Read Iban Jeremiah 22 Bible Online

Jeremiah 22 - Iban bible

Jeremiah 22

¹TUHAN ngasuh aku mansang ngagai istana raja menua Judah, lalu ngasuh raja nya ke ari peturun Raja David, bala pemesai iya, enggau orang Jerusalem, mendingka utai ti udah disebut TUHAN:

³“Aku ti TUHAN ngasuh kita ngereja utai ti lurus sereta ngena. Jaga orang ke kena tipu ari orang ke nipu iya. Anang merinsa tauka nekanka pengidup orang kampar, orang ke nadai apai indai, tauka indu ke balu, lalu anang munuh orang ke nadai penyalah ba endur ti kudus tu.

⁴Enti kita amat ngereja utai ti udah diasuh Aku kereja kita, nya baru bala peturun David deka nampung-menampung nyadi raja. Lalu sida, enggau bala pemesai sida, enggau bala sida empu, deka majak bejalai nengah pintu istana tu ngena kerita perang enggau kuda.

⁵ Tang enti kita enda ngasika jaku Aku, Aku besumpah madahka istana tu deka nyadi tembawai. Aku ti TUHAN, udah bejaku.

⁶“Ba peda Aku, istana raja menua Judah sebaka pemanah enggau menua Giliat, sebaka pemanah enggau Bukit menua Lebanon. Tang Aku deka ngaga istana nya nyadi endur ti sunyi ti enda diuan mensia.

⁷Aku deka ngasuh orang ngerusak iya. Semua sida deka mai kapak, nebang tiang kayu sidar ti manah gaya, lalu nibarka sida ngagai api.

⁸“Udah lepas nya, mayuh orang kampar deka mansa lalu bejaku enggau pangan diri betanyaka kebuah TUHAN udah ngereja utai ti baka nya ngagai nengeri ti besai tu.

⁹Udah nya sida deka nyaut madahka utai nya nyadi laban kita udah ngelengkaka sempekat kita enggau Aku, ti Allah Taala kita, lalu udah nyembah sereta betuaika petara bukai.”

¹⁰Orang Judah, anang nyabakka Raja Josiah. Anang ngulitka pemati iya. Tang nyabak kita ke anak iya Joahas laban sida nabanka iya, lalu iya enda pulai agi. Iya nadai meda menua ada iya agi.

¹¹ Ku TUHAN bejaku ngenang pasal Raja Joahas anak Josiah, ke nganti apai iya nyadi raja menua Judah, “Iya udah angkat ari tu, lalu enda pulai agi.

¹²Iya deka mati di menua ti alai sida udah nabanka iya, lalu iya nadai meda menua tu agi.”

¹³Tulah meh orang ke ngaga rumah beduduk ba atur ti enda lurus lalu nangkir rumah nya ngena jalai ngelakar, ke ngasuh bala nembiak iya gawa enggau nadai upah lalu enda mayar gaji sida.

¹⁴Awakka orang diukum enti iya nyebut, “Aku deka ngaga ke aku empu sebuah rumah limas ti mayuh bilik ti besai di sadau.” Iya lalu ngaga jenila ba rumah nya, ngelapis rumah nya ngena kayu sidar, lalu ngechat iya mirah.

¹⁵Kati nuan ulih ngaga diri nyadi raja ke menyana agi ketegal nuan begagaka rumah ngena kayu sidar, rumah ti manah agi gaya ari rumah orang bukai? Apai nuan lantang diau seumur idup. Iya endang seruran lurus sereta meri atur ti betul, lalu iya mujur dalam semua utai ti dikereja iya.

¹⁶Iya meri atur ti betul lebuh iya ngatur pechara orang ke seranta, lalu semua utai ti dikereja iya mujur magang. Nya meh reti nemu TUHAN.

¹⁷Tang nuan semina berundingka diri empu aja. Nuan munuh orang ke nadai penyalah lalu nuan nekanka pengidup bala nembiak nuan sereta kasar enggau sida. TUHAN udah bejaku.

¹⁸ Nya alai ku TUHAN bejaku ngenang pasal Raja Jehoiakim anak Josiah, raja menua Judah, “Nadai orang deka ngulitka pemati iya tauka nyebut munyi tu, ‘O menyadi, naka meh penusah! Naka meh penusah!’ Nadai orang deka meliar ai mata tauka nyabakka iya, ‘Tuan aku! Raja aku!’

¹⁹Baka orang ke muai bangkai keledai, baka nya meh iya deka diirit kebukai lalu dibuai ke luar ari nengeri Jerusalem.”

²⁰Orang Jerusalem, alai kita mansang ngagai menua Lebanon lalu manjung. Alai kita mansang ngagai menua Basan lalu nyabak. Manjung ari bukit menua Moap, laban semua orang ke setanah enggau nuan udah alah magang.

²¹TUHAN udah bejaku ngagai kita lebuh kita kaya-raja, tang kita enggai mending. Nya meh utai ti udah dikereja kita seumur idup. Kita endang enggai sekali-kali ngasika TUHAN.

²²Bala tuai kita deka dikebuka ribut, bala orang ke setanah enggau kita deka ditabanka nyadi orang tangkap, nengeri kita deka dipechat lalu nyadi malu ketegal semua penyai ti udah dikereja kita.

²³Kita belelak likun dikelingi kayu sidar ti dibai ari Lebanon. Tang naka meh pengasih kita lebuh pemedis nuntung kita, pemedis baka ke ditatka indu ke radai deka beranak.

²⁴ Ku TUHAN bejaku ngagai Raja Jehoiakin anak Raja Jehoiakim menua Judah, “Laban Aku tu Allah Taala ti idup, enti sema nuan nya tinchin pengechop ti dikena Aku ba jari kanan Aku, agi meh Aku deka merurutka nuan

²⁵lalu nyerahka nuan ngagai orang ke diketakutka nuan, orang ke deka munuh nuan. Aku deka nyerahka nuan ngagai Raja Nebukadnesar menua Babilon, enggau bala soldadu iya.

²⁶Aku deka muai nuan enggau indai nuan ngagai menua bukai. Seduai deka mansang ngagai siti menua ti ukai menua ada seduai, lalu seduai deka mati dia.

²⁷Seduai deka lelengauka menua tu, tang seduai enda agi pulai kitu.”

²⁸Ku aku bejaku, “Kati Raja Jehoiakin udah nyadi baka benda ti belah, ti dibuai, lalu enda diguna orang agi? Kati nya kebuah iya enggau bala anak iya udah dibuai ngagai menua ti enda ditemu sida?”

²⁹O menua aku, menua aku, menua aku! Pendingka utai ti udah disebut TUHAN:

³⁰“Orang tu diukum lenyau anak, nyadi orang ke nadai kala mujur. Iya nadai peturun merintah menua Judah kena nganti David. Aku ti TUHAN, udah bejaku.”