Read Iban Jeremiah 37 Bible Online

Jeremiah 37 - Iban bible

Jeremiah 37

¹ Raja Nebukadnesar menua Babilon nyiri Sedekiah anak Josiah nyadi raja menua Judah, nganti Jehoiakin anak Jehoiakim.

²Tang Sedekiah, bala pemesai iya, enggau orang mayuh enda ngasika pesan ti udah diberi TUHAN ngagai aku.

³Raja Sedekiah ngasuh Jehukal anak Selemiah, enggau Imam Sepaniah anak Maseiah minta aku besampi ngagai TUHAN Allah Taala kitai, ngarika bansa kitai.

⁴Lebuh maya nya aku apin ditutup dalam rumah jil, lalu agi bejalai kia-kia enggau nadai besekat ba bansa kitai.

⁵Bala soldadu orang Babilon endang udah ngelulung Jerusalem, tang lebuh sida ninga bala soldadu orang Ejip udah meraka garis entara menua Ejip, sida lalu nyurutka diri.

⁶Udah nya TUHAN Allah Taala ke disembah orang Israel, ngasuh aku

⁷nyebut ngagai Sedekiah, “Bala soldadu orang Ejip diatu benung di rantau jalai mansang nulung nuan, tang sida deka pulai.

⁸Udah nya orang Babilon deka datai baru, nyerang, ngalahka lalu nunu nengeri tu.

⁹Aku ti TUHAN, meri jaku tangkan ngagai nuan, enda ngasuh nuan nipu diri ngarapka orang Babilon enda datai baru, laban sida endang deka datai baru.

¹⁰Enti sema nuan ngalahka semua bala soldadu orang Babilon, datai ke semina sida ke bakal aja agi tinggal garing-garing dalam langkau kain sida, sida deka angkat baru lalu nunu nengeri tu datai ke retung.”

¹¹Bala soldadu orang Babilon nyurutka diri ari Jerusalem laban bala soldadu orang Ejip nyau deka datai.

¹²Nya alai aku lalu angkat ari Jerusalem, lalu mansang ngagai menua Benjamin, deka ngambi ungkup aku ari reta tengkira kami sebilik.

¹³Tang lebuh aku datai ba Pintu Benjamin, pemesai ti nyadi tuai soldadu ke nyaga dia, ke benama Irijah anak Selemiah, uchu Hananiah, ngetanka aku. Ku iya, “Nuan deka rari lalu ngalih ari orang Babilon!”

¹⁴Ku aku nyaut, “Ukai baka nya! Aku ukai deka ngalih ari orang Babilon.” Tang Irijah enggai mendingka aku. Iya nangkap aku, lalu mai aku ngagai bala pemesai.

¹⁵Sida pedis ati ngagai aku, lalu ngasuh orang malu sereta ngejil aku dalam rumah Jonatan, ti nyadi kerani kot. Rumah nya udah digaga nyadi rumah jil.

¹⁶Aku ditutup dalam rumah jil ti dalam tanah. Lama amat aku ditutup dia.

¹⁷Udah nya Raja Sedekiah mesanka aku, lalu dalam istana nya iya nanya aku, “Kati nuan bisi pesan ari TUHAN?” “Bisi,” ku aku nyaut, lalu ku aku nambahka jaku aku, “Nuan deka diserahka ngagai raja menua Babilon.”

¹⁸Udah nya aku lalu nanya, “Nama penyalah ti udah dikereja aku ngagai nuan tauka ngagai bala pemesai nuan, tauka ngagai orang mayuh, ti ngasuh nuan nutup aku dalam rumah jil?

¹⁹Dini alai bala nabi nuan ti udah madahka raja menua Babilon enda nyerang nuan, tauka nyerang menua tu?

²⁰Nya alai diatu, Tuan Raja, aku minta nuan mendingka aku, lalu ngereja utai ti diasuh aku. Anang ngasuh aku pulai baru ngagai rumah jil ti dalam rumah Jonatan. Enti nuan nutup aku baru, aku tetap mati.”

²¹Raja Sedekiah lalu ngasuh aku ditutup ba tengah laman istana. Aku diau dia, lalu genap hari aku diberi setuku roti ari dapur ti alai orang begagaka roti, nyentuk ngagai maya semua roti di nengeri nya nyau abis.