Read Iban Jeremiah 16 Bible Online

Jeremiah 16 - Iban bible

Jeremiah 16

¹TUHAN lalu bejaku baru ngagai aku. Ku Iya,

²“Anang bebini tauka beranak ba endur ti baka tu.

³Aku deka madahka ngagai nuan utai ti deka nyadi ba bala anak mit ke ada ditu, enggau ba apai indai sida.

⁴Sida deka mati laban penyakit, lalu nadai orang deka ngulitka sida, tauka nguburka sida. Bangkai sida deka betegaring ba tanah baka tugung tai. Sida deka mati beperang tauka mati keberuran, lalu bangkai sida deka nyadika pemakai burung enggau jelu babas.

⁵“Nuan enda tau tama ngagai rumah orang ke ngulit. Anang sinu ati ke barang sapa orang. Aku enggai agi merekatka bala nembiak Aku ngena pemaik, tauka ngayanka pengerindu enggau pengasih ngagai sida.

⁶Orang ke kaya enggau ke seranta deka mati di menua tu, tang nadai orang deka nguburka sida, tauka ngulitka sida. Kita enda tau ngurik tubuh, tauka ngukur pala kita kena ngayanka penusah ati diri.

⁷Nadai orang deka merindang, lalu makai ngirup enggau orang ke ditinggalka kaban belayan mati. Nadai orang deka ngayanka penyinu ati diri ngagai orang ke mati apai tauka mati indai.

⁸“Anang tama ngagai rumah ti alai orang ngintu pengerami makai besai. Anang duduk makai ngirup enggau sida.

⁹ Pendingka utai ti disebut Aku, TUHAN ti Pemadu Bekuasa, ti Allah Taala ke disembah orang Israel. Aku deka madamka munyi nyawa orang ke lantang sereta gaga ati, enggau munyi nyawa orang ke rami ngintu gawai tikah. Orang ditu deka meda utai tu nyadi.

¹⁰“Lebuh nuan madahka semua utai tu ngagai sida, sida deka nanya ngagai nuan kebuah Aku udah mutuska runding deka ngukum sida ngemalat nya. Sida deka nanyaka penyalah diri, enggau dosa ti udah dikereja sida ngelaban TUHAN Allah Taala sida.

¹¹Udah nya, padahka ngagai sida jaku ti udah disebut TUHAN, ‘Sida aki ini kita udah ninggalka Aku lalu nyembah sereta betuaika bala petara bukai. Sida udah ninggalka Aku lalu enda ngasika ajar Aku.

¹²Tang kita udah ngereja utai ti jai agi ari ti udah dikereja aki ini kita. Semua kita kieh magang sereta jai, lalu kita enda ngasika Aku.

¹³Nya alai Aku deka muai kita ari menua tu ngagai menua ti enda kala ditemu kita tauka ditemu aki ini kita, lalu dia kita deka betuaika bala petara bukai siang malam, lalu Aku enggai ngayanka pengasih Aku ke kita.’ ”

¹⁴Ku TUHAN bejaku, “Nya alai, dinga nuan, maya deka datai alai orang badu agi besumpah ngena nama Aku TUHAN ti idup, ti udah mai orang Israel pansut ari menua Ejip,

¹⁵tang sida deka besumpah ngena nama Aku TUHAN ti idup, ti udah mai sida pansut ari menua ti di utara, enggau ari semua menua bukai ti udah alai Aku ngachirka sida. Aku deka mai sida pulai baru ngagai menua sida empu, ngagai menua ti udah diberi Aku ngagai aki ini sida. Aku ti TUHAN, udah bejaku.”

¹⁶Ku TUHAN bejaku, “Aku ngangauka mayuh orang berikan ngasuh sida datai lalu nangkap orang tu. Udah nya Aku deka ngangauka orang ke ngasu datai lalu ngasuh sida ngasu orang tu ba sebelah bukit enggau munggu, enggau dalam lubang gua.

¹⁷Aku meda semua utai ti dikereja sida. Nadai utai ulih dilalaika ari Aku. Semua dosa sida dipeda Aku magang.

¹⁸Aku deka ngasuh sida mayar dua kali lipat ke dosa enggau penyai sida, laban sida udah ngamahka menua Aku ngena engkeramba ti enda nemu enseput baka bangkai, lalu udah ngisi menua tu enggau engkeramba sida.”

¹⁹TUHAN, Nuan ke nyaga aku, lalu meri aku pengering. Nuan nulung aku lebuh maya penusah. Mayuh bengkah bansa deka datai ngagai Nuan ari tisi dunya, lalu nyebut, “Aki ini kami nadai utai bukai, tang semina petara ti pelesu, engkeramba ti nadai guna.

²⁰Kati mensia ulih ngaga petara ke diri empu? Enda, laban enti sida ulih, petara nya ukai petara ti bendar.”

²¹Ku TUHAN bejaku, “Nya alai Aku deka, sekali tu aja, ngasuh semua bansa nemu kuasa enggau pengering Aku. Sida deka nemu Aku endang TUHAN.”