Read Iban Jeremiah 29 Bible Online

Jeremiah 29 - Iban bible

Jeremiah 29

¹ Aku nulis sepuchuk surat ngagai bala imam, bala nabi, bala tuai orang mayuh, enggau ngagai semua sida ti bukai ti udah ditabanka Nebukadnesar nyadi orang tangkap ari Jerusalem ngagai menua Babilon.

²Aku nulis surat nya udah bekau Raja Jehoiakin, indai iya, bala pemesai istana, bala tuai orang Judah enggau bala tuai orang ke diau di Jerusalem, orang ke landik ngukir, enggau orang ke landik gawa, dibuai ngagai menua Babilon.

³Aku nyuaka surat nya ngagai Elasah anak Sapan enggau ngagai Gemariah anak Hilkiah, ke diasuh Raja Sedekiah menua Judah betemu enggau Raja Nebukadnesar menua Babilon. Baka tu ku jaku ti dalam surat nya:

⁴“TUHAN ti Pemadu Bekuasa, ti Allah Taala ke disembah orang Israel bejaku ngagai semua orang ke dikemendarka Iya ditabanka Nebukadnesar nyadi orang tangkap ari Jerusalem ngagai Babilon:

⁵‘Dirika rumah lalu ngentapka diri. Tumbuhka kebun lalu empa utai ti ditanam kita dalam kebun nya.

⁶Bebini belaki lalu beranak. Udah nya, awakka bala anak kita bebini belaki, ngambika sida mega bisi anak. Pemayuh tubuh kita enda tau enda nambah-menambah, ukai kurang.

⁷Bekereja kita ke penguntung nengeri ti udah alai Aku muai kita. Besampi ngagai Aku ngarika sida, laban enti sida nyadi kaya-raja, kita empu deka mega nyadi kaya-raja.

⁸Aku ti TUHAN Allah Taala ke disembah orang Israel meri kita jaku tangkan: anang nejuka bala nabi enggau orang ke betilitka nasit ke begulai enggau kita, nipu kita, lalu anang mendingka mimpi sida.[37]

⁹Sida madahka utai ti bula ngagai kita dalam nama Aku. Aku nadai ngirumka sida. Aku TUHAN ti Pemadu Bekuasa udah bejaku.’

¹⁰ “Ku TUHAN bejaku, ‘Udah lepas tujuh puluh taun nya ila, Aku deka nemuai ngagai kita, lalu ngamatka semaya Aku enggau kita, lalu mai kita pulai baru ngagai menua tu.

¹¹Laban Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.

¹²Nya baru kita deka ngangauka Aku, datai lalu besampi ngagai Aku, lalu Aku deka ninga kita.

¹³ Lebuh kita ngiga Aku, kita deka tetemuka Aku. Enti kita ngiga Aku enggau pengabis ati kita,

¹⁴kita deka tetemuka Aku,[38] lalu Aku deka mai kita pulai baru ngagai menua kita empu. Aku deka ngempuruka kita ari semua menua, enggau ari semua endur ti udah alai Aku muru kita, lalu Aku deka mai kita pulai baru ngagai menua ti udah ditinggalka kita lebuh Aku muai kita ngagai menua bukai. Aku ti TUHAN udah bejaku.’

¹⁵“Kita madahka TUHAN udah meri kita nabi di menua Babilon.

¹⁶Pendingka utai ti disebut TUHAN pasal raja ke megai perintah di menua ti udah diperintah David, enggau pasal orang di nengeri tu, iya nya, bala kaban belayan kita empu ti enda ditabanka nyadi orang tangkap sama enggau kita.

¹⁷Ku TUHAN ti Pemadu Bekuasa bejaku, ‘Aku ngasuh perang, keberuran, enggau penyakit ninggang sida, lalu Aku deka ngaga sida nyadi baka buah ara ti kelalu buruk lalu enda ulih diempa.

¹⁸Aku deka begagaika sida ngena perang, keberuran, enggau penyakit, lalu semua bansa di dunya tu deka gelika utai ti dipeda sida. Ba genap iti endur alai Aku ke ngachirka sida, orang deka geli sereta takut meda utai ti udah nyadi ba sida. Orang deka beduan sida, lalu ngena nama sida nyadika leka jaku sumpah.[39]

¹⁹Utai tu deka nyadi ba sida laban sida enda ngasika pesan ti seruran dikirumka Aku ngagai sida nengah bala nembiak Aku, iya nya sida nabi. Sida enggai mending.

²⁰Semua kita ke udah dibuai Aku ngagai menua Babilon, pendingka utai ti disebut Aku ti TUHAN.’

²¹“TUHAN ti Pemadu Bekuasa, ti Allah Taala ke disembah orang Israel, udah bejakuka pasal Ahap anak Kolaiah enggau Sedekiah anak Maseiah, ke madahka utai ti bula ngagai kita dalam nama TUHAN. TUHAN udah madahka Diri deka nyerahka sida ngagai jari Raja Nebukadnesar menua Babilon, ti deka munuh sida di mua kita.

²²Lebuh orang ke ditabanka nyadi orang tangkap ari Jerusalem ngagai Babilon deka nyumpah orang, sida deka nyebut, ‘Awakka TUHAN ngereja nuan baka Iya ti ngereja Sedekiah seduai Ahap, ke dipanggang raja Babilon idup-idup!’

²³Nya meh pengujung sida laban sida udah salah ngereja dosa ti besai - sida udah butang enggau bini pangan diri, lalu udah nusui utai ti bula dalam nama TUHAN. Utai tu ngelaban peneka TUHAN. Iya nemu utai ti udah dikereja sida, lalu Iya deka besaksi ngelaban sida.[40] TUHAN udah bejaku.”

²⁴TUHAN ti Pemadu Bekuasa, ti Allah Taala ke disembah orang Israel, meri aku siti pesan ke Semaiah ari Nehelam, ti udah ngirumka surat dalam nama iya empu ngagai semua orang ke diau di Jerusalem, enggau ngagai Imam Sepaniah anak Maseiah, enggau ngagai semua imam ti bukai. Dalam surat nya Semaiah nulis ngagai Sepaniah munyi tu:

²⁶“TUHAN ngasuh nuan nyadi imam nganti Jehoiada, lalu diatu nuan nyadi tuai pemesai[41] dalam Rumah Sembiang. Pengawa nuan nya nentuka genap iku orang ke gila, ke ngaga diri nyadi nabi, ditanchang ngena rantai, sereta dikungkung ngena kungkung besi.

²⁷Nama kebuah nuan enda ngereja nya ngagai Jeremiah ke datai ari Anatot, ti udah bejaku nyadi nabi ngagai orang mayuh?

²⁸Iya enda tau enda ditagang, laban iya madahka ngagai orang di Babilon, sida deka lama nyadi orang tangkap dia, lalu patut nirika rumah tangga, ngentapka diri, bekebun, lalu makai utai ti ditanam sida.”

²⁹Sepaniah macha surat nya ngagai aku.

³⁰TUHAN lalu ngasuh aku

³¹ngirumka pesan tu ngagai semua orang tangkap ti diau di Babilon pasal Semaiah: “Aku ti TUHAN deka ngukum Semaiah enggau semua peturun iya. Aku nadai ngirumka iya ngagai kita, tang iya bejaku ngagai kita lalu ngaga diri nyadi nabi, lalu iya ngasuh kita arapka utai ti bula. Iya nadai peturun ba bala kita jemah ila. Iya enda ulih idup lalu meda utai ti manah ti deka dikereja Aku ke bala nembiak Aku, laban iya udah ngasuh sida angkat ngelaban Aku. Aku ti TUHAN, udah bejaku.”