Read Iban Jeremiah 42 Bible Online

Jeremiah 42 - Iban bible

Jeremiah 42

¹Udah nya semua tuai soldadu, nyengkaum Johanan anak Kareah enggau Asariah[53] anak Hosaiah, datai sama enggau orang ke tinggi enggau ke baruh pangkat

²lalu bejaku enggau aku. “Kami minta nuan ngereja utai ti dipinta kami! Kami minta nuan besampi ngagai TUHAN Allah Taala kita, ke kami. Besampi ke semua kami ke agi idup. Dulu suba kami mayuh tubuh, tang diatu, baka ke dipeda nuan, ka semina mimit aja kami tu agi idup.

³Besampi minta TUHAN Allah Taala kita nunjukka jalai ti patut ditengah kami, enggau utai ti patut dikereja kami.”

⁴Aku lalu nyaut, “Au. Aku deka besampi ngagai TUHAN Allah Taala kitai, nitihka pinta kita, lalu madahka ngagai kita semua utai ti disebut Iya. Siti pen nadai meh utai nya deka dilalaika aku ari kita.”

⁵Lalu ku sida bejaku enggau aku, “Awakka TUHAN besaksi ngelaban kami, enti kami enda ngasika semua jaku ti diberi TUHAN Allah Taala kita ngagai nuan.

⁶Nemuka kami lantang ati, tauka enda, kami sigi deka ngasika TUHAN Allah Taala kitai. Kami minta nuan besampi ngagai Iya ngarika kami. Kami nadai utai ngawa enti kami ngasika Iya.”

⁷Sepuluh hari udah bekau nya, TUHAN bejaku ngagai aku.

⁸Aku lalu mesanka Johanan, semua bala tuai soldadu ke bisi enggau iya, enggau semua orang bukai.

⁹Ku aku bejaku ngagai sida, “Kita udah ngasuh aku ngenataika peminta kita ngagai TUHAN Allah Taala ke disembah orang Israel. Tu utai ti disebut Iya,

¹⁰‘Enti kita deka diau mendam di menua tu, nya baru Aku deka niri negika kita, ukai ngeruntuhka kita. Aku deka nanam kita, ukai numbangka kita. Pengerusak ti udah diasuh Aku ninggang kita udah ngasuh ati Aku balat tusah.

¹¹Anang takutka raja menua Babilon laban Aku bisi enggau kita, lalu Aku deka ngelepaska kita ari kuasa iya.

¹²Laban Aku kasihka kita, nya alai Aku deka ngasuh iya kasihka kita, lalu iya deka ngasuh kita pulai ngagai menua kita empu. Aku ti TUHAN udah bejaku.’

¹³“Tang kita ke agi tinggal di menua Judah, enda tau enda ngasika TUHAN Allah Taala kita lalu kita enda tau enggai diau di menua tu. Kita enda tau nyebut, ‘Kami deka mupuk lalu diau di menua Ejip, ngambika kami enda agi kena serang tauka ninga orang betesau mai beperang, tauka lapar.’ Enti kita nyebut nya, TUHAN ti Pemadu Bekuasa, ti Allah Taala ke disembah orang Israel nyebut, ‘Enti kita keras deka mupuk lalu diau di menua Ejip,

¹⁶perang ti tau ngerampit ngagai kita, deka nuntung kita, lalu lapar pungkang ti tau ngerampit ngagai kita deka nitihka kita, lalu kita deka mati di menua Ejip.

¹⁷Semua orang ke keras deka mupuk lalu diau di menua Ejip, deka mati beperang, tauka mati keberuran, tauka mati laban penyakit. Nadai siku sida deka idup. Nadai siku sida ulih ngerarika diri ari penusah ti besai ti deka diasuh Aku ninggang sida.’

¹⁸“Ku TUHAN Allah Taala ke disembah orang Israel bejaku, ‘Baka pengeringat enggau pemedis ati Aku ti udah dibubuhka Aku ngagai orang Jerusalem, baka nya meh pemedis ati Aku deka dibubuhka Aku ngagai kita, enti kita mupuk ngagai menua Ejip. Orang deka geli meda kita. Sida deka beduan kita, lalu ngaga nama kita nyadika leka jaku sumpah.[54] Kita nadai meda menua tu agi.’ ”

¹⁹Lalu ku aku nampung jaku aku, “Nyadi ke kita ke agi tinggal di menua Judah, TUHAN enda ngasuh kita mupuk ngagai menua Ejip. Nya alai diatu aku meri kita jaku tangkan:

²⁰kita diatu ngereja penyalah ti tau ngambi nyawa. Kita udah minta aku besampika kita ngagai TUHAN Allah Taala kitai, lalu kita udah besemaya deka ngereja semua utai ti diasuh Iya.

²¹Aku diatu udah madahka jaku TUHAN Allah Taala kita, tang kita enda ngasika semua utai ti udah diasuh Iya sebut aku ngagai kita.

²²Nya alai, kingatka tu: kita deka mati beperang, tauka mati keberuran, tauka mati laban penyakit, di menua ti deka digagai lalu diuan kita.”