Read Iban Jeremiah 40 Bible Online

Jeremiah 40 - Iban bible

Jeremiah 40

¹TUHAN bejaku ngagai aku udah bekau Nebusaradan, ti nyadi tuai soldadu, udah ngelepaska aku di Ramah. Aku udah dibai ngagai Ramah ditanchang ngena rantai, sama enggau semua orang bukai ari Jerusalem enggau ari menua Judah ke ditabanka nyadi orang tangkap ngagai menua Babilon.

²Tuai soldadu mai aku ke tisi, lalu bejaku, “TUHAN Allah Taala nuan udah madahka Diri deka ngerusak menua tu,

³lalu diatu Iya udah ngereja nya munyi ti ku Iya. Semua utai tu nyadi laban bansa kita udah bedosa ngelaban TUHAN, lalu enda ngasika Iya.

⁴Diatu aku muka rantai ari jari nuan, lalu ngelepaska nuan. Nuan tau mansang ngagai menua Babilon sama enggau aku, enti nuan deka, lalu aku deka ngintu nuan. Tang enti nuan enggai, nya nadai ngawa. Nuan tau milih sebarang endur di menua tu alai nuan diau, lalu nuan tau bejalai ngagai sebarang endur nuan deka.”

⁵Lebuh iya meda aku enda nyaut,[51] iya lalu bejaku, “Pulai meh nuan baru ngagai Gedaliah anak Ahikam, uchu Sapan, ti udah diasuh raja menua Babilon nyadi tuan gabenor ke nengeri di menua Judah. Nuan tau diau enggau iya, lalu diau begulai enggau orang mayuh, tauka bejalai ngagai sebarang endur ti manah ku ati nuan.” Udah nya iya lalu meri aku siti pemeri, enggau bekal, lalu ngasuh aku mupuk.

⁶Aku lalu mupuk lalu diau enggau Gedaliah di Mispah, lalu begulai enggau orang mayuh ke tinggal di menua tu.

⁷ Lebuh bala pemesai enggau bala soldadu orang Judah ke apin nyerahka diri ninga raja menua Babilon udah ngasuh Gedaliah anak Ahikam nyadi tuan gabenor menua Judah megai semua lelaki, indu enggau bala nembiak, iya nya orang ke pemadu seranta di menua Judah, ti enda ditabanka ngagai menua Babilon,

⁸sida, enggau bala sida mansang ngagai Gedaliah di Mispah. Bala sida nya nyengkaum Ismail anak Netaniah, Johanan anak Kareah, Seraiah anak Tanhumet, bala anak lelaki Epai ari Netopah, enggau Jesaniah ari Maakah.

⁹Ku Gedaliah bejaku ngagai sida, “Anang takut betuaika orang Babilon. Ngentapka diri di menua tu, lalu betuaika raja menua Babilon, ngambika kita nyamai diau.

¹⁰Aku empu deka diau di Mispah lalu nyadi pengari kita lebuh orang Babilon datai ditu. Tang kita tau ngumpul lalu nyimpan wain, minyak kana enggau buah, lalu diau ba genturung pendiau ti dikedekaka kita.”

¹¹Lebuh semua orang Israel ti diau di Moap, Amon, Edom, enggau menua bukai, ninga raja menua Babilon udah ngemendarka sekeda orang Israel diau di menua Judah, lalu udah ngasuh Gedaliah anak Ahikam nyadi gabenor sida,

¹²semua sida bela mulaika diri ngagai menua Judah, ngagai Gedaliah di Mispah, ari endur alai sida ke udah ngachir pendiau. Sida lalu besimpanka mayuh wain enggau buah.

¹³Udah bekau nya, Johanan enggau bala tuai soldadu ti enda nyerahka diri, datai ngagai Gedaliah di Mispah

¹⁴lalu bejaku enggau iya, “Kati nuan enda nemu Raja Baalis menua Amon udah ngasuh Ismail munuh nuan?” Tang Gedaliah enda arapka nya.

¹⁵Udah nya Johanan bejaku kediri enggau iya, “Awakka aku mupuk lalu munuh Ismail. Nadai orang nemu sapa ti munuh iya. Nama kebuah kitai nejuka iya munuh nuan? Laban nya deka mambarka pendiau semua orang Judah ti udah begelumu ngelingi nuan, lalu ngasuh penusah ti besai ninggang semua orang ke agi tinggal di menua Judah.”

¹⁶Tang ku Gedaliah nyaut, “Anang! Utai ti disebut nuan pasal Ismail nya ukai utai ti amat!”