Read Iban Jeremiah 31 Bible Online

Jeremiah 31 - Iban bible

Jeremiah 31

¹Ku TUHAN bejaku, “Maya deka datai alai Aku deka nyadi Allah Taala ke semua raban bansa orang Israel, lalu sida deka nyadi nembiak Aku.

²Orang ke enda mati laban pedang, ngasaika penelap Aku lebuh sida di menua puang. Lebuh orang Israel tetenguk deka belelak,

³Aku pegari di mua sida[43] ari jauh.[44] Kita orang Israel, Aku endang seruran rinduka kita. Nya kebuah Aku seruran ngayanka pengerindu Aku ti meruan belama iya ngagai kita.

⁴Aku deka nirika kita baru. Kita deka sekali agi mai tamborin kita lalu betanda enggau ati ti gaga.

⁵Kita deka bekebun anggur baru ba sebelah bukit menua Samaria, lalu orang ke bekebun nya deka makai asil ari kebun nya empu.

⁶Sigi amat, maya deka datai alai orang ke nyaga menua deka ngangau ba sebelah bukit menua Epraim, ‘Aram kitai niki ngagai Sion, ngagai TUHAN Allah Taala kitai.’ ”

⁷Ku TUHAN bejaku, “Belagu enggau ati ti gaga ke Israel, bansa ti pemadu besai. Nyanyi pantun puji, ‘TUHAN udah ngidupka nembiak Iya.[45] Iya udah ngidupka nembiak Iya, iya nya orang Israel.’

⁸Aku deka mai sida ari utara lalu ngempuruka sida ari semua tisi dunya. Sida ke buta enggau ti enda ulih bejalai, indu ke ngandung, enggau sida ke nyau deka beranak, deka datai enggau sida. Sida deka pulai baru lalu nyadi bansa ti kering.

⁹Bala nembiak Aku deka pulai baru enggau sabak, sereta besampi lebuh Aku nguluka sida pulai. Aku deka ngiring sida bejalai ngimbai sungai ti mayuh ai, nengah jalai ti rata ngambika sida enda tesangkut, laban Aku tu Apai orang Israel, lalu Epraim nya anak tuai Aku.”

¹⁰Ku TUHAN bejaku, “Pendingka Aku, semua kita bansa bukai, lalu padahka jaku Aku di seberai tasik. Aku udah ngachirka bala nembiak Aku, tang Aku deka ngempuruka sida baru lalu nyaga sida baka pengibun bedus ke nyaga raban bedus iya.

¹¹Aku udah nebus orang Israel lalu udah nebus sida ari siti bansa ti kering.

¹²Sida deka datai lalu belagu gaga ati ba Bukit Sion lalu deka gaga ke pemeri Aku, iya nya gandum, enggau wain, enggau minyak kana, bedus enggau sapi. Sida deka nyadi baka kebun ti seruran dipanjah enggau ai, lalu sida deka bisi semua utai ti dipeguna sida.

¹³Udah nya sida indu ke agi biak, deka betanda sereta lantang ati lalu sida ke lelaki, ke biak enggau ke tuai, deka rami gaga. Aku deka merindang sida, lalu nukar ulit sida nyadi pengaga, ngubah ati sida ke balat tusah nyadi lantang.

¹⁴Aku deka nupi bala imam ngena pemakai ti pemadu manah lalu meri semua utai ti dipeguna nembiak Aku. Aku ti TUHAN udah bejaku.”

¹⁵ Ku TUHAN bejaku, “Nyawa bisi didinga di Ramah, munyi orang ke bekeduie nyabak. Rachel nyabakka bala anak iya, laban sida nyau nadai agi, lalu iya enggai diperindang.

¹⁶Anang agi nyabak lalu kendas ai mata nuan. Nuan deka diberi upah ketegal semua utai ti udah dikereja nuan ke bala anak nuan. Sida deka pulai baru ari menua munsuh.

¹⁷Nuan bisi utai diadang jemah ila. Bala anak nuan deka pulai baru ngagai menua sida. Aku ti TUHAN, udah bejaku.

¹⁸“Aku ninga orang Israel nyebut enggau ati ti tusah, ‘TUHAN, kami tu baka jelu ti enda kala dipejinakka, tang Nuan udah ngajar kami ngasi. Bai kami pulai baru. Kami sedia deka pulai baru ngagai Nuan, TUHAN Allah Taala kami.

¹⁹Kami udah ninggalka Nuan, tang enda lama udah nya, kami keran deka pulai baru. Lebuh Nuan udah ngukum kami, kami kunduk-kunduk tusah ati. Kami malu sereta dipechat laban kami udah bedosa lebuh kami agi biak.’

²⁰“Israel, nuan endang anak ke balat dikesayauka Aku ke balat dikerinduka Aku. Genap kali Aku nyebut nama nuan, Aku ingatka nuan enggau pengerindu. Ati Aku lelengauka nuan. Aku deka kasihka nuan.

²¹Dirika tanda, lalu kelai jalai raya. Giga baru jalai ti udah ditengah kita mupuk. Pulai baru, O orang Israel, pulai baru ngagai nengeri ti udah ditinggalka kita.

²²Ni pengelama kita deka kakang ati, kita ke enda arap? Aku udah ngaga utai ti baru sereta nyelai, nyelai baka indu ke nyaga lelaki.”[46]

²³Ku TUHAN ti Pemadu Bekuasa, Allah Taala ke disembah orang Israel bejaku, “Lebuh Aku mai orang Israel pulai baru ngagai menua sida empu, sida deka sekali agi nyebut di menua Judah, enggau dalam nengeri di menua nya, ‘Awakka TUHAN merekatka bukit ti kudus[47] di Jerusalem, endur ti kudus ti alai Iya diau.’

²⁴Orang deka diau di menua Judah enggau dalam semua nengeri di menua nya, lalu orang bumai deka bisi dia, sama enggau bala pengibun bedus enggau raban bedus sida.

²⁵Aku deka ngeringka sida ke lelak, lalu ngenyangka sida ke lapar lembut tulang.

²⁶Udah nya orang deka bejaku, ‘Aku tinduk, lalu dani berasai regas baru.’

²⁷“Aku ti TUHAN bejaku, madahka maya deka datai alai Aku deka ngisi menua Israel enggau menua Judah enggau mensia sereta enggau jelu.

²⁸Lalu baka Aku ti udah nyabut, numbang, nebang, ngerusak, enggau ngeluska sida, baka nya mega Aku deka nanam lalu niri negika sida baru.

²⁹ Lebuh maya nya ila, orang nadai agi nyebut, ‘Apai indai makai buah anggur ti masam, tang bala anak ke ngasaika nyawa diri masam.’

³⁰Tang orang ke makai buah anggur ti masam deka ngasaika ngeli diri nyilu, lalu semua orang deka mati ketegal dosa sida empu.”

³¹ Ku TUHAN bejaku, “Maya deka datai alai Aku deka ngaga siti sempekat ti baru enggau orang Israel, sereta enggau orang Judah.

³²Sempekat nya enda baka sempekat lama ti udah digaga Aku enggau bala aki ini sida lebuh Aku megai jari sida, lalu nguluka sida pansut ari menua Ejip. Taja pen Aku udah nyadi laki sida, sida ngelanggar sempekat nya.

³³ Tang tu sempekat ti baru ti deka digaga Aku enggau orang Israel: Aku deka nyimpan Adat Aku dalam sida, lalu nuliska Adat nya dalam ati sida. Aku deka nyadi Allah Taala sida, lalu sida deka nyadi nembiak Aku.

³⁴ Nadai siku sida agi ibuh ngiruh diri ngajar pangan diri ngambika sida nemu TUHAN, laban semua sida deka nemu Aku, kenyau ari sida ke pemadu mit nyentuk ngagai sida ke pemadu besai. Aku deka ngampun dosa sida, lalu Aku enda agi ingatka penyalah sida. Aku ti TUHAN udah bejaku.”

³⁵TUHAN meri mata hari nyadika penampak lebuh siang hari, bulan enggau bintang manchar lebuh malam hari. Iya ngirau tasik, lalu ngasuh iya besegum. Nama Iya TUHAN ti Pemadu Bekuasa.

³⁶Iya besemaya, seagi-agi utai ti asal meruan bisi, Israel deka seruran mengkang nyadi siti bansa.

³⁷Enti langit ulih disukat lalu pugu dunya ulih dipansik, nya baru Iya deka nulak orang Israel ketegal semua utai ti udah dikereja sida. TUHAN udah bejaku.”

³⁸Ku TUHAN bejaku, “Maya deka datai alai semua nengeri Jerusalem deka digaga baru nyadika nengeri Aku, kenyau ari Menara Hananel tunga ke barat nyentuk ngagai Pintu Sukut.

³⁹Lalu garis entara menua deka nuju ari endur nya terus ke barat, ngagai bukit Garip, lalu musin ngagai Goah.

⁴⁰Semua lebak alai nguburka orang ke mati enggau alai muai uras, enggau semua padang ti ari atas Sungai Kidron, nyentuk ngagai Pintu Kuda ti tunga ke timur, deka nyadi kudus ke Aku. Nengeri tu enda agi dirubuh tauka dirusak.”