Read Iban Jeremiah 34 Bible Online

Jeremiah 34 - Iban bible

Jeremiah 34

¹ TUHAN bejaku ngagai aku lebuh Raja Nebukadnesar enggau bala soldadu iya, disukung bala soldadu ari semua bansa, enggau menua ti kena pegai iya, benung nyerang Jerusalem enggau nengeri ti semak nya dia.

²TUHAN Allah Taala ke disembah orang Israel ngasuh aku mansang lalu nyebut ngagai Raja Sedekiah menua Judah munyi tu, “Aku ti TUHAN, deka nyerahka nengeri tu ngagai raja menua Babilon, lalu iya deka nunu nengeri tu.

³Nuan enda ulih rari. Nuan deka kena tangkap, lalu diserahka ngagai iya. Nuan deka betunga mua enggau iya, lalu bejaku enggau iya empu. Udah nya baru nuan deka mupuk ngagai menua Babilon.

⁴Sedekiah, pendingka utai ti disebut aku pasal nuan. Nuan enda mati beperang.

⁵Nuan deka mati dalam pemaik, lalu baka orang ke nunu menyan lebuh sida nguburka bala aki ini nuan ti udah nyadi raja dulu agi ari nuan, baka nya mega sida deka nunu menyan ke nuan. Sida deka ngulitka nuan, lalu nyebut, ‘Raja kitai udah mati!’ Aku ti TUHAN, udah bejaku.”

⁶Udah nya aku lalu meri pesan nya ngagai Raja Sedekiah di Jerusalem

⁷lebuh bala soldadu raja menua Babilon benung nyerang nengeri nya. Bala soldadu nya mega nyerang Lakis enggau Asekah, dua buah nengeri ti bekuta ti apin diserang di menua Judah.

⁸Raja Sedekiah enggau semua orang Jerusalem udah ngaga siti sempekat kena ngelepaska

⁹orang Hebrew ti nyadi ulun, ti lelaki enggau ti indu, ngambika orang Israel nadai ngembuan ulun ari bansa sida empu.

¹⁰Semua orang Israel enggau bala tuai sida besetuju deka ngelepaska ulun sida, lalu enda agi ngaga sida nyadi ulun. Sida amat ngelepaska ulun sida,

¹¹tang udah nya, sida lalu ngubah runding diri, ngambi ulun nya pulai baru, lalu mejalka sida nyadi ulun baru.

¹²Udah nya TUHAN,

¹³ti Allah Taala ke disembah orang Israel, ngasuh aku nyebut ngagai orang mayuh: “Aku udah ngaga siti sempekat enggau bala aki ini kita, lebuh Aku mai sida pansut ari menua Ejip, pansut ari pengidup sida ke nyadi ulun. Aku madahka ngagai sida,

¹⁴ ba genap taun ti ketujuh, sida enda tau enda ngelepaska sebarang orang Hebrew ti nyadi ulun, ti udah bekereja enam taun ke sida. Tang bala aki ini kita enda bedulika nya, lalu enggai mendingka Aku.

¹⁵Dalam dua tiga hari tu ti udah, kita udah ngubah runding diri, lalu ngereja utai ti ngerinduka ati Aku. Semua kita besetuju deka ngelepaska semua orang Israel, lalu kita ngaga siti sempekat di mua Aku, dalam Rumah Sembiang alai Aku ke disembah.

¹⁶Tang udah nya kita ngubah runding kita baru, lalu enda bebasaka Aku. Semua kita ngambi ulun kita pulai baru, ulun ti udah dilepaska kita nitihka pengingin ulun nya empu, lalu kita mejalka sida nyadi ulun baru.

¹⁷Nya alai, diatu Aku ti TUHAN madahka kita udah enda ngasika Aku. Kita nadai udah ngelepaska semua orang Israel. Nya alai Aku deka ngelengkaka kita ari jari Aku ngambika kita mati beperang, mati laban penyakit enggau mati keberuran. Aku deka ngasuh semua bansa di dunya tu geli meda utai ti dikereja Aku ngagai kita.

¹⁸Bala pemesai menua Judah enggau Jerusalem, sama enggau bala pemesai ke bekereja di istana, bala imam, enggau semua bala tuai bansa, udah ngaga siti sempekat enggau Aku lebuh sida bejalai entara dua bidang bangkai sapi siku ti udah dibelah dua. Tang sida ngelanggar sempekat nya lalu enda nitihka atur dalam sempekat nya. Nya alai Aku deka ngereja ngagai bala orang nya utai ti udah dikereja sida ngagai sapi ti lelaki nya.

²⁰Aku deka nyerahka sida ngagai bala munsuh sida ke deka munuh sida, lalu bangkai sida deka diempa burung enggau jelu babas.

²¹Aku deka mega nyerahka Raja Sedekiah menua Judah enggau bala pemesai iya ngagai orang ke deka munuh sida. Aku deka nyerahka sida ngagai bala soldadu orang Babilon, ti udah ngetu nyerang kita.

²²Aku deka meri atur, lalu sida deka pulai baru ngagai nengeri tu. Sida deka nyerang, ngalah, lalu nunu nengeri tu. Aku deka ngaga nengeri di menua Judah nyadi baka menua puang, ti enda diuan mensia. Aku ti TUHAN, udah bejaku.”