Read Iban Jeremiah 4 Bible Online

Jeremiah 4 - Iban bible

Jeremiah 4

¹Ku TUHAN bejaku, “Orang Israel, enti kita deka nguingka diri, kuingka diri ngagai Aku baru. Enti kita tetap ati ngagai Aku, lalu muai semua engkeramba ti dipegedika Aku,

²kita tau besumpah atas nama Aku. Nya baru[3] semua bansa deka minta Aku merekatka sida, lalu sida deka muji Aku.”

³ Ku TUHAN bejaku ngagai orang Judah enggau ngagai orang Jerusalem, “Changkul meh tanah umai ti apin dichangkul. Anang nanam benih kita ba madang duri.

⁴Titihka sempekat kita enggau Aku ti TUHAN, lalu serahka diri empu ngagai Aku, kita orang Judah enggau kita orang Jerusalem. Enti kita enda, pengeringat Aku deka mau baka api, ketegal utai ti jai ti udah dikereja kita. Api nya deka mau, lalu nadai orang ulih madamka iya.”

⁵Sepu terumpit di serata menua! Manjung enggau nyawa ti inggar sereta terang! Asuh orang Judah enggau orang di Jerusalem rari ngagai nengeri ti bekuta.

⁶Tunjukka jalai ngagai Sion! Rari ngidupka nyawa diri! Anang betangguh! TUHAN benung mai penusah enggau pengerusak ti besai ari utara.

⁷Baka singa ti mansutka diri ari endur alai iya ti belalai, baka nya meh iya ke ngerusak semua bansa udah belabuh mansang. Iya deka datai lalu ngerusak menua Judah. Nengeri di menua Judah deka nyadi tembawai, lalu nadai orang nguan.

⁸Nya alai, rasukka kain guni, lalu nyabak duie-duie laban TUHAN agi majak ringat ngagai orang Judah.

⁹Ku TUHAN bejaku, “Ba hari nya, bala raja enggau bala pemesai deka takut. Sida imam deka temati-kutu, lalu sida nabi deka alit ati.”

¹⁰Udah nya aku lalu bejaku, “TUHAN ti Pemadu Tinggi, Nuan udah nipu orang Jerusalem! Nuan udah madahka sida deka diau likun, tang diatu pedang baru deka mumpung pala sida.”

¹¹Maya deka datai alai orang Jerusalem deka dipadahka pasal ribut ti angat ti deka muput ngagai sida ari menua puang. Ribut nya ukai ribut ti enda deras ti semina ulih ngebuka ampa aja.

¹²Ribut ti datai ari asuh TUHAN deka deras agi ari nya! TUHAN Empu ke bejaku ngukum nembiak Iya.

¹³Peda bala munsuh datai baka mua hari. Kerita perang sida baka ribut puting beliung, lalu kuda sida laju agi ari menaul. Tulah meh kitai tu! Mati meh kitai tu!

¹⁴Jerusalem, basu penyai ari ati nuan, ngambika nuan dilepaska. Ni pengelama nuan majak berunding deka bedosa?

¹⁵Bala seruan ari nengeri Dan enggau ari menua ti bebukit di menua Epraim, madahka berita ti enda manah.

¹⁶Sida datai laban sida deka meri jaku tangkan ngagai mayuh bengkah bansa, sereta madahka ngagai Jerusalem pasal bala munsuh ke datai ari menua ti jauh. Bala munsuh nya deka manjung ngelaban mayuh bengkah nengeri di menua Judah

¹⁷lalu ngelulung Jerusalem baka bala lelaki ke nyaga umai, laban orang di Jerusalem udah angkat ngelaban TUHAN. TUHAN udah bejaku.

¹⁸Judah, nuan empu ke ngasuh pemerinsa tu ninggang nuan, ketegal chara nuan idup enggau ketegal utai ti udah dikereja nuan. Dosa nuan empu ti udah ngasuh pemerinsa tu nyadi. Pemerinsa tu udah ngerejang tungkul ati nuan.

¹⁹Akai! Enda aku ulih natka diri pedis baka tu! Tungkul ati aku nyau ketap-ketap! Aku enda ulih enda bemunyi. Aku ninga munyi terumpit enggau panjung orang ke beperang.

²⁰Penusah ti besai nyau betangkan-tangkan nyadi. Semua menua tu nyau nyadi tembawai magang. Tekala nya langkau kain kami dirusak. Tirai langkau kain kami abis charik.

²¹Ni pengelama aku enda tau enda meda perang tu nyadi lalu ninga terumpit ti inggar bemunyi?

²²Ku TUHAN bejaku, “Nembiak Aku endang beli. Sida enda nemu Aku. Sida baka anak mit ti beli. Sida enda meretika utai. Sida landik ngereja utai ti jai, tang enda nemu ngereja utai ti manah.”

²³Aku malik ngagai dunya, lalu meda dunya nya nadai tumbuh utai. Aku engkadah ke langit, tang nadai meda penampak.

²⁴Aku malik ngagai bukit, lalu meda bukit berenyang, lalu munggu beguyat.

²⁵Aku nadai meda mensia. Indah burung deh udah abis terebai kebukai.

²⁶Menua ti ami udah nyadi menua puang. Nengeri di menua nya nyau nyadi tembawai magang laban pemalat pengeringat TUHAN. (

²⁷TUHAN endang udah madahka semua dunya deka kusi, tang Iya enda ngerusak dunya datai ke abis.)

²⁸Ketegal nya, dunya deka ngulit. Langit deka petang. TUHAN udah bejaku lalu enggai ngubah runding Diri. Iya udah mutuska runding Diri lalu enggai nyurutka Diri.

²⁹Lebuh orang ninga munyi nyawa bala soldadu ti nepan kuda, enggau bala soldadu ti besenyataka panah, semua orang deka rari. Sekeda deka rari ngagai utan. Sida ke bukai deka niki ba sebelah batu. Genap buah nengeri nadai agi mensia, lalu nadai orang deka diau dia agi.

³⁰Jerusalem, nuan deka diukum! Nama kebuah nuan begari ngena kain ungu? Nama kebuah nuan ngena batu ti berega, lalu ngechat mata diri? Nadai guna nuan ngias gamal diri. Ambai nuan udah nulak nuan lalu deka munuh nuan.

³¹Aku ninga munyi orang nyabak, munyi indu ke radai deka beranak, nyawa ti rauh-rauh munyi indu ke terubah iya beranak. Nya sabak Jerusalem lebuh iya rangap-rangap nyintak seput, entepaka jari iya, lalu bejaku, “Nadai penyadi meh aku tu! Sida deka datai munuh aku!”