Read Iban Jeremiah 27 Bible Online

Jeremiah 27 - Iban bible

Jeremiah 27

¹ Apin lama udah bekau Sedekiah anak Josiah nyadi raja menua Judah, TUHAN ngasuh aku

²ngaga siti kungkung ke aku empu ari tali ti digaga ari kulit jelu enggau sengkar kayu, lalu ngasuh aku ngengkahka utai nya ba rekung aku empu.

³Udah nya TUHAN ngasuh aku ngirumka siti pesan[34] ngagai raja menua Edom, menua Moap, Amon, Tire enggau Sidon nengah bala pengari perintah sida ke udah datai di Jerusalem deka betemu enggau Raja Sedekiah.

⁴TUHAN ti Pemadu Bekuasa, ti Allah Taala ke disembah orang Israel ngasuh aku bejaku ngagai sida, ngasuh sida madahka ngagai raja sida empu utai ti udah disebut TUHAN:

⁵“Ngena kuasa Aku ti besai enggau pengering Aku, Aku udah ngaga dunya, mensia, enggau semua macham jelu ti diau di dunya, lalu Aku meri utai nya ngagai barang sapa orang ke dipilih Aku.

⁶ Aku tu ti udah ngengkahka semua bansa tu di baruh kuasa nembiak Aku, Raja Nebukadnesar menua Babilon. Indah jelu babas deh diasuh Aku betuaika iya.

⁷Semua bansa deka betuaika iya, lalu sida deka betuaika anak iya, enggau uchu iya nyentuk ngagai maya bansa iya empu alah. Udah nya baru bansa nya deka betuaika mayuh bengkah bansa ti bekuasa, enggau bala raja ti besai.

⁸“Tang enti bansa tauka perintah enggai betuaika iya, Aku deka ngukum bansa nya ngena perang, keberuran, enggau penyakit datai ke Aku udah nejuka Nebukadnesar ngerusak bansa nya abis lengis.

⁹Anang mendingka bala nabi kita, tauka sida ke ngumbai diri nemu madahka utai ti deka nyadi jemah ila, nemuka ngena mimpi, tauka ngangauka roh orang ke udah mati, tauka ngena pengawa keramat. Semua sida nya nagang kita betuaika raja menua Babilon.

¹⁰Sida nipu kita, lalu deka ngasuh kita ditabanka ngagai menua ti jauh ari menua kita empu. Aku deka muru kita, lalu kita deka dirusak.

¹¹Tang enti bansa nunduk ngagai raja menua Babilon, lalu betuaika iya, nya baru Aku deka nejuka bansa nya diau di menua sida empu, ngambika sida bumai lalu diau dia. Aku ti TUHAN udah bejaku.”

¹²Aku udah mega nyebut utai nya ngagai Raja Sedekiah menua Judah, “Nunduk ngagai raja menua Babilon, betuaika iya enggau bala nembiak iya, ngambika nuan idup.

¹³Nama guna nuan enggau bala nembiak nuan mati beperang, tauka mati keberuran, tauka mati laban penyakit? Nya meh utai ti dipadahka TUHAN deka nyadi ba bansa ti enggai betuaika raja menua Babilon.

¹⁴Anang mendingka sida nabi ke nagang nuan nyerahka diri ngagai raja nya. Sida nabi nya nipu kita.

¹⁵TUHAN Empu udah madahka Iya nadai ngirumka sida, sereta madahka sida ngemulaka nuan dalam nama Iya. Nya alai Iya deka muru nuan, lalu nuan enggau bala nabi ke ngemulaka nuan deka dibunuh.”

¹⁶Udah nya aku madahka ngagai sida imam enggau orang mayuh utai ti udah disebut TUHAN: “Anang mendingka sida nabi ke madahka, enda lama da agi pesaka Rumah Sembiang deka dibai pulai baru ari Babilon. Sida nya ngemulaka kita.

¹⁷Anang mendingka sida! Nunduk ngagai raja menua Babilon, nya baru kita deka idup! Nama kebuah ngasuh nengeri tu nyadi tembawai?

¹⁸Enti sida nya endang amat nabi, lalu enti sida bisi pesan ari Aku, awakka sida minta Aku TUHAN ti Pemadu Bekuasa, nagang pesaka ti agi bisi dalam Rumah Sembiang enggau di istana raja ditabanka ngagai menua Babilon.” (

¹⁹Lebuh Raja Nebukadnesar nabanka Raja Jehoiakin anak Raja Jehoiakim menua Judah, enggau orang ke tinggi pangkat ari menua Judah enggau ari Jerusalem ngagai menua Babilon, iya ninggalka tiang ti besai, tangki temaga, kerita tarit, enggau sekeda reta tengkira Rumah Sembiang.)

²¹“Pendingka utai ti disebut Aku TUHAN ti Pemadu Bekuasa, ti Allah Taala ke disembah orang Israel, pasal reta tengkira ti ditinggalka dalam Rumah Sembiang, enggau di istana raja di Jerusalem.

²²Utai nya deka ditabanka ngagai menua Babilon, lalu deka mengkang din nyentuk ngagai maya Aku deka ibuhka sida. Udah nya baru Aku deka mai utai nya pulai baru, lalu mulaika sida ngagai endur tu. Aku ti TUHAN udah bejaku.”