Read Iban Jeremiah 18 Bible Online

Jeremiah 18 - Iban bible

Jeremiah 18

¹Ku TUHAN bejaku ngagai aku,

²“Mansang nuan ngagai rumah tukang periuk. Aku deka meri pesan ngagai nuan dia.”

³Nya alai aku mupuk, lalu tetemuka tukang periuk ke benung gawa.

⁴Lebuh periuk ti digaga iya nya enda tentu manah dipeda, iya ngambi tanah liat nya lalu ngaga utai bukai.

⁵Udah nya TUHAN bejaku ngagai aku,

⁶“Kati Aku nadai hak ngaga kita orang Israel baka tukang periuk ti ngena tanah liat nya? Kita ba jari Aku, baka tanah liat ti ba jari tukang periuk.

⁷Enti Aku madahka Diri deka mabut, ngerubuh, tauka ngerusak bansa tauka perintah,

⁸tang udah nya bansa nya ngelengkaka penyai iya, Aku enda nyadi ngereja utai ti ku Aku.

⁹Tang enti Aku madahka Diri deka niri tauka negika siti bansa tauka perintah,

¹⁰tang udah nya bansa nya enda ngasika Aku, lalu ngereja penyai, Aku enda nyadi ngereja utai ti ku Aku.

¹¹Nya alai, padahka ngagai orang Judah, enggau ngagai orang ke diau di Jerusalem, Aku diatu benung bekira deka ngelaban sida, lalu Aku sedia deka ngukum sida. Asuh sida badu agi bedosa. Asuh sida ngubah ulah enggau utai ti dikereja sida.

¹²Sida deka nyaut, ‘Kami enggai. Nama kebuah kami enda tau enda berubah? Semua kami deka majak kieh sereta jai nitihka peneka ati kami.’ ”

¹³Ku TUHAN bejaku, “Tanyaka ngagai genap bengkah bansa enti utai ti baka nya bisi udah kala nyadi suba. Orang Israel udah ngereja utai ti udu jai!

¹⁴Kati bukit Lebanon nadai kala dibalut seleju? Kati ai sungai ti rarat ari bukit bisi kala rangkai?

¹⁵Tang bala nembiak Aku enda agi ingatka Aku. Sida nunu menyan ke engkeramba. Sida udah tesangkut ba jalai ti ditengah sida. Sida enda agi niti jalai ti lama. Sida bejalai nengah jalai ti nadai meruan arus.

¹⁶Sida udah ngaga menua tu nyadi menua ti balat ngasuh takut, ti dipechat belama iya. Semua orang ke mansa deka tekenyit ati laban utai ti dipeda sida, lalu sida ngilikka pala alit ati.

¹⁷Aku deka ngachirka bala nembiak Aku di mua munsuh sida, baka amau ti dikebuka ribut ti muput ari timur. Aku deka nguingka belakang Aku ngagai sida. Aku enggai nulung sida lebuh sida dituntung penusah.”

¹⁸Udah nya orang mayuh lalu bejaku, “Aram kitai ngelaban Jeremiah. Kitai endang seruran bisi sida imam ti tau ngajar kitai, orang ke bepenemu-dalam ti tau ngiring kitai, enggau sida nabi ti tau madahka pesan Allah Taala. Aram kitai bedawaka iya, lalu badu agi mendingka utai ti disebut iya.”

¹⁹Aku lalu besampi, “TUHAN, dingaka utai ti disebut aku, lalu pendingka utai ti disebut munsuh aku pasal aku.

²⁰Kati pemadas patut dibalas enggau penyai? Tang taja pia, sida udah numbak lubang kena sida ngulihka aku. Kingatka aku ti udah ngadap ngagai Nuan, lalu bejaku ngarika sida, ngambika Nuan enda nyamah sida lebuh Nuan ringat.

²¹Tang diatu TUHAN, awakka bala anak sida mati keberuran. Awakka sida mati beperang. Awakka sida ke indu mati laki, mati anak. Awakka sida ke lelaki mati laban penyakit, lalu bala lelaki ke agi biak mati beperang.

²²Asuh bala perumpak datai enggau ngenyit lalu ngerumpak rumah sida. Asuh sida nyerauh takut. Sida udah numbak lubang kebung kena sida ngulihka aku, lalu udah nan panjuk kena sida nyintak aku.

²³Tang Nuan, O TUHAN, nemu semua aum sida ke deka munuh aku. Anang ngampun penyai sida tauka ngampun dosa sida. Asuh sida alah, lalu jamah sida lebuh Nuan ringat.”