Read Iban Jeremiah 20 Bible Online

Jeremiah 20 - Iban bible

Jeremiah 20

¹Lebuh Imam Pasur anak Imer, ti nyadi tuai pemesai dalam Rumah Sembiang, ninga aku madahka utai nya,

²iya ngasuh orang nyipat aku, lalu nanchang aku ngena rantai ba semak Pintu Benjamin dalam Rumah Sembiang.

³Pagi hari siti, lebuh Pasur udah muka rantai aku, aku lalu nyebut ngagai iya, “TUHAN nadai meri nuan nama Pasur. Nama ti diberi Iya ngagai nuan nya ‘Penakut ti Besai di Semua Endur.’

⁴TUHAN Empu udah nyebut, ‘Aku deka ngaga nuan nyadi orang ke balat diketakutka nuan empu, enggau bala pangan nuan, lalu nuan deka meda semua sida dibunuh pedang munsuh. Aku deka ngasuh semua orang Judah dipegai raja menua Babilon. Iya deka nabanka sekeda sida nyadi orang tangkap ngagai menua iya empu, lalu munuh sida ti bukai.

⁵Aku deka mega nejuka bala munsuh sida ngerumpak semua pengaya nengeri tu, lalu ngerampas semua reta tengkira enggau pesaka iya, lalu nabanka semua utai nya ngagai menua Babilon.

⁶Tang pasal nuan empu, Pasur, nuan enggau semua kita sebilik deka ditangkap magang lalu ditabanka ngagai menua Babilon. Nuan deka mati di menua nya lalu dikuburka, sama enggau bala pangan nuan ti udah alai nuan nusui mayuh macham pemula.’ ”

⁷TUHAN, Nuan udah nipu aku, lalu aku udah kena tipu. Nuan kering agi ari aku, lalu Nuan udah ngalahka aku. Semua orang beduan aku. Sida ketawaka aku sepamanjai hari.

⁸Genap kali aku bejaku, aku enda tau enda merakka nyawa sereta manjung, “Penusah! Pengerusak!” TUHAN, aku seruran dikemelika orang sereta dipechat ketegal aku madahka pesan Nuan.

⁹Tang lebuh aku nyebut, “Aku deka badu agi ingatka TUHAN, lalu badu agi bejaku dalam nama Iya,” nya baru pesan Nuan mau baka api dalam ati aku. Enggau naka ulih aku nguji nagang pesan nya pansut, tang enda ulih.

¹⁰Aku ninga genap iku orang betelai, “Utai ti balat ngenakutka bisi di semua endur. Nya alai, aram kitai madahka pasal Jeremiah ngagai perintah.” Indah pangan ke rapat enggau aku deh nganti aku alah. Ku sida, “Nyangka ukur iya ulih ditipu. Nya baru kitai ulih ngalahka iya lalu malas.”

¹¹Tang Nuan, TUHAN, ti kering sereta bekuasa, setanah enggau aku lalu sida ke merinsaka aku deka asa ngapa. Sida deka dipechat belama iya, laban sida enda ulih mujur. Pemalu sida deka dikingatka belama iya.

¹²Tang TUHAN ti Pemadu Bekuasa, Nuan endang ngabas ati enggau runding orang ngena pengelurus. Nuan nemu utai ti di dalam ati enggau runding sida. Nya alai awakka aku meda Nuan malas penyai bala munsuh aku, laban aku udah manggaika pekara aku ba jari Nuan.

¹³Belagu ke TUHAN! Puji TUHAN! Iya ngelepaska orang ke kena tekan ari kuasa orang ke jai.

¹⁴ Sumpah enggau hari aku ada! Anang ngingatka hari indai aku ngadaka aku!

¹⁵Tulah meh orang ke mai berita “Anak nuan lelaki! Nuan bisi anak lelaki!” lalu ngasuh ati apai aku gaga.

¹⁶Awakka orang nya baka nengeri ti udah dirusak TUHAN enggau nadai pengasih. Awakka orang nya ninga munyi sabak orang ke natka pemedis lebuh pagi hari lalu ningaka munyi terantang begau lebuh tengah hari,

¹⁷laban iya enda munuh aku lebuh aku ada lalu enda ngaga kandung indai aku nyadika kubur aku.

¹⁸Nama kebuah aku ada? Kati aku ada ngambika aku semina ditinggang penusah enggau pemerinsa aja, lalu dipechat lebuh aku mati?