Read Iban Jeremiah 3 Bible Online

Jeremiah 3 - Iban bible

Jeremiah 3

¹Ku TUHAN bejaku, “Enti laki muai bini, lalu bini iya ninggalka iya lalu jadi enggau lelaki bukai, laki iya enda tau ngambi bini iya pulai baru. Utai tu deka ngamahka menua tu. Tang, Israel, nuan mayuh ambai, lalu diatu nuan deka mulaika diri ngagai Aku baru!

²Uji nuan engkadah ngagai tuchung bukit. Kati nuan bisi tetemuka endur alai nuan ti nadai udah ngulah diri baka indu sundal? Nuan nganti ambai nuan ba sebelah tisi jalai, baka orang Arab ke ngipa orang ke deka diamuk iya di menua puang. Nuan udah ngamahka menua ngena pengawa nuan ti nyundal.

³Nya kebuah hari enda diasuh ujan, lalu hari enda ujan lebuh musin bungai. Indah gamal nuan deh baka gamal indu sundal. Nuan tu nadai nemu malu.

⁴“Lalu diatu nuan nyebut ngagai Aku, ‘Nuan Apai aku, lalu Nuan udah rinduka aku kenyau ari aku agi mit.

⁵Nuan enggai seruran ringat. Nuan enggai pedis ati ngagai aku belama iya.’ Israel, baka nya ku jaku nuan, tang nuan majak ngereja semua penyai enggau naka ulih nuan.”

⁶ Lebuh Josiah nyadi raja, TUHAN bejaku ngagai aku, “Kati nuan bisi udah meda utai ti dikereja Israel, indu ke enda tetap ati nya? Iya udah ninggalka Aku, lalu ba genap igi munggu enggau di baruh genap pun kayu, iya udah ngulah diri baka indu sundal.

⁷Aku ngumbai iya deka tetap ati lalu pulai baru ngagai Aku lebuh iya udah ngereja semua utai nya. Tang iya enda pulai baru ngagai Aku, lalu menyadi indu iya, Judah ti enda tetap ati, meda semua utai nya.

⁸Judah mega meda Aku nyarakka Diri ari Israel, lalu muai iya, laban iya udah ninggalka Aku, lalu udah nyadi indu sundal. Tang Judah, menyadi indu Israel ti enda tetap ati nya, enda nemu takut, lalu iya mega nyundal

⁹lalu enda nemu malu ke ulah diri. Iya ngamahka menua, lalu iya butang laban iya nyembah batu enggau kayu.

¹⁰Lalu udah bekau semua utai tu, Judah, menyadi Israel ke butang, semina ngeluluka diri pulai baru ngagai Aku. Ati iya endang enda betul. Aku ti TUHAN, udah bejaku.”

¹¹Udah nya TUHAN lalu madahka ngagai aku, taja pen Israel udah ninggalka Iya, Israel udah ngayanka diri manah agi ari Judah ke butang.

¹²Iya ngasuh aku mansang lalu madahka ngagai Israel, “Israel ti enda tetap ati, pulai nuan baru ngagai Aku. Aku penuh laban pengasih, lalu Aku enda ringat. Aku enda ringat ngagai nuan belama iya.

¹³Semina ngaku diri udah salah, lalu udah ngelaban TUHAN Allah Taala nuan. Nuan enda tau enda ngaku diri udah nyerahka pengerindu diri ngagai petara orang bansa bukai di baruh semua pun kayu, lalu enda ngasika pesan Aku. Aku ti TUHAN, udah bejaku.

¹⁴“Kita ti enda tetap ati, pulai meh kita baru ngagai Aku. Kita endang enggi Aku. Aku deka ngambi siku ari bala kita ari genap buah nengeri, enggau dua iku ari siti-siti raban peturun, lalu Aku deka mai kita pulai baru ngagai Bukit Sion.

¹⁵Aku deka meri kita raja ke ngasika Aku, lalu sida deka merintah kita ngena penemu-dalam enggau pemereti ati.

¹⁶Udah nya, lebuh kita nyau mayuh tubuh di menua nya, orang enda agi bejakuka pasal Peti Lampang Batu Adat Aku. Sida enda agi berunding tauka ingatka Peti Lampang Batu Adat nya. Sida enda begunaka iya, lalu sida pen enda mega ngaga peti sempekat bukai.

¹⁷Lebuh maya nya ila, Jerusalem deka dikumbai ‘Kerusi diraja TUHAN.’ lalu semua bansa deka begempuru dia nyembah Aku. Sida enda agi ngereja utai nitihka pengekieh tauka penyai ati sida.

¹⁸Israel deka begulai enggau Judah, lalu seduai iya deka sama pulai ari menua di utara ti udah alai seduai iya dibuai, lalu pulai baru ngagai menua ti udah diberi Aku nyadika pesaka aki ini kita.”

¹⁹Ku TUHAN bejaku, “Israel, Aku endang deka nerima nuan nyadika anak Aku lalu meri nuan menua ti ngerinduka ati, menua ti pemadu manah di dunya tu. Aku deka ngasuh nuan ngumbai Aku Apai lalu enda agi ninggalka Aku.

²⁰Tang nuan baka bini ti enda tetap ati. Nuan enda tetap ati ngagai Aku. Aku ti TUHAN, udah bejaku.”

²¹Munyi utai bisi didinga ba tuchung bukit: munyi orang Israel ke nyabak minta kasih laban sida udah bedosa lalu enda agi ingatka TUHAN Allah Taala sida.

²²Pulai baru meh kita, semua kita ke udah ninggalka TUHAN. Iya deka ngeraika kita, lalu ngasuh kita tetap ati. Ku kita, “Au, kami deka pulai baru ngagai TUHAN laban Iya endang Allah Taala kami.

²³Kami nadai bulih tulung ari engkeramba ti disembah kami ba tuchung bukit. Tulung ti diterima orang Israel semina datai ari TUHAN Allah Taala kami aja.

²⁴Tang pengawa besembahka Baal, petara ti ngemalu, udah ngasuh raban bedus enggau raban sapi, anak lelaki enggau anak indu kami lenyau - semua utai ti udah ulih aki ini kami kenyau ari kelia.

²⁵Kami patut gali mai pemalu, lalu nejuka pemalu kami ngelamun kami. Kami enggau bala aki ini kami endang udah seruran bedosa ngelaban TUHAN Allah Taala kami. Kami nadai kala ngasika pesan Iya.”