Read Iban Jeremiah 33 Bible Online

Jeremiah 33 - Iban bible

Jeremiah 33

¹Lebuh aku agi benung kena jil ba tengah laman nya, pesan TUHAN datai ngagai aku baru.

²TUHAN ti ngaga, nempa lalu ngengkahka dunya ba endur iya, bejaku ngagai aku. Ku Iya ke benama TUHAN bejaku,

³“Kangauka Aku, lalu Aku deka nyaut nuan. Aku deka madahka ngagai nuan utai ti manah, ti nadai kala ditemu nuan, ti deka ngasuh nuan alit ati.

⁴Aku ti TUHAN Allah Taala ke disembah orang Israel madahka semua rumah di Jerusalem, enggau istana raja deka dirubuh laban sida dikelulung sereta diserang munsuh.

⁵Sekeda orang deka bamuk ngelaban orang Babilon, lalu orang Babilon deka ngisi rumah[48] enggau bangkai orang Israel ti deka dibunuh Aku, laban Aku ringat pedis ati ngagai sida. Aku udah nguingka Diri ari nengeri tu ketegal utai ti jai ti udah dikereja orang ke diau ditu.

⁶Tang Aku deka ngeraika nengeri tu enggau orang ke diau ditu, lalu ngasuh sida suman baru. Aku deka meri sida pemaik enggau pengelikun.

⁷Aku deka ngasuh Judah enggau Israel kaya-raja baru, lalu Aku deka niri negika sida baru baka sida ke suba.

⁸Aku deka nuchi sida ari dosa ti udah digaga sida ngelaban Aku, lalu Aku deka ngampun dosa sida, enggau penyalah sida ke udah angkat ngelaban Aku.

⁹Jerusalem deka mai pengaga, basa enggau mulia ngagai Aku, lalu genap bengkah bansa di dunya tu deka nangi sereta getar-getar lebuh sida ninga pasal utai ti manah ti deka dikereja Aku ke orang Jerusalem, enggau pasal pengaya ti deka dibai Aku ngagai nengeri tu.”

¹⁰Ku TUHAN bejaku, “Orang bisi bejaku madahka endur tu baka menua puang, madahka endur tu enda diuan mensia tauka jelu. Utai ti disebut sida nya endang amat. Nengeri di menua Judah enggau jalai raya di Jerusalem endang amat puang, nadai orang nguan tauka jelu. Tang ba endur tu kita deka ninga baru

¹¹ munyi panjung orang ke gaga ati, enggau munyi orang ke lantang ati ngintu gawai tikah. Kita deka ninga orang belagu lebuh sida mai piring terima kasih ngagai Rumah Aku. Ku sida, ‘Beri terima kasih ngagai TUHAN ti Pemadu Bekuasa, laban Iya endang manah lalu pengerindu Iya endang meruan belama iya.’ Aku deka ngasuh menua tu nyadi kaya-raja baru baka iya ti dulu suba. Aku ti TUHAN, udah bejaku.”

¹²Ku TUHAN ti Pemadu Bekuasa bejaku, “Menua tu, ti baka menua puang, ti enda diuan mensia tauka jelu, deka bisi padang rumput baru alai bala pengibun bedus tau mai bedus sida.

¹³Di nengeri ti di menua ti bebukit, ba sebelah kaki bukit, enggau di selatan menua Judah, di menua Benjamin, ba genturung pendiau ti ngelingi Jerusalem, enggau di nengeri menua Judah, bala pengibun bedus deka, sekali agi, ngitung bedus sida. Aku ti TUHAN, udah bejaku.”

¹⁴ Ku TUHAN bejaku, “Maya deka datai alai Aku deka ngamatka semaya ti udah digaga Aku enggau orang Israel sereta enggau orang Judah.

¹⁵Lebuh maya nya ila, Aku deka milih siku orang ke lurus ari peturun David, nyadi raja. Raja nya deka ngereja utai ti ngena sereta lurus di serata menua tu.

¹⁶Lebuh maya nya ila Judah deka likun, lalu orang Jerusalem deka diau dalam pemaik, lalu nengeri Jerusalem deka dikumbai ‘TUHAN ti pun pengelurus kitai.’

¹⁷ Aku ti TUHAN, besemaya: siku peturun David deka seruran nyadi raja orang Israel,

¹⁸ lalu imam ari peturun Lewi deka seruran bekereja ke Aku, sereta ngenjuk piring tunu, piring tepung, enggau mayuh macham piring ti bukai.”

¹⁹Ku TUHAN bejaku ngagai aku,

²⁰“Aku udah ngaga siti sempekat enggau siang sereta enggau malam, ngambika seduai iya seruran pegari ba maya ti patut, lalu sempekat nya enda tau dilanggar.

²¹Baka nya mega Aku udah ngaga siti sempekat enggau nembiak Aku David madahka siku ari peturun iya deka seruran nyadi raja, lalu Aku udah ngaga siti sempekat enggau bala imam ari raban bansa Lewi, ngasuh sida seruran bekereja ke Aku. Semua sempekat tu enda tau sekali-kali dilanggar.

²²Aku deka nambahka pemayuh peturun nembiak Aku David, enggau pemayuh bala imam ari raban bansa Lewi, datai ke sida nyau enda ulih diitung agi, baka bintang ti di langit tauka baka pasir ti ba tebing tasik.”

²³Ku TUHAN bejaku ngagai aku,

²⁴“Kati nuan bisi meda orang bejaku madahka Aku udah nulak Israel enggau Judah, dua bengkah ruang bilik ti udah dipilih Aku, enggau jalai sida ngayanka diri enda bebasaka bala nembiak Aku, lalu enda agi ngumbai sida iya siti bansa?

²⁵Tang Aku ti TUHAN udah ngaga siti semaya enggau siang, sereta enggau malam, lalu Aku udah ngaga adat kena merintah dunya enggau langit.

²⁶Baka Aku ti udah ngereja utai nya, baka nya mega Aku deka numbuhka semaya Aku enggau peturun Jakop sereta enggau nembiak Aku David. Aku deka milih siku ari peturun David merintah bala peturun Abraham, Isak enggau Jakop. Aku deka kasihka bala nembiak Aku, lalu ngasuh sida nyadi kaya-raja baru.”