Read Iban Jeremiah 30 Bible Online

Jeremiah 30 - Iban bible

Jeremiah 30

¹Ku TUHAN Allah Taala ke disembah orang Israel

²bejaku ngagai aku, “Tuliska dalam siti bup semua utai ti udah dipadahka Aku ngagai nuan,

³laban maya deka datai alai Aku deka mai bala nembiak Aku, Israel enggau Judah pulai baru. Aku deka mai sida pulai baru ngagai menua ti udah diberi Aku ngagai aki ini sida, lalu sida deka bempu menua nya baru. Aku ti TUHAN, udah bejaku.”

⁴Ku TUHAN bejaku ngagai orang Israel enggau ngagai orang Judah,

⁵“Aku bisi ninga orang nyabak laban sida balat takut,[42] sabak orang ke begau, ukai sabak ketegal pemaik.

⁶Ngetu dulu lalu berunding! Kati lelaki ulih ngadaka anak? Enti enda, nama kebuah Aku meda genap iku lelaki murus perut diri baka indu ke radai deka beranak? Nama kebuah mua sida puchat?

⁷Hari ti jai deka datai. Nadai hari bukai ulih dibandingka enggau hari nya, maya bala nembiak Aku deka balat tusah, tang sida deka mengkang idup.”

⁸Ku TUHAN ti Pemadu Bekuasa bejaku, “Lebuh hari nya datai, Aku deka matahka kungkung ti ba rekung sida, lalu muka rantai sida, lalu sida enda agi nyadi ulun orang menua bukai.

⁹Sida deka betuaika Aku, TUHAN Allah Taala sida, sereta betuaika siku peturun David ti deka diasuh Aku nyadi raja.

¹⁰ “Nembiak Aku, anang takut. Orang Israel, anang takut. Aku deka ngelepaska kita ari menua ti jauh nya, ari menua alai kita ke nyadi orang tangkap. Kita deka pulai baru ngagai menua kita empu, lalu diau nadai utai ngachau. Kita deka diau likun, lalu nadai orang deka ngemba kita.

¹¹Aku deka datai lalu ngidupka kita. Aku deka ngerusak semua bansa ti udah alai Aku ngachirka kita, tang Aku enda ngerusak kita. Aku enggai nejuka kita enda diukum, tang lebuh Aku ngukum kita, Aku deka ngukum kita enggau ati ti lurus. Aku ti TUHAN udah bejaku.”

¹²Ku TUHAN bejaku ngagai bala nembiak Iya, “Bakal kita enda ulih gerai. Telih kita enda ulih gerai.

¹³Kita nadai orang ngibun, nadai ubat kena ngubat rumbak kita, nadai ulih ngarapka diri digeraika.

¹⁴Semua ambai kita nadai agi ingatka kita. Sida nadai agi ibuhka kita. Aku udah nyerang kita baka munsuh. Ukum kita amat berat laban dosa kita mayuh lalu penyai kita besai.

¹⁵Anang agi mutapka telih kita. Kita nadai ulih gerai. Aku ngukum kita baka tu laban dosa kita mayuh lalu penyai kita besai.

¹⁶Tang diatu, semua orang ke nelan kita, deka ditelan, lalu semua bala munsuh kita deka ditabanka nyadi orang tangkap. Semua orang ke nekanka pengidup kita, deka ditekanka, lalu semua orang ke ngerumpak kita, deka dirumpak.

¹⁷Aku deka ngasuh kita suman baru. Aku deka ngeraika telih kita, taja pen bala munsuh kita nyebut, ‘Sion nadai diguna orang agi. Nadai orang ibuhka iya agi.’ Aku ti TUHAN, udah bejaku.”

¹⁸Ku TUHAN bejaku, “Aku deka mai bala nembiak Aku pulai baru ngagai menua sida empu lalu kasihka genap ruang bilik sida. Jerusalem deka digaga baru, lalu istana di nengeri nya deka digaga baru.

¹⁹Orang ke diau dia deka belagu pantun puji. Sida deka manjung gaga ati. Ulih berekat ari Aku, pemayuh tubuh sida deka nambah-menambah. Berekat ari Aku deka ngasuh sida dibasa orang.

²⁰Aku deka mulaika kuasa sida ke lama menya ngagai bansa sida tu baru lalu nudukka sida tegap di mua Aku. Aku deka ngukum semua orang ke nekanka pengidup sida.

²¹Orang ke megai sida deka datai ari bansa sida empu, anak raja sida, ari bala sida empu. Iya deka datai ngadap Aku lebuh Aku ngangauka iya, laban sapa berani datai, enti iya enda dikangauka? Sida deka nyadi nembiak Aku, lalu Aku deka nyadi Allah Taala sida. Aku ti TUHAN, udah bejaku.”

²³Pengeringat TUHAN baka biaubalai, ribut ti balat ti mangka ba atas puchuk pala orang ke jai. Pengeringat Iya enda badu ngapa datai ke Iya udah ngereja semua utai ti deka dikereja Iya. Jemah ila, bala nembiak Iya deka meretika utai nya enggau terang.