Read Iban Jeremiah 17 Bible Online

Jeremiah 17 - Iban bible

Jeremiah 17

¹Ku TUHAN bejaku, “Orang Judah, dosa kita ditulis ngena pen besi. Dosa nya ditebuk ke dalam ati kita ngena pin intan, lalu diukirka ba sukut alta kita.

²Bala kita nyembah ba alta enggau ba tiang engkeramba ti udah didirika kita ke petara indu Aserah ngimbai genap iti batang kayu ti agi idup ba sebelah tuchung bukit

³enggau ba sebelah bukit di menua pesisir. Aku deka ngasuh munsuh kita nabanka pengaya enggau pesaka kita ketegal semua dosa ti udah dikereja kita[20] di serata menua kita.

⁴Kita enda tau enda nyerahka[21] menua ti udah diberi Aku ngagai kita, lalu Aku deka ngasuh kita betuaika bala munsuh kita di menua ti enda ditemu kita, laban pengeringat Aku mau baka api, lalu deka mau belama iya.”

⁵Ku TUHAN bejaku, “Tulah meh orang ke ninggalka Aku lalu manggaika pengarap sida ba mensia, ba pengering mensia.

⁶Orang nya baka babas di menua puang, ti tumbuh ba tanah ti rangkai sereta kusi, ba tanah ti masin ti nadai tumbuh utai. Nadai utai ti manah bisi kala nyadi ba orang nya.

⁷“Tang Aku deka merekatka orang ke manggaika pengarap sida ba Aku.

⁸ Orang nya baka kayu ti tumbuh ba tebing sungai lalu nyerangkapka urat iya ngagai sungai. Iya enda takutka musin kemarau, lalu daun iya mengkang gadung. Iya enda irauka hari ti nadai ujan. lalu iya majak bebuah.

⁹“Sapa nemu ati mensia? Nadai utai ti nemu agi ngakal ari ati mensia. Iya kelalu balat sakit lalu enda ulih digeraika.

¹⁰ Aku ti TUHAN, meresa runding sereta nguji ati mensia. Aku meri sida utai nitihka jalai sida idup, nitihka utai ti dikereja sida.”

¹¹Orang ke bulih duit ngena jalai ngelakar nya baka burung ti meram telu burung bukai. Lebuh iya agi benung orang, semua pengaya iya deka lenyau magang, lalu ba pengujung iya, iya nadai penunga, tang semina beli aja.

¹²Rumah Sembiang kitai baka kerusi diraja ti bemulia, ti bediri ba bukit ti tinggi kenyau ai pun kelia.

¹³TUHAN, Nuan siku aja ke dikandalka orang Israel. Semua orang ke ninggalka Nuan, deka dipechat. Sida deka lesap baka nama ti ditulis ba amau,[22] laban sida udah ninggalka Nuan ti TUHAN, mata ai ti beresi.

¹⁴TUHAN, geraika aku, ngambika aku amat suman. Selamatka aku, ngambika aku amat likun. Semina Nuan siku aja ke dipuji aku!

¹⁵Ku orang mayuh nyebut ngagai aku, “Ni jaku TUHAN? Awakka Iya ngamatka jaku nya diatu!”

¹⁶Tang, TUHAN, aku nadai kala minta Nuan ngasuh penusah ti besai ninggang sida.[23] Aku nadai ati deka ngasuh sida ditinggang penusah. TUHAN, Nuan nemu nya. Nuan nemu utai ti udah disebut aku.

¹⁷Anang ngenakutka aku. Nuan Empu ke alai aku belindung lebuh penusah datai.

¹⁸Pechat sida ke merinsaka aku, tang anang mechat aku, TUHAN. Emba sida, tang anang ngemba aku. Asuh penusah ti besai ninggang sida lalu redakka sida.

¹⁹Ku TUHAN bejaku ngagai aku, “Jeremiah, alai nuan mupuk lalu padahka pesan Aku ba mua Pintu Orang Mayuh, ti ditengah raja menua Judah tama-pansut ari nengeri nya. Udah nya mansang nuan ngagai semua mua pintu ti bukai di Jerusalem.

²⁰Asuh sida ke raja, enggau semua orang ke di menua Judah, enggau genap iku orang ke diau di Jerusalem ke tama nengah pintu nya, mendingka utai ti disebut Aku.

²¹ Padahka ngagai sida, enti sida sayauka seput diri, sida enda tau berangkutka utai lebuh Hari Sabat. Sida enda tau mai utai nengah pintu nengeri Jerusalem,

²² tauka ngangkut utai pansut ari rumah sida lebuh Hari Sabat. Sida enda tau bekereja lebuh Hari Sabat. Sida enda tau enda ngintu hari nya nyadi hari ti kudus, munyi ti udah dipadahka Aku ngagai aki ini sida.

²³Aki ini sida enda mendingka Aku tauka ibuhka Aku, tang kieh. Sida enggai ngasika Aku tauka belajar ari Aku.

²⁴Padahka ngagai sida, sida enda tau enda ngasika semua jaku Aku. Sida enda tau ngangkut utai nengah pintu nengeri nya lebuh Hari Sabat. Sida enda tau enda ngintu Hari Sabat kudus, lalu enda tau sekali-kali gawa.

²⁵Nya baru bala raja enggau bala anak raja sida deka tama nengah pintu Jerusalem, lalu bempu kuasa diraja baka ke dikembuan David. Sida enggau bala orang Judah enggau orang Jerusalem, deka nepan kerita perang, enggau nepan kuda, lalu nengeri Jerusalem deka seruran penuh laban mensia.

²⁶Orang deka datai ari mayuh bengkah nengeri di serata menua Judah, enggau ari genturung pendiau ti ngelingi Jerusalem. Sida deka datai ari menua Benjamin, ari kaki bukit, ari bukit, enggau ari selatan menua Judah. Sida deka mai ngagai Rumah Aku piring tunu enggau piring, pemeri ti digaga ari gandum enggau menyan, sama enggau pemeri terima kasih.

²⁷Tang sida enda tau enda ngasika Aku, lalu ngintu Hari Sabat kudus. Sida enda tau ngangkut utai nengah pintu Jerusalem lebuh hari nya, laban enti sida bisi ngangkut utai baka nya, Aku deka nunu semua pintu Jerusalem. Api deka ngeretungka istana di Jerusalem, lalu nadai orang ulih madamka api nya.”