Read Iban Jeremiah 41 Bible Online

Jeremiah 41 - Iban bible

Jeremiah 41

¹ Dalam bulan ti ketujuh ba taun nya, Ismail anak Netaniah, uchu Elisama, siku orang ari ruang bilik raja ke mega nyadi tuai pemesai raja, mansang ngagai Mispah, mai sepuluh iku orang, deka betemu enggau Tuan Gabenor Gedaliah. Lebuh semua sida agi benung beserumpu makai,

²Ismail enggau sepuluh iku bala iya nyintak pedang sida, lalu munuh Gedaliah.

³Ismail mega munuh semua orang Israel ke enggau Gedaliah di Mispah, enggau bala soldadu orang Babilon ke bisi dia.

⁴Hari siti, sebedau orang nemu Gedaliah udah dibunuh,

⁵lapan puluh iku orang datai ari Sekem, Siloh enggau Samaria. Sida udah ngukur ragum sida, nyarikka gari sida, lalu ngurik tubuh diri. Sida mai gandum enggau menyan ti deka diberi ba Rumah Sembiang.

⁶Ismail anak Netaniah lalu pansut ari Mispah ngambat sida, enggau sabak. Lebuh iya betemu enggau sida, iya lalu bejaku, “Aram betemu enggau Gedaliah.”

⁷Lebuh sida udah tama ngagai nengeri nya, Ismail enggau bala iya lalu munuh sida, lalu muai bangkai sida ngagai siti telaga.

⁸Tang dalam raban sida nya bisi sepuluh iku orang ke bejaku enggau Ismail munyi tu, “Anang munuh kami! Kami bisi gandum, barli, minyak kana, enggau ai manyi ti udah dilalaika kami di padang.” Nya alai iya enda nyadi munuh sida.

⁹Telaga ti udah alai Ismail muai bangkai bala orang ke udah dibunuh iya nya telaga ti besai[52] ti udah ditumbak Raja Asa lebuh iya benung diserang Raja Baasa menua Israel. Ismail ngisi telaga nya enggau bangkai sida.

¹⁰Udah nya iya nangkap bala anak indu raja, enggau semua orang bukai di Mispah, ti udah diserahka tuai soldadu, Nebusaradan, ngagai Gedaliah. Ismail nabanka sida nyadi orang tangkap ngagai menua Amon.

¹¹Tang lebuh Johanan anak Kareah enggau semua bala tuai soldadu ke sama enggau iya ninga penyalah ti udah dikereja Ismail,

¹²sida lalu mai semua bala sida nyerang Ismail. Sida tetemuka iya ba semak letung ti besai di Gibeon.

¹³Lebuh bala orang ke udah ditangkap Ismail tepedaka Johanan enggau bala tuai soldadu ke enggau iya datai, sida gaga ati,

¹⁴nguing lalu belanda ngagai sida.

¹⁵Tang Ismail enggau lapan iku orang ari bala iya, ulih ngerarika diri ari Johanan, ngagai menua Amon.

¹⁶Johanan enggau bala tuai soldadu ke enggau iya lalu ngempuruka orang ke udah ditangkap lalu ditabanka Ismail ari Mispah udah bekau iya ti munuh Gedaliah. Bala orang ke digempuruka sida nya nyengkaum soldadu, sida ke indu, bala anak mit, enggau lelaki ti udah dipeliri.

¹⁷Sida takutka orang Babilon, laban Ismail udah munuh Gedaliah, ti udah diletak raja menua Babilon nyadi gabenor menua nya. Nya alai sida mupuk ngagai menua Ejip, ngerarika diri ari orang Babilon. Di rantau jalai sida ngetu di Kimham semak Betlehem.