Read Iban Jeremiah 44 Bible Online

Jeremiah 44 - Iban bible

Jeremiah 44

¹TUHAN bejaku ngagai aku pasal semua orang Israel ti diau di menua Ejip, dalam nengeri Mikdol, Tapanes, enggau Mempis, enggau di selatan menua Ejip.

²Ku TUHAN ti Pemadu Bekuasa, ti Allah Taala ke disembah orang Israel bejaku, “Kita empu udah meda pengerusak ti udah diasuh Aku ninggang Jerusalem enggau semua nengeri bukai di menua Judah. Indah nyentuk ngagai diatu deh semua nengeri nya agi tembawai, lalu nadai orang nguan

³laban orang Judah udah ngereja penyai lalu nyungkak Aku ringat. Sida udah ngenjuk piring ngagai petara bukai, lalu betuaika petara ti enda kala disembah sida tauka disembah kita, tauka disembah aki ini kita.

⁴Aku majak ngirumka bala nembiak Aku, iya nya sida nabi, ngagai kita kena nagang kita ngereja utai ti jai, ti dipegedika Aku.

⁵Tang kita enggai mending tauka enggai ibuh. Kita enggai ngelengkaka pengawa kita ke jai beberika piring ngagai petara bukai.

⁶Nya alai Aku mubuhka pengeringat enggau pemedis ati Aku ngagai semua nengeri di menua Judah, enggau ba semua jalai raya di Jerusalem, lalu Aku nunu sida. Semua nengeri nya nyadi tembawai magang, lalu orang geli meda sida, nyentuk ngagai sehari tu.

⁷“Nya alai Aku TUHAN ti Pemadu Bekuasa, ti Allah Taala ke disembah orang Israel, diatu nanyaka kebuah kita ngereja utai ti jai nya ba diri empu. Kati kita keran deka ngasuh pengerusak ninggang lelaki enggau indu, bala nembiak enggau bala anak mit datai ke sida nadai agi idup siku?

⁸Nama kebuah kita besembahka engkeramba, enggau ngenjuk piring ngagai petara bukai di menua Ejip ti alai kita ke diau, lalu nyungkak Aku ringat? Kati kita ngereja utai nya laban kita keran deka ngerusak diri empu, ngambika semua bansa di dunya tu beduan kita, lalu ngena nama kita nyadika leka jaku sumpah?[58]

⁹Kati kita enda ingatka semua utai ti jai ti udah dikereja bala aki ini kita, bala raja orang Judah, enggau bini sida, enggau utai ti udah dikereja kita empu sereta enggau bini kita, dalam nengeri menua Judah, enggau ba sebelah jalai raya di Jerusalem?

¹⁰Tang nyentuk ngagai sehari tu kita apin ngemaruhka diri. Kita apin masa Aku tauka diau nitihka semua adat ti udah diberi Aku ngagai kita enggau ngagai aki ini kita.

¹¹“Nya alai, Aku TUHAN ti Pemadu Bekuasa, ti Allah Taala ke disembah orang Israel, deka ngelaban kita lalu ngerusak semua menua Judah.

¹²Nyadi pasal orang Judah ti agi idup, ke keran deka mansang ngagai menua Ejip lalu diau di menua nya, Aku deka nentuka semua sida dirusak magang. Semua sida, nyengkaum sida ke besai enggau ke mit, deka mati di menua Ejip, nemuka mati beperang tauka mati keberuran. Orang deka geli meda sida. Orang deka beduan sida, lalu ngena nama sida nyadika leka jaku sumpah.[59]

¹³Aku deka ngukum sida ke diau di menua Ejip, baka Aku ke ngukum Jerusalem ngena perang, keberuran enggau penyakit.

¹⁴Nadai siku orang Judah ti agi idup, ti udah mupuk lalu diau di menua Ejip, ulih ngerarika diri tauka ulih idup. Nadai siku sida deka pulai baru ngagai menua Judah, menua ti dikelengauka sida. Nadai siku sida deka pulai baru ngagai menua Judah, kelimpah ari dua tiga iku orang ke tasah.”

¹⁵Udah nya semua lelaki ke nemu bini diri udah ngenjuk piring ngagai petara bukai, enggau semua indu ke bediri dia, nyengkaum orang Israel ti diau di selatan menua Ejip - mayuh amat bala sida - lalu nyaut aku,

¹⁶“Kami enggai mendingka utai ti dipadahka nuan ngagai kami dalam nama TUHAN.

¹⁷Kami deka ngereja semua utai ti deka dikereja kami. Kami deka ngenjuk piring ngagai petara indu kami, iya nya Kuin Serega, lalu kami deka nuang wain nyadika piring ti diberi ngagai iya, baka ke udah dikereja kami, bala aki ini kami, raja enggau bala tuai kami, di nengeri menua Judah enggau ba sebelah jalai raya di Jerusalem. Lebuh maya nya menya kami mayuh pemakai, kaya-raja, lalu nadai penusah.

¹⁸Tang sekumbang kami ke udah badu agi ngenjuk piring ngagai Kuin Serega, lalu badu agi nuang wain nyadika piring ti diberi ngagai iya, kami nadai utai dikemisi, lalu bala kami udah mati beperang enggau mati keberuran.”

¹⁹Lalu ku sida ke indu nampung jaku sida, “Lebuh kami manggang roti ti digaga neladan gamal Kuin Serega, ngenjuk piring ngagai iya, lalu nuang wain nyadika piring ngagai iya, laki kami ngemendarka utai ti dikereja kami.”

²⁰Udah nya aku bejaku ngagai semua sida ke lelaki enggau sida ke indu ke udah nyaut aku munyi nya tadi,

²¹“Nyadi pasal piring ti udah diberi kita, diberi bala aki ini kita, bala raja enggau bala tuai kita, enggau ti diberi orang ke di menua tu, ba nengeri di menua Judah enggau ba sebelah jalai raya di Jerusalem - kati kita ngumbai TUHAN enda nemu, tauka enda ingatka utai nya?

²²Diatu menua kita udah nyadi tembawai, lalu enda diuan mensia. Orang geli meda menua kita, lalu orang ngena nama menua kita nyadika leka jaku sumpah[60] laban TUHAN enda tan natka penyai ulah kita agi.

²³Penusah ti besai tu ninggang kita diatu laban kita udah ngenjuk piring ngagai petara bukai, lalu bedosa ngelaban TUHAN, laban kita enda ngasika semua jaku Iya.”

²⁴Aku diatu deka madahka ngagai semua orang mayuh, kelebih agi ngagai sida ke indu, utai ti disebut TUHAN ti Pemadu Bekuasa, ti Allah Taala ke disembah orang Israel ngagai orang Judah ti diau di menua Ejip: “Kita enggau bini kita udah besumpah enggau Kuin Serega. Kita udah besemaya deka ngenjuk piring ngagai iya, lalu nuang wain nyadika piring ti diberi kita ngagai iya, lalu kita udah ngamatka semaya kita. Barang ku jaku! Kamatka aja meh semaya kita! Kamatka aja meh sumpah kita!

²⁶Tang diatu pendingka sumpah ti udah digaga Aku ti TUHAN dalam nama Aku ti bekuasa ngagai semua kita orang Israel ti diau di menua Ejip: Aku enggai sekali-kali ngemendarka kita besumpah ngena nama Aku munyi tu, ‘Aku besumpah dalam nama TUHAN ti Pemadu Tinggi ti idup!’

²⁷Aku deka nentuka kita enda kaya-raja, tang deka dirusak. Semua kita deka mati magang, nemuka mati beperang, tauka mati laban penyakit, datai ke nadai siku kita agi idup.

²⁸Tang sekeda kita enda mati lalu mulaika diri ari menua Ejip ngagai menua Judah. Nya baru sida ke agi idup nya deka nemu jaku sapa ke amat, enggi Aku tauka enggi sida.

²⁹Aku ti TUHAN deka meri kita siti tanda kena nunjukka Aku deka ngukum kita ba endur tu, kena ngamatka semaya Aku ti deka ngerusak kita.

³⁰ Aku deka nyerahka Raja Hopra menua Ejip ngagai bala munsuh iya ke keran deka munuh iya, baka Aku ti udah nyerahka Raja Sedekiah menua Judah ngagai Raja Nebukadnesar menua Babilon, ti udah nyadi munsuh iya lalu keran deka munuh iya.”