Read Iban Jeremiah 46 Bible Online

Jeremiah 46 - Iban bible

Jeremiah 46

¹TUHAN bejaku ngagai aku pasal semua bansa bukai,

² berengkah enggau Ejip. Tu utai ti disebut Iya pasal bala soldadu Raja Neko menua Ejip, ti udah dialahka Raja Nebukadnesar menua Babilon di Karkemis semak Sungai Eupratis dalam taun ti keempat Jehoiakim nyadi raja menua Judah:

³“Ku bala pemesai orang Ejip manjung, ‘Sediaka terabai kita lalu mansang beperang!

⁴Sediaka lalu tepan kuda kita! Berintai meh kita, lalu rasukka selapuk kebal kita! Ansah sangkuh kita! Rasukka baju kebal kita!’

⁵“Tang nama utai ti dipeda aku?” ku TUHAN nanya. “Sida nikal laban takut. Bala soldadu sida alah lalu nyurutka diri. Sida takut lalu belanda enggau naka ulih lalu enda malik kebelakang.

⁶Sida ke laju belanda enda ulih ngerarika diri. Bala soldadu enda ulih ngerarika diri. Sida tesangkut lalu tetingkap di utara, ba tebing Sungai Eupratis.

⁷Sapa orang nya ke angkat baka ai pasang ba Sungai Nile, baka sungai ti bah ampuh tebing?

⁸Iya nya Ejip, ti angkat baka ai pasang ba Sungai Nile, baka sungai ti bah ampuh tebing. Ku Ejip bejaku, ‘Aku deka angkat lalu ngampuhka dunya. Aku deka ngerusak semua nengeri enggau orang ke diau dia.

⁹Asuh kuda bejalai lalu asuh kerita perang bejalai! Asuh bala soldadu mupuk, orang ari Etiopia, ari Libia, enggau orang ke landik bekenaka panah ari Lidia.’ ”

¹⁰Tu meh hari TUHAN Allah Taala ti Pemadu Bekuasa. Sehari tu Iya deka malas. Sehari tu Iya deka ngukum bala munsuh Iya. Pedang Iya deka makai sida datai ke kenyang, lalu ngirup darah sida datai ke puas. Sehari tu TUHAN ti Pemadu Bekuasa deka ngaga orang ke dialahka Iya di utara nyadika piring ba tebing Sungai Eupratis.

¹¹Orang Ejip, mansang meh kita ngagai menua Giliat[61] ngiga ubat! Semua ubat kita nadai guna magang. Nadai utai ulih ngeraika kita.

¹²Semua bansa udah ninga pasal pemalu kita. Semua orang udah ninga sabak kita. Soldadu tesangkut ba kaki pangan diri, lalu sida sama rebah.

¹³ Lebuh Raja Nebukadnesar menua Babilon datai nyerang menua Ejip, TUHAN bejaku ngagai aku. Ku Iya,

¹⁴“Padahka berita tu dalam semua nengeri di menua Ejip, di Mikdol, Mempis, enggau Tapanes: ‘Besedia ngetanka diri. Semua utai ti dikemisi kita deka dirusak magang lebuh maya perang!

¹⁵Nama kebuah petara Apis ti bekuasa, ti disembah kita, alah? Laban TUHAN udah mantap iya!’

¹⁶Bala soldadu kita udah tesangkut lalu teterap.[62] Siku nyebut ngagai siku, ‘Jampat! Aram pulai ngagai menua ngagai bala kitai empu ngerarika diri ari pedang munsuh!’

¹⁷“Beri ngagai raja menua Ejip nama ti baru tu ‘Orang Ke Ragak Ngapa Ke Selalu Muai Peluang.’

¹⁸Aku TUHAN ti Pemadu Bekuasa, endang Raja. Aku tu Allah Taala ti idup. Baka Bukit Tabor ti tinggi agi ari semua bukit ti bukai enggau baka Bukit Karmel ti bediri tinggi atas tasik, baka nya meh gaya pengering orang ke nyerang kita.

¹⁹Sediaka diri nyadi orang tangkap, kita orang Ejip! Mempis deka nyadi menua puang, nyadi tembawai ti enda diuan mensia.

²⁰Ejip baka sapi ti indu ke gemu, diserang penyengat ari utara.

²¹Indah bala soldadu ke digaji iya deh nadai daya baka anak sapi. Sida enda nan, enda ngelaban. Semua sida nguing lalu rari. Hari sida diukum udah datai, maya sida dirusak.

²²Ejip rari, meresih munyi ular lebuh bala soldadu munsuh mansang nyerang sida. Sida nyerang iya ngena kapak, baka orang ke nebang kayu

²³lalu ngerusak utan tebal. Bala soldadu munsuh kelalu mayuh datai ke sida nyau enda ulih diitung agi. Sida mayuh agi ari buntak.

²⁴Orang menua Ejip deka dipechat. Sida alah diserang orang ke datai ari utara. Aku ti TUHAN, udah bejaku.”

²⁵Ku TUHAN ti Pemadu Bekuasa, ti Allah Taala ke disembah orang Israel bejaku, “Aku deka ngukum Amon, petara orang Tebes, sama enggau Ejip enggau bala petara iya sereta enggau bala raja iya. Aku deka ngambi raja menua Ejip enggau semua orang ke manggaika pengarap sida ba iya,

²⁶lalu nyerahka sida ngagai orang ke keran deka munuh sida, ngagai Raja Nebukadnesar menua Babilon enggau bala soldadu iya. Tang udah bekau nya ila, orang deka diau di menua Ejip baru, baka ke dulu kelia. Aku ti TUHAN, udah bejaku.”

²⁷ “Nembiak Aku, anang kita takut. Kita orang Israel, anang takut. Aku deka ngelepaska kita ari menua ti jauh, ari menua ti alai kita diau nyadi orang tangkap. Kita deka pulai baru ngagai menua diri empu lalu diau dalam pemaik. Kita deka diau likun, lalu nadai orang ulih ngenakutka kita.

²⁸Aku deka datai ngagai kita lalu ngelepaska kita. Aku deka ngerusak semua bansa ti udah alai Aku ngachirka kita, tang Aku enda ngerusak kita. Aku enggai nejuka kita enda diukum, tang lebuh Aku ngukum kita, Aku deka ngukum kita ngena atur ti lurus. Aku ti TUHAN, udah bejaku.”