Read Iban Jeremiah 28 Bible Online

Jeremiah 28 - Iban bible

Jeremiah 28

¹ Dalam taun nya mega,[35] iya nya taun ti keempat Sedekiah nyadi raja, dalam bulan ti kelima, Hananiah anak Asur, siku nabi ari nengeri Gibeon, bejaku ngagai aku dalam Rumah Sembiang. Di mua bala imam, enggau di mua orang mayuh, iya madahka ngagai aku

²pasal TUHAN ti Pemadu Bekuasa, ti Allah Taala ke disembah orang Israel ti udah nyebut, “Aku udah ngerusak kuasa raja menua Babilon.

³Dalam kandang dua taun Aku deka mai pulai baru ngagai endur tu semua reta tengkira Rumah Sembiang ti udah ditabanka Raja Nebukadnesar ngagai menua Babilon.

⁴Aku deka mega mai pulai baru Raja Jehoiakin anak Jehoiakim menua Judah, sama enggau semua orang Judah ke kena buai ngagai menua Babilon. Sigi amat, Aku endang deka ngerusak kuasa raja menua Babilon. Aku ti TUHAN, udah bejaku.”

⁵Udah nya, di mua bala imam enggau di mua semua orang mayuh ke bediri dalam Rumah Sembiang, aku lalu nyebut ngagai Hananiah:

⁶“Manah amat nya! Aku ngarapka TUHAN deka ngereja nya! Aku endang amat ngarapka Iya deka ngamatka jaku ti benabi ti disebut nuan nya, lalu mai pulai kitu ke baru ari menua Babilon semua reta tengkira Rumah Sembiang, enggau semua orang ke udah ditangkap lalu ditabanka munsuh.

⁷Tang pendingka utai ti disebut aku ngagai nuan, enggau ngagai orang mayuh.

⁸Sida nabi ke bejaku kelia, sebedau rambau tua, madahka perang, keberuran enggau penyakit deka ninggang mayuh bengkah bansa, enggau perintah ti bekuasa.

⁹Tang nabi ke madahka pemaik deka nyadi, semina deka dikumbai nabi ke amat udah dikirumka TUHAN, lebuh utai ti ditujum iya dikamatka.”

¹⁰Hananiah lalu ngambi kungkung nya ari rekung aku lalu matahka iya

¹¹lalu nyebut di mua semua orang mayuh, “TUHAN udah bejaku madahka tu meh gaya Iya deka matahka kungkung ti udah diengkahka Raja Nebukadnesar ba rekung semua bansa, lalu TUHAN deka ngereja nya dalam kandang dua taun.” Aku lalu mupuk.

¹²Apin tentu lama udah bekau nya, TUHAN ngasuh aku

¹³mansang ngagai Hananiah lalu madahka ngagai iya, “TUHAN udah bejaku, madahka nuan nyangka ulih matahka kungkung ti digaga ari kayu, tang Iya[36] deka nganti kungkung kayu nya enggau kungkung besi.

¹⁴TUHAN ti Pemadu Bekuasa, ti Allah Taala ke disembah orang Israel, udah madahka Iya deka ngengkahka kungkung besi ba semua bansa, lalu sida deka betuaika Raja Nebukadnesar menua Babilon. Indah jelu babas deh deka diasuh TUHAN betuaika Nebukadnesar.”

¹⁵Aku lalu madahka jaku nya ngagai Hananiah, “Pendingka tu ulih nuan Hananiah! TUHAN nadai ngirumka nuan, lalu nuan udah ngasuh orang mayuh tu arapka utai ti bula.

¹⁶Nya alai TUHAN Empu madahka Diri deka muai nuan. Sebedau ujung taun tu, nuan deka mati laban nuan udah mai orang mayuh angkat ngelaban TUHAN.”

¹⁷Dalam bulan ti ketujuh taun nya, Hananiah lalu mati.