Read Iban Jeremiah 21 Bible Online

Jeremiah 21 - Iban bible

Jeremiah 21

¹Raja Sedekiah menua Judah ngasuh Pasur anak Malkiah seduai Imam Sepaniah anak Maseiah mai peminta tu ngagai aku:

² “Kami minta nuan bejaku ngagai TUHAN ngarika kami, laban Raja Nebukadnesar menua Babilon enggau bala soldadu iya benung ngelulung nengeri tu. Nyangka ukur TUHAN deka ngereja kereja ajih ke kitai, lalu mejalka Nebukadnesar nyurutka diri.”

³Udah nya TUHAN lalu bejaku ngagai aku. Aku lalu ngasuh sida ke udah diasuh betemu enggau aku

⁴madahka ngagai Sedekiah jaku ti disebut TUHAN Allah Taala ke disembah orang Israel, “Sedekiah, Aku deka ngalahka bala soldadu nuan ke benung beperang ngelaban raja menua Babilon enggau bala soldadu iya. Aku deka nugungka senyata bala soldadu nuan ba puak nengeri.

⁵Aku deka beperang ngelaban nuan enggau pengabis kuasa, pengeringat, pemedis ati enggau pengeransi aku.

⁶Aku deka munuh semua orang ke diau dalam nengeri tu. Mensia enggau jelu deka sama mati laban penyakit.

⁷Tang ba pasal nuan empu, bala pemesai nuan, enggau orang ke enda mati dalam perang tu, ti enda mati keberuran, enda mati laban penyakit, Aku deka nejuka semua kita ditangkap Raja Nebukadnesar enggau bala munsuh kita, lalu sida deka munuh kita. Nebukadnesar deka munuh kita. Iya enda ngalau kita, tauka kasih, tauka sinu ati ke kita. Aku ti TUHAN, udah bejaku.”

⁸Udah nya TUHAN lalu ngasuh aku nyebut ngagai orang mayuh, “Pendingka tu ulih kita! Aku ti TUHAN, ngasuh kita milih jalai ti nuju ngagai pengidup tauka jalai ti nuju ngagai pemati.

⁹Barang sapa agi mengkang dalam nengeri tu deka dibunuh lebuh maya perang, tauka mati keberuran, tauka mati laban penyakit. Tang orang ke pansut lalu nyerahka diri ngagai orang Babilon ke benung nyerang nengeri tu diatu, enda dibunuh, tang ulih ngidupka nyawa diri.

¹⁰Aku udah mutuska runding enggai ngalau tang deka ngerusak nengeri tu. Nengeri tu deka diserahka ngagai raja menua Babilon, lalu raja nya deka nunu nengeri tu. Aku ti TUHAN, udah bejaku.”

¹¹TUHAN ngasuh aku meri pesan tu ngagai ruang bilik raja menua Judah, ke ari peturun David: “Pendingka utai ti disebut Aku ti TUHAN. Pejalaika atur ti lurus tiap hari. Jaga orang ke kena tipu ari orang ke nipu iya. Enti kita enda, penyai ti dikereja kita deka ngasuh pengeringat Aku mau baka api ti enda nemu padam.

¹³Jerusalem, nuan duduk[24] tinggi ari atas semua lebak, baka batu ti bediri ari atas emperan. Tang Aku deka ngelaban nuan. Nuan madahka nadai orang ulih nyerang nuan, tauka ngelanggar kuta nuan.

¹⁴Tang Aku deka ngukum nuan ketegal utai ti udah dikereja nuan. Aku deka nunu istana nuan, lalu api nya deka ngeretungka semua utai ti ngelingi istana nya. Aku ti TUHAN, udah bejaku.”