Read Iban Jeremiah 43 Bible Online

Jeremiah 43 - Iban bible

Jeremiah 43

¹Lebuh aku udah tembu madahka semua utai ti diasuh TUHAN Allah Taala sebut aku ngagai orang mayuh,

²Asariah anak Hosaiah enggau Johanan anak Kareah, enggau semua orang bukai ti sumbung, lalu bejaku enggau aku, “Nuan bula. Nadai TUHAN Allah Taala kitai udah ngasuh nuan nagang kami mupuk lalu diau di menua Ejip.

³Nuan bejaku ngelaban kami ari sungkak Baruk anak Neriah, ngambika orang Babilon bekuasa atas kami, lalu ulih munuh kami tauka nabanka kami ngagai menua Babilon.”

⁴Nya alai, Johanan tauka bala pemesai soldadu, tauka orang mayuh, enggai ngasika jaku TUHAN ti ngasuh sida mengkang diau di menua Judah.

⁵ Udah nya Johanan enggau semua pemesai soldadu mai semua orang ke agi tinggal di menua Judah, mupuk ngagai menua Ejip, sama enggau semua orang ke udah pulai ari mayuh bengkah menua ti udah alai sida ngachir diau.

⁶Bala sida nya nyengkaum sida ke lelaki, enggau indu nembiak, enggau bala anak indu raja. Sida mai semua orang ke udah diserahka tuai soldadu Nebusaradan ngagai Gedaliah, nyengkaum kami duai Baruk.

⁷Sida enda ngasika jaku TUHAN, lalu mupuk ngagai menua Ejip nyentuk ngagai nengeri Tapanes.

⁸Di Tapanes TUHAN bejaku ngagai aku,

⁹“Ambi berapa igi batu ti besai, lalu tumbakka batu nya ba jalai raya[55] di mua penama ngagai rumah perintah di nengeri tu, lalu awakka orang Israel meda nuan ngereja pengawa nya.

¹⁰Udah nya padahka ngagai sida, Aku TUHAN ti Pemadu Bekuasa, ti Allah Taala ke disembah orang Israel, deka mai nembiak Aku Raja Nebukadnesar ari menua Babilon ngagai endur tu, lalu iya[56] deka nudukka kerusi diraja iya ba atas batu tu ti udah dilamun Aku enggau tanah,[57] lalu deka nirika langkau kain diraja iya ba atas batu enggau tanah tu.

¹¹Nebukadnesar deka datai lalu ngalahka menua Ejip. Orang ke udah diukum mati laban penyakit, deka mati laban penyakit. Orang ke udah diukum nyadi orang tangkap lalu ditabanka, deka ditabanka nyadi orang tangkap, lalu orang ke endang udah diukum mati beperang, deka mati beperang.

¹²Aku deka nunu rumah sembiang bala petara orang Ejip, lalu raja menua Babilon deka nunu tauka nabanka bala petara orang Ejip. Baka pengibun bedus ke nesai kutu ari gari sida, baka nya meh raja menua Babilon deka ngerepas semua utai ari menua Ejip, lalu udah nya iya deka pulai menang ngagai menua iya empu.

¹³Iya deka ngerusak batu keramat ti di Heliopolis, di menua Ejip, lalu iya deka nunu rumah sembiang bala petara orang Ejip.”