Read Iban Jeremiah 23 Bible Online

Jeremiah 23 - Iban bible

Jeremiah 23

¹“Tulah meh sida pengibun ke ngerusak lalu ngachirka bala nembiak Aku,” ku TUHAN bejaku.

²Nya alai tu meh munyi jaku TUHAN Allah Taala ke disembah orang Israel pasal orang ke dikarapka ngibun nembiak Aku: “Kita enda ngibun nembiak Aku. Kita udah ngachirka sida, lalu muru sida ngagai menua bukai. Diatu Aku deka ngukum kita ketegal penyai ti udah dikereja kita.

³Aku deka ngempuruka nembiak Aku ti bukai ari semua menua ti udah alai Aku ngachirka sida, lalu Aku deka mai sida pulai baru ngagai menua sida empu. Sida deka beranak betelesak lalu mansang mayuh tubuh.

⁴Aku deka ngasuh bala pengibun ngintu sida. Sida nembiak Aku nadai agi nangi tauka takut, lalu nadai siku sida deka lenyau. Aku ti TUHAN, udah bejaku.”

⁵ Ku TUHAN bejaku, “Dinga nuan, maya deka datai alai Aku deka milih siku orang ke lurus ari peturun David, lalu iya deka merintah nyadi raja ti bepenemu-dalam lalu ngereja utai ti ngena sereta lurus di menua tu.

⁶Lebuh iya nyadi raja, Judah deka likun, lalu Israel deka diau dalam pemaik. Iya deka dikumbai ‘TUHAN ti pengelurus kitai.’

⁷Ku TUHAN bejaku, “Nya alai, dinga nuan, maya deka datai alai orang badu agi besumpah ngena nama Aku TUHAN ti idup, ti udah mai orang Israel pansut ari menua Ejip,

⁸tang sida deka besumpah ngena nama Aku TUHAN ti idup, ti udah mai orang Israel pansut ari menua ti di utara, enggau ari semua menua bukai ti udah alai Aku ngachirka sida. Udah nya baru sida deka diau di menua sida empu.”

⁹Ati aku balat tusah, lalu aku nyau getar-getar. Laban TUHAN, laban jaku Iya ti kudus, aku nyau baka orang ke mabuk, ke kelalu ngirup wain.

¹⁰Menua tu penuh laban orang ke enda tetap ati ngagai TUHAN. Pendiau sida jai, lalu sida ngena kuasa enggau jalai ti enda menyana. Ketegal sumpah TUHAN, menua tu ngulit lalu padang rumput nyau rangkai.

¹¹Ku TUHAN bejaku, “Sida nabi enggau sida imam endang enda nangika Allah Taala. Aku udah tepedaka sida ngereja penyai dalam Rumah Sembiang.

¹²Jalai ti ditengah sida deka lichin sereta petang. Aku deka ngasuh sida tesangkut lalu tetingkap. Aku deka ngasuh penusah ti besai ninggang sida. Maya sida diukum endang deka datai. Aku ti TUHAN udah bejaku.

¹³Aku bisi udah meda dosa bala nabi Samaria. Sida udah bejaku ngena nama Baal lalu udah mai nembiak Aku tesat.

¹⁴ Tang Aku udah meda sida nabi ke di Jerusalem ngereja utai ti jai agi ari nya: sida butang sereta nusui utai ti bula. Sida nulung orang ngereja penyalah, datai ke nadai siku orang nemu badu ngereja utai ti jai. Ba penemu Aku, semua sida nya jai magang baka orang Sodom enggau Gomorah.

¹⁵“Nya alai, tu meh utai ti disebut Aku TUHAN ti Pemadu Bekuasa, pasal sida nabi ke di Jerusalem: Aku deka meri sida utai ti pait nyadika pemakai sida enggau ai ti berachun nyadika ai irup sida, laban sida udah mai orang di serata menua tu enda nangika Allah Taala.”

¹⁶Ku TUHAN ti Pemadu Bekuasa bejaku ngagai orang Jerusalem, “Anang mendingka utai ti disebut sida nabi. Sida ngisi kita enggau pengadang ti bula. Sida madahka ngagai kita utai ti dikeluluka sida, ukai utai ti udah disebut Aku.

¹⁷Sida majak bejaku ngagai orang ke enggai mendingka utai ti disebut Aku, madahka sida deka mujur magang. Lalu sida bejaku ngagai genap iku orang ke kieh, madahka penusah ti besai nya enda negu sida.”

¹⁸Ku Aku bejaku, “Nadai siku ari bala nabi nya udah kala nemu resia runding TUHAN. Nadai siku sida bisi kala ninga tauka meretika pesan Iya, tauka mendingka, tauka ibuhka utai ti disebut Iya.

¹⁹Pengeringat TUHAN nya kabut besai, ribut biaubalai, ti deka mangka ba atas puchuk pala orang ke jai,

²⁰lalu ribut nya enda badu ngapa, datai ke udah ngereja semua utai ti deka dikereja Iya. Jemah ila baru nembiak TUHAN deka meretika utai nya enggau terang.”

²¹Ku TUHAN bejaku, “Aku nadai ngirumka bala nabi tu, tang taja pia, sida mupuk. Aku nadai meri sida pesan, tang sida majak bejaku dalam nama Aku.

²²Enti sida udah nemu resia ti dalam runding Aku, nya baru sida ulih madahka pesan Aku ngagai nembiak Aku, lalu ulih ngasuh sida ngelengkaka pengidup ti jai, enggau penyai ti dikereja sida.

²³“Aku tu Allah Taala ti bisi di semua endur, lalu ukai semina ba siti endur aja.

²⁴ Nadai orang ulih ngelalaika diri ari Aku. Kati kita enda nemu, Aku bisi di semua endur, di serega enggau di dunya?

²⁵Aku nemu utai ti udah disebut sida nabi ke bejaku bula dalam nama Aku, lalu ngumbai Aku udah meri sida pesan dalam mimpi.

²⁶Ni pengelama sida nabi tu deka nesatka bala nembiak Aku ngena pemula ti dikeluluka sida?

²⁷Sida ngumbai mimpi ti ditusui sida nya ulih ngasuh nembiak Aku enda ingatka Aku, baka aki ini sida ke enda ingatka Aku, lalu nitihka Baal.

²⁸Nabi ti udah bemimpi patut madahka utai nya semina mimpi aja, tang nabi ti udah ninga pesan Aku patut madahka pesan nya enggau ati ti tetap. Jerami enggau gandum endang enda sebaka.

²⁹Jaku Aku baka api, enggau baka tukul ti ngeredakka batu.

³⁰Aku ngelaban sida nabi ke ngambi jaku ari pangan diri, lalu madahka jaku nya pesan Aku.

³¹Aku mega ngelaban sida nabi ke nyebut jaku diri empu, lalu ngumbai jaku nya datai ari Aku.

³²Pendingka utai ti disebut Aku ti TUHAN! Aku ngelaban sida nabi ke madahka mimpi ti bula. Sida madahka mimpi nya, lalu nesatka nembiak Aku ngena pemula enggau jaku sida ke temegah ngapa. Aku nadai ngirumka sida, tauka ngasuh sida bejalai, lalu sida enda ulih sekali-kali nulung nembiak Aku. Aku ti TUHAN, udah bejaku.”

³³Ku TUHAN bejaku ngagai aku, “Jeremiah, lebuh siku ari bala nembiak Aku, tauka siku nabi, tauka siku imam nanya ngagai nuan, ‘Nama pesan TUHAN?’ nuan enda tau enda nyebut, ‘Nuan tu ma ti berat[25] ke TUHAN, lalu Iya deka muai nuan.’

³⁴Enti bala nembiak Aku, tauka siku nabi, tauka siku imam bisi ngena leka jaku ‘Ma berat TUHAN,’ Aku deka ngukum sida enggau sida sebilik.

³⁵Tang genap iku sida patut nanya ngagai pangan diri, enggau ngagai kaban belayan sida munyi tu, ‘Nama saut ti udah diberi TUHAN? Nama utai ti udah disebut TUHAN?’

³⁶Nya alai sida enda tau agi ngena leka jaku ‘Ma berat TUHAN,’ laban enti orang ari bala sida nya bisi ngena leka jaku nya, Aku deka ngasuh pesan Aku nyadi ma ti amat berat ba sida. Orang mayuh udah nyarutka jaku Allah Taala sida, Allah Taala ti idup, TUHAN ti Pemadu Bekuasa.

³⁷Jeremiah, tanyaka ngagai sida nabi, ‘Nama saut ti udah diberi TUHAN ngagai kita? Nama utai ti udah disebut TUHAN?’

³⁸Lalu enti sida enda ngasika jaku Aku, lalu ngena leka jaku ‘Ma berat TUHAN,’ padahka ngagai sida,

³⁹Aku tetap deka nyengkau[26] sida, lalu nikauka sida jauh ari Aku, enggau ari nengeri ti udah diberi Aku ngagai sida enggau ngagai aki ini sida.

⁴⁰Aku deka ngasuh sida ditinggang pemalu sereta dipechat ti deka dikingatka belama iya.”