Read Iban Jeremiah 24 Bible Online

Jeremiah 24 - Iban bible

Jeremiah 24

¹ TUHAN ngayanka ngagai aku dua iti bakul buah ara ti diengkah di mua Rumah Sembiang. (Utai tu nyadi udah bekau Raja Nebukadnesar nabanka Raja Jehoiakin anak Raja Jehoiakim menua Judah nyadi orang tangkap ari Jerusalem ngagai menua Babilon, sama enggau bala tuai orang Judah, bala tukang tempa, enggau orang ke landik gawa.)

²Bakul ti keterubah ngundan buah ara ti manah, buah ti dulu mansau. Bakul ti siti ngundan buah ara ti jai, ti enda ulih diempa agi.

³Udah nya TUHAN lalu bejaku ngagai aku, “Jeremiah, nama utai ti dipeda nuan?” Aku lalu nyaut, “Buah ara. Buah ti manah nya amat manah, lalu buah ti jai nya amat jai, enda ulih diempa agi.”

⁴Nya alai TUHAN lalu bejaku ngagai aku,

⁵“Aku TUHAN, ti Allah Taala ke disembah orang Israel, ngira orang ke udah ditabanka ngagai menua Babilon nya sebaka enggau buah ara ti manah tu, lalu Aku deka nelap enggau sida.

⁶Aku deka ngibun sida, lalu mai sida pulai baru ngagai menua tu. Aku deka nirika sida, lalu enda ngerubuh sida. Aku deka nanam sida, lalu enda enchabut sida.

⁷Aku deka meri sida ati ti keran deka nemu Aku ti TUHAN. Nya baru sida deka nyadi nembiak Aku, lalu Aku deka nyadi Allah Taala sida, laban sida deka pulai baru ngagai Aku enggau pengabis ati sida.

⁸“Nyadi pasal Raja Sedekiah menua Judah, bala orang politik ke ngelingi iya, enggau semua orang Jerusalem ti bukai, ti udah diau di menua tu tauka udah pindah ngagai menua Ejip, Aku ti TUHAN, deka ngaga semua sida nya nyadi baka buah ara ti enda ulih diempa agi.

⁹Aku deka ngasuh penusah ti besai ninggang sida, datai ke semua bansa di dunya tu deka takut. Orang deka beduan sida, ketawaka sida, ngeleseka sida, lalu ngaga nama sida nyadika leka jaku sumpah[27] di semua endur alai Aku ngachirka sida.

¹⁰Aku deka ngasuh perang, keberuran, enggau penyakit ninggang sida, datai ke nadai siku sida deka tinggal di menua ti udah diberi Aku ngagai sida enggau ngagai aki ini sida.”