Read Iban Jeremiah 19 Bible Online

Jeremiah 19 - Iban bible

Jeremiah 19

¹TUHAN ngasuh aku mupuk lalu meli sigi benda ti digaga ari tanah liat. Iya mega ngasuh aku mai sekeda bala tuai bansa, enggau sekeda bala imam ke tuai agi umur,

² lalu bejalai nengah Pintu Kerimpak Periuk pansut ngagai Lebak Hinom. Dia aku deka madahka pesan ti deka diberi TUHAN ngagai aku.

³TUHAN ngasuh aku nyebut, “Raja menua Judah enggau kita orang Jerusalem, pendingka jaku Aku, TUHAN ti Pemadu Bekuasa, ti Allah Taala ke disembah orang Israel. Aku deka ngasuh penusah ti besai ninggang endur tu, datai ke semua orang ke ninga pasal penusah nya, deka temati-kutu magang.

⁴Aku deka ngereja nya laban orang Israel udah ninggalka Aku, lalu udah ngamahka endur tu beberika piring ngagai petara bukai, petara ti enda ditemu sida tauka ditemu aki ini sida, tauka ditemu bala raja menua Judah. Sida udah ngisi endur tu enggau darah orang ke nadai penyalah,

⁵ lalu sida udah ngaga alta ke Baal, lalu nunu bala anak sida nyadika piring ba alta nya. Aku nadai kala ngasuh sida ngereja nya. Indah berundingka utai nya deh Aku enda.

⁶Nya alai, maya deka datai alai endur tu deka badu agi dikumbai Topet tauka Lebak Hinom, tang deka dikumbai Lebak Alai Bebunuh.

⁷Tu meh endur alai Aku deka ngemuntanka pelan orang Judah enggau orang Jerusalem. Aku deka ngasuh bala munsuh sida ngalahka sida lalu munuh sida lebuh beperang. Aku deka nyerahka bangkai sida nyadika pemakai burung enggau jelu babas.

⁸Aku deka ngasuh pengerusak ti besai ninggang nengeri tu ngambika semua orang ke mansa deka tekenyit ati sereta temati-kutu meda pengerusak nya.

⁹Munsuh deka ngelulung nengeri tu, lalu nguji munuh orang ke diau ditu. Bala munsuh deka balat ngelulung nengeri tu datai ke orang ke diau dalam nengeri tu deka bepakaika pangan diri, nyengkaum bepakaika bala anak sida empu.”

¹⁰Udah nya TUHAN lalu ngasuh aku mechahka benda nya di mua bala sida ke udah bejalai sama enggau aku

¹¹lalu madahka ngagai sida jaku ti udah disebut TUHAN ti Pemadu Bekuasa, “Aku deka ngeredakka bala orang tu, enggau nengeri tu, lalu nengeri tu deka nyadi baka benda ti pechah tu ti enda ulih dipejantilka baru. Orang mayuh deka nguburka bala sida ke mati di Topet, datai ke sida nyau nadai agi endur alai nguburka sida.

¹²Aku besemaya deka ngaga nengeri tu enggau orang ke diau dalam nengeri tu baka Topet.

¹³Semua rumah di Jerusalem, rumah bala raja menua Judah, enggau semua rumah ti bisi perabung ti udah alai nunu menyan kena besembahka bintang, lalu udah nyadi endur alai nuang wain nyadika piring ti diberi ngagai petara bukai, deka kamah magang baka Topet.”

¹⁴Udah nya aku angkat ari Topet, endur alai aku ti udah diasuh TUHAN madahka pesan Iya. Aku mupuk lalu bediri ba tengah laman Rumah Sembiang, lalu madahka ngagai semua orang mayuh

¹⁵pasal TUHAN ti Pemadu Bekuasa, ti Allah Taala ke disembah orang Israel ti udah nyebut, “Aku deka ngukum nengeri tu enggau genap buah nengeri ti mit semak nengeri tu, munyi ti udah dipadahka Aku, laban kita kieh lalu enggai mendingka jaku Aku.”