Read Iban Jeremiah 36 Bible Online

Jeremiah 36 - Iban bible

Jeremiah 36

¹ Dalam taun ti keempat Jehoiakim anak Josiah nyadi raja menua Judah, TUHAN bejaku ngagai aku,

²“Ambi gulung surat, lalu tuliska ba surat nya semua utai ti udah dipadahka Aku ngagai nuan pasal orang Israel enggau orang Judah, enggau pasal semua bansa. Tuliska semua utai ti udah dipadahka Aku ngagai nuan kenyau ari Aku terubah bejaku ngagai nuan, lebuh Josiah nyadi raja, nyentuk ngagai diatu.

³Nyangka ukur lebuh orang Judah ninga pasal semua pengerusak ti deka diasuh Aku ninggang sida, sida deka ngelengkaka ulah sida ke jai. Nya baru Aku deka ngampun penyai enggau dosa sida.”

⁴Nya alai aku lalu mesanka Baruk anak Neriah, lalu nyebut ngagai iya semua utai ti udah disebut TUHAN ngagai aku. Baruk lalu nuliska semua utai nya dalam gulung surat nya.

⁵Udah nya aku lalu meri atur tu ngagai Baruk: “Aku enda tau tama ngagai Rumah Sembiang.

⁶Tang aku ngasuh nuan mansang kia lebuh orang mayuh bepasa ila. Nuan enda tau enda macha gulung surat tu enggau nyawa ti inggar, ngambika sida ninga semua utai ti udah disebut TUHAN ngagai aku, ti udah diasuh aku tulis nuan. Kereja nya ba endur alai semua orang ulih ninga nuan, nyengkaum orang Judah ke datai ari nengeri sida empu.

⁷Nyangka ukur sida deka besampi ngagai TUHAN lalu ngelengkaka ulah sida ke jai, laban TUHAN udah madahka Diri deka balat ringat sereta pedis ati ngagai bala nembiak Iya.”

⁸Nya alai Baruk lalu macha jaku TUHAN dalam Rumah Sembiang nitihka asuh aku.

⁹Dalam bulan ti kesemilan, kelima taun Jehoiakim nyadi raja menua Judah, orang mayuh lalu bepasa minta pengasih ari TUHAN. Semua orang ke diau di Jerusalem, enggau semua orang ke datai ari mayuh bengkah nengeri di menua Judah, bela bepasa magang.

¹⁰Udah nya, lebuh semua orang mayuh mending, Baruk lalu macha gulung surat nya, madahka semua utai ti udah disebut aku. Iya macha gulung surat nya dalam Rumah Sembiang, ari bilik Gemariah anak Sapan, ti nyadi kerani kot. Bilik nya ba sadau kot, semak penama ngagai Pintu Ti Baru ba Rumah Sembiang.

¹¹Lebuh Mikaiah anak Gemariah, uchu Sapan, ninga Baruk macha jaku TUHAN ari gulung surat nya,

¹²iya lalu mansang ngagai istana raja, ngagai bilik kerani kot, alai semua pemesai benung baum. Elisama, ti nyadi kerani kot, Delaiah anak Semaiah, Elnatan anak Akbor, Gemariah anak Sapan, Sedekiah anak Hananiah, enggau semua pemesai ti bukai bela bisi dia magang.

¹³Mikaiah lalu madahka ngagai sida semua utai ti udah didinga iya bacha Baruk ngagai orang mayuh.

¹⁴Udah nya bala pemesai ngasuh Jehudi (anak Netaniah, uchu Selemiah, ichit Kusi) mesanka Baruk mai ngagai sida gulung surat ti udah dibacha iya ngagai orang mayuh. Baruk lalu mai gulung surat nya ngagai sida.

¹⁵Ku sida bejaku, “Duduk, lalu bacha gulung surat nya ngagai kami.” Baruk lalu macha.

¹⁶Lebuh iya udah macha gulung surat nya, sida lalu beperening ngagai pangan diri, irau ati, lalu bejaku enggau Baruk, “Kami enda tau enda madahka utai tu ngagai raja.”

¹⁷Sida lalu nanya Baruk, “Padahka ngagai kami diatu, baka ni ku nuan nuliska semua utai tu? Kati Jeremiah bisi udah nyebut utai tu ngagai nuan?”

¹⁸Disaut Baruk, “Jeremiah nyebut semua leka jaku nya ngagai aku, lalu aku nuliska semua utai nya dalam gulung surat tu.”

¹⁹Lalu ku sida bejaku ngagai iya, “Seduai Jeremiah enda tau enda angkat ari tu lalu belalai. Anang madahka ngagai orang endur alai seduai belalai.”

²⁰Bala pemesai lalu naruh gulung surat nya dalam bilik Elisama, ti nyadi kerani kot, lalu mansang ngagai istana raja, alai sida ke lalu madahka semua utai ngagai raja.

²¹Udah nya raja lalu ngasuh Jehudi ngambi gulung surat nya. Jehudi ngambi gulung surat nya ari bilik Elisama, lalu macha iya ngagai raja enggau semua bala pemesai ke bediri ngelingi iya.

²²Hari lebuh maya nya endang udah musin chelap, lalu raja duduk bekindu dalam istana ti endur alai iya belelak lebuh musin chelap.

²³Lebuh Jehudi udah tembu macha tiga tauka empat genteran, raja ngambi lungga lalu netak dua tiga genteran ari gulung surat nya, lalu nibarka utai nya ngagai api. Iya majak ngereja nya datai ke semua gulung surat nya udah abis ditunu.

²⁴Tang raja, enggau bala pemesai iya ke ninga pasal utai nya, nadai berasai takut tauka ngayanka diri bisi tusah ati.

²⁵Taja pen Elnatan, Delaiah, enggau Gemariah nguji minta raja badu nunu gulung surat nya, iya enda bedulika jaku sida.

²⁶Udah iya ngasuh anak iya ke benama Jerahmil, sama enggau Seraiah anak Asriel, enggau Selemiah anak Abdil, nangkap aku enggau kerani aku, Baruk. Tang TUHAN udah ngelalaika kami duai.

²⁷Lebuh Raja Jehoiakim udah nunu gulung surat ti udah diasuh aku tulis Baruk, TUHAN lalu bejaku ngagai aku ngasuh aku

²⁸ngambi siti agi gulung surat, lalu nuliska ba gulung surat nya semua utai ti udah ditulis ba gulung surat ti keterubah.

²⁹TUHAN ngasuh aku nyebut ngagai raja, “Nuan udah nunu gulung surat nya, lalu nuan udah nanyaka ngagai Jeremiah kebuah iya udah nulis lalu madahka raja menua Babilon deka datai lalu ngerusak menua tu, lalu munuh orang enggau jelu di menua tu.

³⁰Nya alai, diatu Aku ti TUHAN, madahka ngagai nuan Raja Jehoiakim, nadai siku peturun nuan deka merintah menua ti udah diperintah David. Bangkai nuan deka dibuai ngagai endur alai nuan deka dipanchar panas lebuh siang hari, lalu dibalut ais lebuh malam hari.

³¹Aku deka ngukum nuan, bala peturun nuan, enggau bala pemesai nuan ketegal dosa ti udah dikereja semua kita. Nuan, tauka orang di Jerusalem, tauka orang Judah nadai kala deka mendingka jaku tangkan ti diberi Aku, nya alai Aku deka ngasuh penusah ti besai ninggang semua kita, munyi ti udah dipadahka Aku ngagai kita.”

³²Udah nya aku lalu ngambi siti agi gulung surat, lalu meri gulung surat nya ngagai kerani aku, Baruk, lalu iya nuliska semua utai ti diasuh aku tulis iya. Iya lalu nuliska semua utai enggau pesan munyi ti udah ditulis dalam gulung surat ti terubah.