Read Iban Jeremiah 25 Bible Online

Jeremiah 25 - Iban bible

Jeremiah 25

¹ Dalam taun ti keempat Jehoiakim anak Josiah nyadi raja menua Judah, aku bisi nerima siti pesan ari TUHAN pasal semua orang Judah. (Tu taun ti keterubah Nebukadnesar nyadi raja menua Babilon.)

²Ku aku bejaku ngagai semua orang Judah enggau orang ke diau di Jerusalem,

³“Dalam pengelama dua puluh tiga taun, berengkah ari taun ti ketiga belas Josiah anak Amon nyadi raja menua Judah nyentuk ngagai sehari tu, TUHAN udah bejaku ngagai aku, lalu aku nadai kala enda madahka utai ti disebut Iya. Tang kita enda bedulika nya.

⁴Kita enggai mending tauka ibuh, taja pen TUHAN udah majak ngirumka bala nembiak Iya, iya nya sida nabi, ngagai kita.

⁵Sida nabi ngasuh kita nguingka diri ari jalai pengidup ti jai, enggau ari penyai ti dikereja kita, ngambika kita ulih mengkang idup di menua ti udah diberi TUHAN ngagai kita enggau ngagai aki ini kita nyadika pesaka kita.

⁶Sida nagang kita besembah enggau betuaika petara bukai, sereta nagang kita nyungkak pengeringat TUHAN besembahka engkeramba ti udah digaga kita. Enti kita udah ngasika TUHAN, Iya tentu enda ngukum kita.

⁷Tang TUHAN Empu madahka kita enggai mendingka Iya, tang nyungkak Iya ringat ngena pengawa kita ke besembahka engkeramba, lalu minta diri diukum Iya.

⁸“Nya alai, laban kita enggai mendingka Iya, TUHAN ti Pemadu Bekuasa bejaku,

⁹‘Aku deka mesanka semua bansa ari utara enggau nembiak Aku, Raja Nebukadnesar menua Babilon. Aku deka ngasuh sida nyerang menua Judah enggau semua orang ke diau di menua nya, sereta nyerang semua bansa ti berimbai enggau menua Judah. Aku deka ngerusak bansa tu, enggau bansa ti semak iya, lalu ngaga menua sida nyadi tembawai belama iya, ngambika sida jai dipeda, sereta ngasuh ati geli. Aku ti TUHAN, udah bejaku.

¹⁰ Aku deka madamka panjung gaga ati sida, enggau munyi orang ke rami ngintu gawai tikah. Minyak ke lampu sida deka abis, lalu gandum sida pen deka mega abis.

¹¹ Semua menua tu deka nyadi tembawai magang, lalu jai dipeda, lalu semua bansa ti ngelingi menua tu deka betuaika raja menua Babilon dalam pengelama tujuh puluh taun.

¹²Udah bekau nya, Aku deka ngukum Babilon enggau raja iya, ketegal dosa sida. Aku deka ngerusak menua nya, lalu ngaga iya nyadi tembawai belama iya.

¹³Aku deka ngukum Babilon ngena semua penusah besai ti diasuh Aku ninggang semua bansa lebuh Aku bejaku ngena Jeremiah - semua penusah ti ditulis dalam bup tu.

¹⁴Aku deka malas orang Babilon ketegal utai ti udah dikereja sida, lalu mayuh bansa enggau raja ti bekuasa deka ngaga sida nyadi ulun.’ ”

¹⁵Ku TUHAN Allah Taala ke disembah orang Israel bejaku ngagai aku, “Tu mangkuk wain ti penuh laban pengeringat Aku. Bai mangkuk tu ngagai semua bansa ti diasuh Aku gusung nuan, lalu asuh sida ngirup ari mangkuk tu.

¹⁶Lebuh sida ngirup ari mangkuk tu, sida deka bejalai guir-guir, lalu nyadi gila laban perang ti diasuh Aku nuntung sida.”

¹⁷Nya alai aku lalu ngambi mangkuk nya ari jari TUHAN, meri mangkuk nya ngagai semua bansa ti diasuh TUHAN gusung aku, lalu ngasuh sida ngirup ari mangkuk nya.

¹⁸Jerusalem enggau semua nengeri di menua Judah, sereta enggau bala raja enggau bala tuai menua nya, bela diasuh ngirup ari mangkuk nya magang, ngambika semua nengeri di menua nya nyadi menua puang, lalu jai gaya dipeda, sereta ngambika orang ngena nama sida nyadika leka jaku sumpah,[28] baka ke dikereja sida diatu.

¹⁹Tu list nama semua sida ti bukai ti enda tau enda ngirup ari mangkuk nya: raja menua Ejip, bala pemesai iya enggau bala tuai bansa; semua orang Ejip enggau semua orang bansa bukai ke diau di menua Ejip; semua raja di menua Us; semua raja di nengeri orang Pilistin, iya nya raja nengeri Askelon, Gasa, Ekron, enggau orang ke agi idup di Asdot; semua orang Edom, Moap, enggau Amon; semua raja Tire enggau Sidon; semua raja ke semua menua ti ba tebing Tasik Tengah; nengeri Dedan, Tema, enggau Bus; semua orang ke netak buk diri pandak; semua raja di menua Arabia; semua raja ke raban bansa orang ke diau di menua puang; semua raja di Simri, Elam, enggau Media; semua raja ti di utara, ke jauh enggau ke semak, betangkan-tangkan. Semua bansa di dunya tu enda tau enda ngirup ari mangkuk nya. Ke penudi iya, raja menua Babilon deka mega ngirup ari mangkuk nya.

²⁷Udah nya TUHAN bejaku ngagai aku, “Padahka ngagai orang mayuh, Aku TUHAN ti Pemadu Bekuasa, ti Allah Taala ke disembah orang Israel, deka ngasuh sida ngirup datai ke sida mabuk lalu mutah, datai ke sida rebah, lalu enda ulih angkat agi, laban perang ti diasuh Aku ninggang sida.

²⁸Lalu enti sida enggai ngambi mangkuk nya ari jari nuan, lalu enggai ngirup ari nya, nuan enda tau enda madahka ngagai sida, TUHAN ti Pemadu Bekuasa udah bejaku madahka sida enda tau enda ngirup ari mangkuk nya.

²⁹Aku deka belabuh ngerusak berengkah ari nengeri Aku Empu. Kati sida ngumbai diri enda kena ukum? Sida endang deka diukum, laban Aku deka ngasuh munsuh nyerang semua orang di dunya tu. Aku TUHAN ti Pemadu Bekuasa, udah bejaku.

³⁰“Nuan Jeremiah, enda tau enda madahka semua utai ti udah disebut Aku. Nuan enda tau enda madahka ngagai bala orang nya, ‘TUHAN deka merakka nyawa Iya ari serega lalu meletup munyi guntur ari serega. Iya deka merakka nyawa Iya ngelaban bala nembiak Iya. Iya deka manjung munyi orang ke ngindik buah anggur. Semua orang di dunya tu deka ninga Iya,

³¹lalu munyi nyawa Iya deka belauh ngagai tisi dunya. TUHAN deka bedawaka semua bansa. Iya deka nyara semua bansa lalu munuh orang ke jai. TUHAN udah bejaku.’ ”

³²TUHAN ti Pemadu Bekuasa madahka penusah ti besai deka nuntung siti-siti bansa betangkan-tangkan, lalu kabut besai nyau betatam ba tisi dunya.

³³Lebuh maya nya ila, bangkai sida ke udah dibunuh TUHAN deka ngachir di serata dunya. Orang nadai ngulitka sida, lalu nadai mega orang ngangkut lalu nguburka sida. Bangkai sida deka betegaring ba tanah baka tugung tai.

³⁴Kita ke tuai bansa, ti nyadi pengibun nembiak Aku, nyabak meh kita. Nyabak enggau nyawa ti inggar duie-duie! Ngulit lalu baringka diri malai amau. Maya udah datai alai kita deka dibunuh,[29] lalu kita deka disayat baka jelu bedus.[30]

³⁵Kita enda ulih ngerarika diri.

³⁶Kita bedemuh lalu nyabak tusah ati, laban TUHAN, ketegal pengeringat Iya, udah ngerusak bansa kita, lalu ngaga menua kita nyadi tembawai.

³⁸TUHAN udah ninggalka nembiak Iya[31] baka singa ti ninggalka lubang iya. Perang enggau pengeringat TUHAN udah ngubah menua tu nyadi menua puang.