Read Iban Jeremiah 32 Bible Online

Jeremiah 32 - Iban bible

Jeremiah 32

¹ TUHAN bejaku ngagai aku dalam taun ti kesepuluh Sedekiah nyadi raja menua Judah. Taun nya mega taun ti kelapan belas Nebukadnesar nyadi raja menua Babilon.

²Lebuh maya nya bala soldadu raja menua Babilon benung nyerang Jerusalem, lalu aku udah kena jil ba tengah laman istana raja.

³Raja Sedekiah udah ngejil aku dia, lalu udah besalah aku ngumbai aku udah madahka TUHAN bisi udah nyebut, “Aku deka ngasuh raja menua Babilon ngalahka nengeri tu,

⁴lalu Raja Sedekiah enda ulih ngerarika diri. Iya deka diserahka ngagai raja menua Babilon. Iya deka betemu betunga mua enggau raja menua Babilon, lalu iya deka bejaku ngagai raja nya empu.

⁵Sedekiah deka ditabanka ngagai menua Babilon, lalu iya deka mengkang di menua nya nyentuk ngagai maya Aku deka ngukum iya. Enti sema iya ngelaban orang Babilon, enda meh iya ulih menang. Aku ti TUHAN, udah bejaku,”

⁶TUHAN madahka ngagai aku

⁷pasal Hanamel, anak aya aku Salum, ti deka datai ngagai aku mai peminta iya ti deka meli tanah iya di Anatot di menua Benjamin, laban aku kaban belayan iya ke pemadu nyempil, lalu bisi hak meli tanah nya ke aku empu.

⁸Udah nya, munyi ti udah dipadahka TUHAN, Hanamel datai ngagai aku ba tengah laman nya, lalu ngasuh aku meli tanah nya. Nya kebuah aku nemu TUHAN amat udah bejaku enggau aku.

⁹Aku meli tanah nya ari Hanamel lalu nimbang duit ke iya. Rega tanah nya tujuh belas singkap duit pirak.

¹⁰Aku nyain lalu nanggam surat tanah nya, ngasuh orang besaksika nya, lalu nimbang duit nya ngena dachin.

¹¹Udah nya aku ngambi dua iti salin surat nya, iya nya salin ti ditanggam, ti ngundan kontrak enggau semua atur dalam kontrak nya, enggau salin ti enda ditanggam.

¹²Aku lalu meri surat dua iti nya ngagai Baruk anak Neriah, uchu Mahseiah. Aku meri surat dua iti nya ngagai Baruk di mua Hanamel, enggau di mua bala saksi ti udah nyain surat nya, enggau di mua orang mayuh ke duduk ba tengah laman nya.

¹³Ku aku bejaku enggau Baruk di mua semua sida,

¹⁴“TUHAN ti Pemadu Bekuasa, ti Allah Taala ke disembah orang Israel, udah ngasuh nuan ngambi surat tu, salin ti ditanggam enggau salin ti enda ditanggam, lalu nyimpan surat dua iti tu dalam benda ti digaga ari tanah liat, ngambika surat nya tan disimpan betaun-taun ti deka datai.

¹⁵TUHAN ti Pemadu Bekuasa, ti Allah Taala ke disembah orang Israel udah madahka rumah, tanah, enggau kebun anggur deka dibeli baru dalam menua tu.”

¹⁶Lebuh aku udah meri surat tanah nya ngagai Baruk, aku lalu besampi,

¹⁷“TUHAN ti Pemadu Tinggi, Nuan udah ngaga langit enggau dunya ngena kuasa enggau pengering Nuan ti besai. Nadai utai enda ulih dikereja Nuan.

¹⁸Nuan udah ngayanka pengerindu ti meruan ngagai beribu iku mensia, tang Nuan mega ngukum orang ketegal dosa apai indai sida. Nuan endang Allah Taala ti besai sereta bekuasa. Nuan endang TUHAN ti Pemadu Bekuasa.

¹⁹Nuan ngaga pelan ti manah, lalu Nuan ngereja kereja ti besai. Nuan meda semua utai ti dikereja mensia, lalu Nuan ngupah sida nitihka utai ti dikereja sida.

²⁰Dulu kelia Nuan udah ngereja kereja ajih enggau kereja ti nyelai di menua Ejip, lalu Nuan agi majak ngereja kereja nya nyentuk ngagai sehari tu di menua Israel enggau di menua bukai, ngambika Nuan ditemu orang di semua endur.

²¹Ulih kereja ajih enggau kereja ti nyelai ti balat ngenakutka munsuh kami, Nuan udah ngena kuasa enggau pengering Nuan mai bala nembiak Nuan pansut ari menua Ejip.

²²Nuan udah meri ngagai sida menua ti kaya sereta ami, munyi ti udah disemaya Nuan ngagai aki ini sida.

²³Tang lebuh sida datai lalu ngerampas menua tu, sida enda ngasika atur Nuan, tauka idup nitihka ajar Nuan. Sida nadai ngereja utai ti udah diasuh Nuan kereja sida. Nya alai Nuan ngasuh semua pengerusak tu ninggang sida.

²⁴“Orang Babilon udah ngaga kuta tanah kena sida ngelulung lalu ngalahka nengeri tu, lalu sida diatu benung nyerang. Perang, keberuran, enggau penyakit deka ngasuh nengeri tu alah. Nuan Empu ulih meda, semua utai ti udah disebut Nuan dikamatka magang.

²⁵Tang taja pia, TUHAN ti Pemadu Tinggi, Nuan Empu udah ngasuh aku meli tanah nya, dikemataka bala saksi, taja pen nengeri tu baru deka alah laban orang Babilon.”

²⁶Udah nya TUHAN bejaku ngagai aku,

²⁷“Aku tu TUHAN Allah Taala ke semua mensia. Nadai utai enda ulih dikereja Aku.

²⁸ Aku deka nyerahka nengeri tu ngagai Raja Nebukadnesar menua Babilon enggau bala soldadu iya. Sida deka ngalahka nengeri tu

²⁹lalu nunu iya. Sida deka nunu iya retung sama enggau rumah alai orang ke udah nyungkak Aku ringat ketegal sida nunu menyan ke Baal ba perabung rumah, enggau ketegal sida nuang wain nyadika piring ke petara bukai.

³⁰Kenyau ari pun dulu kelia orang Israel enggau orang Judah endang udah nyungkak Aku enda lantang ati sereta ringat laban utai ti udah dikereja sida.

³¹Orang di nengeri tu udah nyungkak Aku ringat pedis ati kenyau ari maya nengeri tu didirika. Aku udah mutuska runding deka ngerusak nengeri tu

³²ketegal semua penyai ti udah dikereja orang Judah enggau orang Jerusalem, sama enggau bala raja enggau bala tuai sida, bala imam enggau bala nabi sida.

³³Sida udah nguingka belakang sida ngagai Aku, lalu taja pen Aku majak ngajar sida, sida majak enggai mending lalu belajar.

³⁴ Indah engkeramba ti disembah sida deh diengkah sida dalam Rumah Sembiang ti alai Aku disembah, lalu sida udah ngamahka Rumah nya.

³⁵ Sida udah ngaga mayuh bengkah alta ke Baal ba Lebak Hinom, alai sida nyerahka anak lelaki enggau anak indu sida nyadika piring ngagai petara Molek. Aku nadai ngasuh sida ngereja utai nya, lalu Aku pen nadai mega udah ngira sida deka ngereja utai nya, lalu ngasuh orang Judah bedosa.”

³⁶Ku TUHAN Allah Taala ke disembah orang Israel nyebut ngagai aku, “Jeremiah, orang ngumbai perang, keberuran enggau penyakit deka ngasuh nengeri tu alah laban raja menua Babilon. Diatu pendingka utai bukai ti deka disebut Aku.

³⁷Aku deka ngempuruka orang ari semua menua ti udah alai Aku ngachirka sida lebuh Aku ringat pedis ati, lalu Aku deka mai sida pulai baru ngagai endur tu, lalu nejuka sida diau likun ditu.

³⁸Nya baru sida deka nyadi nembiak Aku, lalu Aku deka nyadi Allah Taala sida.

³⁹Aku deka meri sida siti aja tuju dalam pengidup sida, iya nya, ngemesaika Aku belama iya, ke penguntung sida empu, enggau ke penguntung bala peturun sida.

⁴⁰Aku deka ngaga siti sempekat ti meruan belama iya enggau sida. Aku enggai sekali-kali badu ngereja utai ti manah ke sida, lalu Aku deka ngasuh sida nangika Aku enggau pengabis ati sida, ngambika sida enda ninggalka Aku.

⁴¹Aku deka gaga ati ngereja utai ti manah ke sida, lalu Aku deka ngentapka sida di menua tu.

⁴²“Baka Aku ti udah ngasuh orang tu ditinggang penusah ti besai tu, baka nya mega Aku deka meri ngagai sida semua utai ti manah ti udah disemaya Aku.

⁴³Orang bisi bejaku ngumbai menua tu deka nyadi baka menua puang, ti enda diuan mensia tauka jelu, lalu madahka menua tu deka diserahka ngagai orang Babilon. Tang tanah umai deka dibeli baru di menua tu.

⁴⁴Orang deka meli tanah, lalu surat tanah deka disain, lalu ditanggam di mua bala saksi. Utai tu deka nyadi di menua Benjamin, dalam genturung pendiau ti ngelingi Jerusalem, dalam nengeri di menua Judah, enggau dalam nengeri di menua ti bebukit, ba sebelah kaki bukit, enggau di selatan menua Judah. Aku deka mulaika orang mayuh ngagai menua sida empu baru. Aku ti TUHAN, udah bejaku.”