Read Iban Jeremiah 26 Bible Online

Jeremiah 26 - Iban bible

Jeremiah 26

¹ Enda lama udah bekau Jehoiakim anak Josiah nyadi raja menua Judah,

²TUHAN bejaku ngagai aku, “Alai nuan bediri ba tengah laman Rumah Sembiang, lalu padahka semua utai ti diasuh Aku sebut nuan ngagai orang ke datai besembiang dia ari semua nengeri menua Judah. Anang enda nyebut semua utai nya,

³nyangka orang mayuh deka mending lalu ngelengkaka ulah sida ke jai. Enti sida ngelengkaka ulah sida ke jai, nya baru Aku deka ngubah runding Aku lalu enda nyadi ngerusak sida ketegal semua pengawa sida ke jai.”

⁴Tu jaku ti diasuh TUHAN sebut aku ngagai orang mayuh, “Aku ti TUHAN, udah madahka kita enda tau enda ngasika Aku, nitihka ajar ti udah diberi Aku ngagai kita,

⁵sereta mendingka jaku bala nembiak Aku, iya nya sida nabi, ke seruran dikirumka Aku ngagai kita. Kita nadai udah kala ngasika jaku ti disebut sida.

⁶ Enti kita majak enda ngasi, Aku deka ngereja ngagai Rumah Sembiang tu baka ke udah dikereja Aku ngagai Siloh,[32] lalu semua bansa di dunya tu deka ngena nama nengeri tu nyadika leka jaku sumpah.” [33]

⁷Sida imam, sida nabi enggau semua orang mayuh bela ninga aku nyebut jaku nya dalam Rumah Sembiang,

⁸lalu lebuh aku baru udah tembu nyebut semua utai ti diasuh TUHAN sebut aku, sida lalu nangkap aku lalu manjung, “Nuan patut dibunuh ketegal utai tu!

⁹Nama kebuah nuan nyebut dalam nama TUHAN, madahka Rumah Sembiang tu deka nyadi baka Siloh, lalu madahka nengeri tu deka dirusak, lalu enda agi diuan mensia?” Udah nya orang mayuh lalu ngelingi aku.

¹⁰Lebuh bala tuai orang Judah ninga pasal utai ti udah nyadi, sida lalu beguai-guai mansang ari istana ngagai Rumah Sembiang, lalu nudukka diri ba Pintu Ti Baru.

¹¹Udah nya sida imam enggau sida nabi lalu bejaku ngagai bala tuai bansa, enggau ngagai orang mayuh, “Orang tu patut diukum bunuh, laban iya udah bejaku ngelaban nengeri kitai. Kita empu udah ninga iya bejaku.”

¹²Udah nya aku lalu bejaku, “TUHAN Empu udah ngirumka aku, ngasuh aku bejaku ngelaban Rumah Sembiang, enggau ngelaban nengeri tu, munyi ti didinga kita.

¹³Nya alai ubah pendiau enggau ulah kita, lalu ngasika TUHAN Allah Taala kita. Enti kita ngereja nya, nya baru Iya deka ngubah runding Iya lalu enda nyadi ngerusak kita.

¹⁴Nyadi pasal aku empu, aku tu ba jari kita! Kereja aja meh utai ti patut ku ati kita.

¹⁵Tang kita enda tau enda nemu: enti kita munuh aku, kita enggau orang di nengeri tu deka salah munuh orang ke nadai penyalah, laban TUHAN Empu ti udah ngasuh aku meri jaku tangkan tu ngagai kita.”

¹⁶Udah nya bala tuai enggau orang mayuh lalu bejaku ngagai bala imam sereta enggau ngagai bala nabi, “Orang tu bejaku ngagai kitai dalam nama TUHAN Allah Taala kitai. Iya enda patut dibunuh.”

¹⁷Udah nya, sekeda tuai bansa bediri lalu bejaku ngagai orang mayuh ke begelumu dia,

¹⁸ “Lebuh Hesekiah nyadi raja menua Judah, nabi Mikah ari Moreset madahka ngagai semua orang mayuh utai ti udah disebut TUHAN ti Pemadu Bekuasa, ‘Sion deka dichangkul baka padang. Jerusalem deka nyadi tembawai, lalu bukit ti alai Rumah Sembiang bediri deka nyadi utan.’

¹⁹Raja Hesekiah enggau orang Judah lalu enda nyadi munuh Mikah. Hesekiah nangika TUHAN, lalu nguji minta diri dikerinduka Iya. Lalu TUHAN ngubah runding Diri pasal penusah ti besai ti diasuh Iya ninggang sida. Tang diatu kitai nyau deka ngasuh siti penusah ti besai ninggang kitai empu.” (

²⁰Siku agi orang bejaku, iya nya Uriah anak Semaiah ari Kiriat-jearim. Iya bejaku dalam nama TUHAN ngelaban nengeri tu, enggau ngelaban bansa kitai baka ke dikereja Jeremiah.

²¹Lebuh Raja Jehoiakim enggau bala soldadu iya, enggau bala pemesai ninga jaku Uriah, raja lalu nguji ngasuh orang munuh Uriah. Tang Uriah ninga pasal nya, lalu rari abis ati ngagai menua Ejip.

²²Tang Raja Jehoiakim ngasuh Elnatan anak Akbor enggau sekeda orang bukai mansang ngagai menua Ejip ngambi Uriah pulai.

²³Sida mai iya pulai ngagai Raja Jehoiakim, lalu Raja Jehoiakim ngasuh orang munuh iya, lalu ngasuh sida nguburka iya ba kubur orang mayuh.)

²⁴Tang laban aku disukung Ahikam anak Sapan, aku enda diserahka ngagai orang mayuh, lalu aku enda kena bunuh.