷Dalam semua nengeri di menua tu Aku naburka kita ngagai angin baka rumput ti rangkai. Aku ngerusak kita, O nembiak Aku, Aku munuh anak kita laban kita enda badu ngaga ulah ti jai.

⁸Di menua kita mayuh agi indu ke balu ari igi pasir ti ba tebing tasik. Aku munuh sida ke bujang lebuh sida agi benung orang lalu Aku ngasuh indai sida merinsa. Enggau ngenyit Aku ngasuh sida dituntung ati ti tusah enggau penakut.

⁹Indai ke lenyau tujuh iku anak, udah luput jengap-jengap nyintak seput. Ba iya, hari ti siang udah bebali nyadi petang. Iya dipechat sereta tusah ati. Aku deka nejuka bala munsuh kita munuh bala kita ke agi idup. Aku ti TUHAN, udah bejaku.”

¹⁰Naka meh pemerinsa aku tu! Nama kebuah indai aku ngadaka aku? Aku enda tau enda belaya sereta bekelikuh enggau semua orang di menua tu. Aku nadai kala nyali duit, tauka nginjau duit. Tang semua orang bela nyumpah aku.

¹¹TUHAN, awakka semua sumpah sida dikamatka magang, enti aku nadai udah kala bebendar betuaika[19] Nuan, enti aku nadai udah kala minta kasih ari Nuan ngarika bala munsuh aku lebuh sida dituntung penusah enggau pemerinsa. (

¹²Nadai orang ulih matahka besi, kelebih agi besi ari utara ti dichampur enggau temaga.)

¹³Ku TUHAN bejaku ngagai aku, “Aku deka ngasuh bala munsuh nabanka pengaya enggau pesaka bala nembiak Aku, kena ngukum sida ketegal dosa ti udah dikereja sida di serata menua tu.

¹⁴Aku deka ngasuh sida bekereja ke bala munsuh sida di menua ti enda ditemu sida, laban pengeringat Aku mau baka api, lalu deka mau belama iya.”

¹⁵Udah nya aku bejaku, “TUHAN, Nuan Empu nemu semua utai. Kingatka aku, lalu tulung aku. Awakka aku malas orang ke merinsaka aku. Anang kelalu liat ati enggau sida datai ke sida nyau ulih munuh aku. Ingat, aku dipechat ketegal Nuan.

¹⁶Nuan udah bejaku ngagai aku, lalu aku mendingka semua leka jaku Nuan. Aku endang enggi Nuan, TUHAN Allah Taala ti Pemadu Bekuasa, lalu leka jaku Nuan ngasuh ati aku gaga sereta lantang.

¹⁷Aku enda enggau orang ketawa ngelantangka diri. Aku ngasika jaku Nuan lalu diau kediri, lalu ringat.

¹⁸Nama kebuah aku seruran merinsa? Nama kebuah bakal aku enda ulih disumanka? Nama kebuah sida enggai gerai? Kati Nuan bisi ati deka ngasuh aku asa ngapa, baka sungai ti rangkai lebuh musin panas?”

¹⁹TUHAN lalu nyaut, “Enti nuan pulai baru ngagai Aku, Aku deka nerima nuan, lalu nuan deka nyadi nembiak Aku baru. Enti nuan enda bejaku mapap, tang madahka pesan ti beguna, nuan deka nyadi nabi Aku baru. Orang mayuh deka pulai baru ngagai nuan, lalu nuan enda ibuh mansang ngagai sida.

²⁰Aku deka ngaga nuan nyadi baka dinding temaga ti tegap di mua sida. Sida deka ngelaban nuan, tang sida enda ulih ngalahka nuan. Aku deka meruan enggau nuan lalu nyaga nuan, ngambika nuan likun.

²¹Aku deka ngelepaska nuan ari kuasa orang ke jai sereta mangah. Aku ti TUHAN, udah bejaku.”