Read Iban Jeremiah 38 Bible Online

Jeremiah 38 - Iban bible

Jeremiah 38

¹Sepatiah anak Matan, Gedaliah anak Pasur, Jehukal anak Selemiah, enggau Pasur anak Malkiah ninga aku madahka ngagai orang mayuh pasal

²TUHAN ti udah nyebut, “Barang sapa mengkang diau dalam nengeri tu deka mati beperang, tauka mati keberuran tauka mati laban penyakit. Tang orang ke pansut lalu nyerahka diri ngagai orang Babilon, enda kena bunuh. Sida deka mengkang idup.”

³Aku udah mega madahka TUHAN udah nyebut, “Aku deka nyerahka nengeri tu ngagai bala soldadu orang Babilon, lalu sida deka ngalahka iya.”

⁴Udah nya bala pemesai betemu enggau raja, lalu bejaku, “Orang tu enda tau enda dibunuh. Jaku iya ngasuh bala soldadu takut, lalu iya mega ngenakutka semua orang bukai ti agi tinggal di nengeri tu. Iya ukai deka nulung orang mayuh tang semina deka ngemediska sida.”

⁵Ku Raja Sedekiah nyaut, “Sebarang ku kita enggau iya. Aku enda ulih nagang kita.”

⁶Nya alai sida mai aku, lalu ngulurka aku ngena tali ke dalam telaga anak raja ke benama Malkiah, ti ba tengah laman istana nya. Telaga nya nadai ai, semina tanah luchak aja, lalu aku terunjam ba tanah luchak nya.

⁷Tang Ebetmelek orang Etiopia, ti udah dipeliri lalu bekereja dalam istana raja, bisi ninga pasal sida ke udah muai aku ke dalam telaga. Lebuh maya nya raja benung ngatur pechara ba Pintu Benjamin.

⁸Ebetmelek lalu mansang ngagai Pintu Benjamin lalu bejaku enggau raja,

⁹“Tuan Raja, sida tu udah ngereja utai ti salah. Sida udah muai Jeremiah ngagai telaga. Iya tetap deka mati keberuran dia, laban nadai agi pemakai dalam nengeri tu.”

¹⁰Raja lalu ngasuh Ebetmelek mai tiga iku lelaki lalu narit aku pansut ari telaga nya sebedau aku mati.

¹¹Ebetmelek lalu mansang enggau lelaki tiga iku nya ngagai bilik setor istana lalu ngambi gari kain, ti diulurka iya ngagai aku ngena tali.

¹²Iya ngasuh aku ngengkahka gari kain nya ba kechiak aku, ngambika tali nya enda ngemediska aku. Aku lalu ngengkahka kain nya ba kechiak aku

¹³lalu sida narit aku pansut ari telaga nya. Udah nya aku lalu ditanka ba tengah laman nya.

¹⁴Nyadi sekali Raja Sedekiah ngasuh orang mai aku ngagai iya ba penama ti ketiga ngagai Rumah Sembiang, lalu ku iya bejaku, “Aku deka nanya nuan, lalu aku ngasuh nuan madahka utai ti bendar ngagai aku.”

¹⁵Ku aku nyaut, “Enti aku madahka utai ti bendar ngagai nuan, nuan deka munuh aku, lalu enti aku meri nuan jaku lalau, nuan enggai mending.”

¹⁶Nya alai Raja Sedekiah besemaya enggau aku ngena chara belalai, ku iya, “Aku besumpah dalam nama Allah Taala ti idup, Allah Taala ti meri kitai seput, aku enda munuh nuan tauka nyerahka nuan ngagai orang ke deka munuh nuan.”

¹⁷Udah nya aku lalu madahka ngagai Sedekiah utai ti udah disebut TUHAN ti Pemadu Bekuasa, ti Allah Taala ke disembah orang Israel, “Enti nuan nyerahka diri ngagai bala pemesai raja menua Babilon, nuan enda dibunuh, lalu nengeri tu enda ditunu. Nuan enggau kita sebilik enda bunuh.

¹⁸Tang enti nuan enda nyerahka diri, nengeri tu deka diserahka ngagai orang Babilon, lalu sida deka nunu nengeri tu, lalu nuan enda ulih ngerarika diri ari sida.”

¹⁹Tang ku raja nyaut, “Aku takutka bala kitai empu ti udah ngalih ari orang Babilon, enggai ke aku diserahka ngagai sida, lalu diperinsa.”

²⁰Ku aku bejaku, “Nuan enda diserahka ngagai sida. Aku minta nuan ngasika pesan TUHAN. Nya baru nuan nadai utai ngawa, lalu enda kena bunuh.

²¹Tang enti nuan majak enggai nyerahka diri, tu utai ti udah dipandangka TUHAN ngagai aku dalam genera:

²²semua indu ke agi tinggal dalam istana raja menua Judah deka dibai pansut magang ngagai bala pemesai raja menua Babilon. Sida indu nya deka nyebut ngagai nuan: ‘Bala pangan rapat nuan udah nesatka nuan lalu enda begunaka penemu nuan. Lalu diatu lebuh kaki nuan udah lekat ba tanah luchak, bala pangan nuan ninggalka nuan.’

²³Ku aku nampung jaku aku, “Semua bini kita enggau bala anak kita deka dibai pansut magang ngagai orang Babilon, lalu nuan empu enda ulih ngerarika diri ari orang Babilon tang deka ditangkap raja menua Babilon lalu nengeri tu deka ditunu retung.”

²⁴Ku Sedekiah nyaut, “Anang nusui randau tua tu ngagai orang bukai, nya baru nuan nadai utai ngawa.

²⁵Enti bala pemesai nemu aku udah berandau enggau nuan, sida deka datai lalu nanyaka ngagai nuan utai ti disebut tua. Sida deka besemaya enda munuh nuan, enti nuan madahka semua utai ngagai sida.

²⁶Semina padahka ngagai sida nuan udah minta aku kasihka nuan lalu enda nutup nuan baru dalam rumah jil nya, lalu enda nejuka nuan mati dia.”

²⁷Semua bala pemesai datai lalu nanya aku, lalu aku madahka ngagai sida semina utai ti diasuh raja sebut aku. Sida nadai ulih ngereja lebih agi ari nya, laban orang nadai udah ninga randau kami duai raja.

²⁸ Aku lalu ditanka ba tengah laman istana nyentuk ngagai hari Jerusalem alah.