Read Iban Jeremiah 2 Bible Online

Jeremiah 2 - Iban bible

Jeremiah 2

¹TUHAN ngasuh aku

²madahka pesan tu ngagai semua orang di Jerusalem. “Aku ingatka penetap ati nuan, Israel, lebuh nuan agi biak, pemendar nuan rinduka Aku, lebuh tua terubah jadi enggau pangan diri. Nuan nitihka Aku nengah menua puang, nengah menua ti nadai kala ditanam enggau utai.

³Israel, nuan endang enggi Aku siku aja. Nuan endang pesaka Aku ti kudus. Aku ngasuh pemerinsa enggau penusah ti besai ninggang semua orang ke ngemediska nuan. Aku ti TUHAN, udah bejaku.”

⁴Pendingka pesan TUHAN, kita ke peturun Jakop, kita ke raban bansa orang Israel.

⁵Ku TUHAN bejaku: “Nama dawa ti dibantaika bala aki ini kita kena sida ngelaban Aku? Nama utai ti ngasuh sida ninggalka Aku? Sida besembahka engkeramba ti nadai guna lalu sida empu nyadi orang ke nadai guna.

⁶Sida enggai ibuhka Aku, taja pen Aku udah mai sida pansut ari menua Ejip lalu nguluka sida nengah menua puang: menua ti nadai utai tumbuh, ti penuh laban lubang pasir, menua ti rangkai sereta tau ngasuh bebadi, ti enda diuan mensia lalu enda ditengah mensia.

⁷Aku mai sida ngagai menua ti ami, ngambika sida ngelantangka diri ngena utai ti diketau enggau utai bukai ti manah di menua nya. Tang sida ngerusak menua Aku. Sida ngamahka menua ti udah diberi Aku ngagai sida.

⁸Sida imam nadai nanya, ‘Dini alai TUHAN?’ Bala imam Aku Empu enda ngelala Aku. Bala raja angkat ngelaban Aku. Bala nabi bejaku dalam nama Baal lalu nyembah engkeramba ti nadai guna.

⁹“Nya alai Aku ti TUHAN, deka bedawaka nembiak Aku baru. Aku deka bedawaka peturun sida.

¹⁰Mupuk ke barat ngagai pulau Saiprus, lalu asuh orang mupuk ke timur ngagai menua Kedar. Nya baru nuan deka nemu, nadai utai ti baka tu udah kala nyadi menya.

¹¹Nadai bansa bukai udah kala nukar petara sida, taja pen petara sida nya ukai petara ti bendar. Tang bala nembiak Aku udah nyilih Aku, Allah Taala ti udah mai basa ngagai sida, enggau petara ti nadai ulih ngereja utai ke sida.

¹²Nya alai Aku ngasuh langit berenyang laban takut, tenganga alit ati,

¹³laban bala nembiak Aku udah ngereja dua bengkah dosa, iya nya, sida udah ninggalka Aku ti nyadi mata ai ti idup, lalu sida udah numbak telaga telaga ti merekah ti enda ulih ngundan ai.

¹⁴“Israel ukai ulun. Iya ukai ada nyadi ulun. Nya alai, nama kebuah munsuh iya begigaka iya?

¹⁵Munsuh iya udah merakka nyawa ngagai iya munyi singa ti negung. Sida udah ngaga menua iya nyadi menua puang, lalu semua nengeri iya nyau nyadi tembawai sereta nadai orang nguan.

¹⁶Lalu orang Mempis enggau orang Tapanes udah mechahka kerubung pala iya.

¹⁷Israel, nuan empu ti udah minta diri ditinggang utai tu laban nuan udah ninggalka Aku ti TUHAN Allah Taala nuan, lebuh Aku benung nguluka nuan di rantau jalai.

¹⁸Nama penguntung nuan mansang ngagai menua Ejip, ngambika nuan ulih ngirup ai ari Sungai Nile? Nama penguntung nuan mansang ngagai menua Asiria ngambika nuan ulih ngirup ai ari Sungai Eupratis?

¹⁹Penyai nuan empu deka ngukum nuan, lalu pengawa nuan ke ninggalka Aku deka ngukum nuan. Nuan deka ngasaika pemait enggau pemedis ninggalka Aku, ti TUHAN Allah Taala nuan, lalu enda agi tetap ati ngagai Aku. Aku TUHAN ti Pemadu Tinggi, udah bejaku.”

²⁰Ku TUHAN ti Pemadu Tinggi bejaku, “Israel, dulu kelia nuan enggai betuaika Aku. Nuan enggai ngasi lalu enda nyembah Aku. Ba genap igi munggu enggau di baruh genap pun kayu nuan nyembah petara ti ngasuh peridi.

²¹Aku udah nanam nuan baka batang anggur ti sengaja dipilih ari paung ti pemadu manah. Tang peda gaya nuan diatu! Nuan tu baka batang anggur ti buruk sereta nadai guna.

²²Enti sema nuan mandi lalu berunsut ngena sabun ti pemadu bisa, agi meh Aku ulih meda bekau penyalah nuan.

²³Baka ni ku nuan ulih madahka diri nadai udah ngamahka diri empu, madahka diri nadai udah kala nyembah Baal? Peda nuan gaya nuan udah bedosa ba lebak. Peda nuan gaya utai ti udah dikereja nuan. Nuan tu baka jelu unta lebuh musin bung, belanda kia-kia

²⁴belanda ngagai menua puang.[2] Lebuh iya bung, sapa ulih ngandang iya? Lelaki ke inginka iya enda ibuh ngiruh diri begigaka iya laban iya endang seruran sedia lebuh musin bung.

²⁵Israel, anang ngelelakka diri bejalai, tauka nejuka rekung nuan rangkai begigaka petara bukai. Tang ku nuan, ‘Enggai nyadi enda! Aku enda ulih nikal agi. Aku udah rinduka petara orang bansa bukai lalu aku deka nitihka bala petara nya.’ ”

²⁶Ku TUHAN bejaku, “Baka penchuri ke dipechat lebuh iya ditangkap, baka nya meh semua kita orang Israel deka dipechat - bala raja enggau bala pemesai kita, bala imam enggau bala nabi kita.

²⁷Semua kita deka dipechat magang - kita ke beapaika kayu, ke beindaika batu. Utai tu deka nyadi laban kita udah ninggalka Aku, ukai ngagai Aku. Tang lebuh kita dituntung penusah, kita minta Aku datai ngelepaska kita.

²⁸“Kini ke tunga bala petara ti udah digaga kita ke kita empu? Lebuh kita dituntung penusah, awakka sida meh ngelepaska kita - enti sida ulih! Judah, petara kita nyau ngemayuh nengeri kita empu.

²⁹Nama utai ti diputapka kita? Nama kebuah kita angkat ngelaban Aku?

³⁰Aku udah ngukum kita, tang utai nya nadai pulai ke penguntung kita. Kita enggai nejuka Aku ngajar kita. Kita baka singa ti mangah, bebunuhka bala nabi kita.

³¹Orang Israel, pendingka utai ti disebut Aku. Ba penemu kita, kati Aku tu baka menua puang, baka menua ti petang ti tau ngasuh bebadi? Nya alai nama kebuah kita madahka diri deka ngereja utai nitihka peneka ati kita empu, lalu madahka diri enggai pulai ngagai Aku baru?

³²Kati indu ke biak bisi enda kala ingat ngena perengka emas iya, tauka indu ke ditikah enda ingat ngena pekayan tikah iya? Tang bala nembiak Aku udah kelalu lama enda ingatka Aku.

³³Kita amat nemu chara begigaka ambai. Indah indu ke pemadu jai deh tau belajar ari kita.

³⁴Gari kita nyau kamah laban bekau darah orang ke seranta enggau orang ke nadai penyalah, ukai laban darah penchuri. “Tang taja pia,

³⁵kita nyebut, ‘Aku nadai penyalah. TUHAN tentu enda agi ringat ngagai aku.’ Tang Aku ti TUHAN, deka ngukum kita laban kita madahka diri nadai udah bedosa.

³⁶Kita udah empelitaka diri laban kita udah nguingka diri ngagai bala petara orang bansa bukai. Kita deka asa ngapa ngarapka Ejip, baka kita ke udah asa ngapa ngarapka Asiria.

³⁷Kita deka nguingka diri ari Ejip, kunduk-kunduk malu. Aku ti TUHAN, udah nulak sida ke dikarapka kita. Kita nadai bulih utai ari sida.”