Read Iban Jeremiah 47 Bible Online

Jeremiah 47 - Iban bible

Jeremiah 47

¹ Sebedau raja menua Ejip nyerang Gasa, TUHAN bejaku ngagai aku pasal menua Pilistin.

²Ku Iya: “Peda nuan! Ai mansang di utara lalu deka rarat baka bah sungai. Ai nya deka ngampuhka menua enggau semua utai di menua tu, nengeri enggau orang ke diau ditu. Mensia deka nyabak minta tulung. Semua orang di dunya tu deka bekeduie nyabak.

³Sida deka ninga munyi redup kaki kuda, munyi kerita perang, munyi guru kaki kerita. Apai indai enggai nikal ngambi anak sida, laban sida nyau lembut tulang.

⁴Maya udah datai alai ngerusak menua Pilistin, lalu mempang semua tulung ti agi tinggal datai ari Tire enggau Sidon. Aku ti TUHAN deka ngerusak orang Pilistin semua ke datai ari tebing pulau Krit.

⁵Orang di Gasa balat tusah ati, lalu orang Eskelon enda bemunyi. Ni pengelama orang Pilistin ti bukai deka ngulit?

⁶Ku kita ngangau, ‘Pedang TUHAN! Ni pengelama baru nuan deka badu agi bemunyi? Pulai meh nuan baru ngagai sarang nuan, belelak lalu diau jenuh!’

⁷Tang pedang nya enda ulih belelak, laban Aku udah meri iya pengawa. Aku udah ngasuh iya nyerang Askelon lalu nyerang orang ke diau ba tebing tasik.”