Read Iban Jeremiah 48 Bible Online

Jeremiah 48 - Iban bible

Jeremiah 48

¹ Tu utai ti disebut TUHAN pasal Moap: “Tulah meh orang Nebo laban nengeri sida udah dirusak! Nengeri Kiriataim udah alah, kuta iya ti kukuh udah runtuh, lalu orang ke diau dia dipechat.

²Mulia Moap nyau abis. Munsuh udah ngalahka Hesbon lalu bekira deka ngerusak bansa Moap. Nengeri Madmen deka badu agi bemunyi. Mayuh bengkah bala soldadu deka datai nyerang iya.

³Orang di Horonaim ngangau, ‘Penusah! Pengerusak!’

⁴“Moap udah dirusak. Pendingka sida ke mit nyabak.

⁵Dinga munyi sida bekeduie nyabak sepemanjai jalai niki ngagai Luhit, munyi sabak orang ke tusah ati di rantau jalai nurun ngagai Horonaim.

⁶‘Rari kita ngidupka nyawa diri!’ ku sida bejaku. ‘Belanda meh kita baka keledai kampung di menua puang!’

⁷“Moap, nuan udah ngarapka pengering enggau pengaya nuan, tang diatu indah nuan empu deh deka alah. Petara nuan Kemos deka dibuai ngagai menua bukai, sama enggau bala anak iya enggau bala imam iya.

⁸Nadai nengeri ti enda dirusak. Lebak enggau emperan deka dirusak. Aku ti TUHAN udah bejaku.

⁹Dirika batu kena ngelai kubur Moap, laban Moap deka dirusak enda lama da agi. Semua nengeri iya deka nyadi tembawai magang, lalu nadai orang nguan.” (

¹⁰Tulah meh orang ke enda ngereja pengawa TUHAN enggau pengabis ati sida! Tulah meh orang ke enda mantap, enda munuh!)

¹¹Ku TUHAN bejaku, “Moap endang seruran diau dalam pemaik, lalu iya nadai kala dibuai ngagai menua bukai. Moap nyau baka wain ti ditejuka ngereman enda dikeruga, lalu nadai kala dituang ari benda sigi ngagai benda sigi. Iya endang enda kala kabau, lalu iya endang nyamai asai baka selama.

¹²“Nya alai diatu, maya deka datai alai Aku deka ngasuh orang nuang Moap baka wain. Sida deka nuang semua wain ari benda, lalu mechahka benda nya.

¹³Udah nya orang Moap deka asa ngapa arapka petara Kemos ti disembah sida, baka orang Israel ke asa ngapa arapka Betel, petara ti dikarapka sida.

¹⁴“Kita ti lelaki di menua Moap, nama kebuah kita ngumbai diri bujang berani, soldadu ti berani, ti udah diuji lebuh beperang?

¹⁵Menua Moap enggau semua nengeri di menua nya deka dirusak. Sida lelaki ke agi biak sereta tegap gamal, udah dibunuh. Aku tu meh Raja, TUHAN ti Pemadu Bekuasa, lalu Aku udah bejaku.

¹⁶Menua Moap deka diukum. Iya deka dirusak enda lama da agi.

¹⁷“Ngulitka bansa Moap meh kita ke pangan iya, semua kita ke nemu penampak nama iya. Sebut, ‘Iya nadai agi bekuasa. Mulia enggau kuasa iya udah abis.’

¹⁸Kita ti diau di Dibon, nurun meh kita ari penuduk kita ke tinggi lalu duduk ba tanah ti rangkai. Iya ke ngerusak Moap bisi ditu lalu udah ngaga kuta di Moap nyadi tembawai.

¹⁹Kita ti diau di Aroer, bediri meh kita ba tisi jalai, lalu nganti. Tanya bala sida ke rari, tanyaka ngagai sida utai ti udah nyadi.

²⁰Lalu sida deka nyaut, ‘Moap udah alah. Nyabak meh kita ke iya. Iya udah dipechat. Padahka di sepemanjai Sungai Arnon pasal Moap ti udah dirusak!’

²¹“Semua nengeri ba emperan ti tinggi ba atas bukit udah diukum magang: Holon, Jasah, Mepat,

²²Dibon, Nebo, Bet Diplataim,

²³Kiriataim, Betgamul, Betmeon,

²⁴Keriot, enggau Bosrah. Semua nengeri menua Moap, ti jauh enggau ti semak, udah diukum magang.

²⁵Pengering Moap udah abis. Kuasa iya udah dirusak. Aku ti TUHAN udah bejaku.”

²⁶Ku TUHAN bejaku, “Tumi Moap datai ke mabuk, laban iya udah angkat ngelaban Aku. Moap deka maringka diri ba mutah iya empu, lalu orang deka ketawa.

²⁷Moap, kati nuan ingatka diri ti udah ngeleseka orang Israel? Nuan udah ngaga sida baka orang ke udah kena tangkap sama enggau bala penchuri.

²⁸“Kita ti diau di Moap, tinggalka nengeri kita! Mupuk meh kita lalu diau ba tingkah batu! Awakka kita baka burung achang ti begagaka sarang ba tebiang tisi darung.

²⁹Moap sumbung amat! Aku udah ninga pasal penyumbung, enggau peninggi ati sida, pasal sida ke balat muji diri.

³⁰Aku ti TUHAN nemu penyumbung sida. Sida temegah ngapa, lalu utai ti dikereja sida enda ulih tan lama.

³¹Nya alai Aku deka nyabakka semua orang ke diau di Moap, enggau ke orang ke diau di Kir-heseret.

³²Aku deka nyabakka orang ke diau di Sipmah, lebih balat agi ari Aku ke nyabakka orang ke diau di Jaser. Nengeri Sipmah, nuan tu baka dan anggur ti nyuntai meraka Tasik Mati nyentuk ngagai Jaser. Tang diatu buah nuan, enggau buah anggur nuan udah dirusak.

³³Pengelantang enggau pengaga udah dirampas ari menua Moap ti ami. Aku udah ngasuh wain badu agi pansut ari pitan anggur. Nadai agi orang ngaga wain lalu manjung gaga ati.

³⁴“Orang di Hesbon enggau Elealeh ngangau,[63] lalu kangau sida ulih didinga di Jahas. Kangau sida ulih didinga orang di Soar, lalu kangau nya mega ulih didinga di Horonaim enggau Eklat Selisiyah. Indah Sungai Nimrin deh udah rangkai.

³⁵Aku deka nagang orang Moap ngaga piring tunu ba endur alai sida ke besembah, sereta nagang sida ngenjuk piring ngagai bala petara sida. Aku ti TUHAN udah bejaku.

³⁶“Nya alai Aku ngulitka Moap, enggau ke orang ke diau di Kir-heseret, baka orang ke nyepu kesuling lebuh nganjung orang mati, laban semua reta tengkira sida udah abis magang.

³⁷Semua sida udah ngukur pala lalu ngempat ragum sida. Semua sida udah ngurik jari sida, lalu begari ngena kain guni.

³⁸Ba semua perabung rumah di Moap, enggau ba semua padang ti ba nengeri, nyau nadai utai bukai tang bala orang ke ngulit, laban Aku udah mechahka Moap baka benda ti enda diguna.

³⁹Moap udah pechah! Nyabak meh kita! Moap udah dipechat. Iya udah nyadi tembawai, lalu semua bansa ti ngelingi iya, ngeleseka iya magang. Aku ti TUHAN udah bejaku.”

⁴⁰TUHAN udah madahka siti bansa deka nyambarka Moap baka menaul ti terebai,

⁴¹lalu nengeri enggau kuta di menua Moap deka alah. Lebuh maya nya ila bala soldadu Moap deka takut baka indu ke radai deka beranak.

⁴²Moap deka dirusak, lalu bansa nya abis, laban iya udah angkat ngelaban Aku.

⁴³Utai ti balat ngenakut, lubang kebung, enggau panjuk deka ngipa orang Moap. TUHAN udah bejaku.

⁴⁴Barang sapa nguji ngerarika diri ari utai ti balat ngenakut, deka labuh ngagai lubang kebung, lalu barang sapa mansutka diri ari lubang kebung, deka kena sintak panjuk, laban TUHAN udah netapka maya Moap deka dirusak.

⁴⁵Orang ke tasah, ti nadai daya agi, nguji ngiga pengelikun di Hesbon, nengeri ti udah diperintah Raja Sihon dulu menya, tang nengeri nya retung diempa api.[64] Api udah nganguska garis entara menua, enggau tuchung bukit di Moap, menua orang ke rindu beperang.

⁴⁶Tulah meh nuan Moap! Orang ke nyembah Kemos, udah dirusak, lalu bala anak lelaki enggau anak indu sida udah ditabanka nyadi orang tangkap.

⁴⁷Tang jemah ila, TUHAN deka ngasuh Moap nyadi kaya-raja baru. Nya meh utai ti deka dikereja TUHAN ngagai Moap.