Read Iban Jeremiah 49 Bible Online

Jeremiah 49 - Iban bible

Jeremiah 49

¹ Tu utai ti disebut TUHAN pasal Amon: “Dini alai bala lelaki orang Israel? Kati orang nadai ngetanka menua sida? Nama kebuah sida nejuka orang ke nyembah Molek ngerampas menua raban bansa Gat lalu ngentapka diri dia?

²Tang maya deka datai alai Aku deka ngasuh orang ke diau dalam indu nengeri menua Rabah ninga munyi orang ke beperang, lalu nengeri nya deka nyadi tembawai, lalu genturung pendiau di menua nya ditunu retung. Nya baru Israel deka ngambi menua sida pulai baru ari jari orang ke udah ngerampas menua sida.

³Kita orang Hesbon, nyabak meh kita! Nengeri Ai udah dirusak! Kita indu ke di Rabah, ngulit meh kita! Rasukka kain guni lalu ngulit. Belanda meh kita kia-kia charut runding. Petara kita ke benama Molek deka ditabanka ngagai menua bukai, sama enggau bala imam enggau bala anak raja iya.

⁴Kita ti enda tetap ati! Nama kebuah kita temegah ngapa? Kita nadai pengering agi. Nama kebuah kita manggaika pengarap kita ba kuasa kita empu, lalu madahka orang nadai berani nyerang kita?

⁵Aku deka ngasuh kita dituntung utai ti balat ngenakut. Semua kita deka rari. Genap iku kita deka rari ngidupka nyawa diri, lalu nadai orang ngempung bala soldadu kita baru.

⁶“Tang jemah ila Aku deka ngasuh Amon nyadi kaya-raja baru. Aku ti TUHAN udah bejaku.”

⁷ Tu utai ti disebut TUHAN ti Pemadu Bekuasa pasal Edom: “Kati orang Edom enda nemu berunding agi? Kati bala penyanding penemu sida enda agi nemu madahka utai ti patut dikereja sida? Kati sida nadai agi penemu-dalam?

⁸Kita orang Dedan, nguing lalu rari meh kita! Belalai meh kita! Aku deka ngerusak peturun Esau laban maya udah datai alai Aku patut ngukum sida.

⁹Lebuh orang ngumpul buah anggur, sida ninggalka dua tiga leka ba batang anggur, lalu lebuh bala perumpak datai malam hari, sida mai semina utai ti dikedekaka sida.

¹⁰Tang Aku udah ngambi semua utai ari peturun Esau, lalu ngebakka endur alai sida belalai, ngambika sida enda ulih belalai agi. Semua orang Edom dirusak magang. Nadai siku sida agi idup.

¹¹Tinggalka anak patu kita ba Aku, laban Aku deka ngidupka sida; lalu lakka sida indu ke balu manggaika pengarap sida ba Aku.

¹²Laban ku TUHAN bejaku: “Enti sema orang ke enda patut ngirup ari mangkuk ukum nya, diasuh ngirup ari mangkuk nya, kati kita ngumbai diri enda diukum? Enda. Kita enda tau enda diukum, lalu ngirup ari mangkuk nya!

¹³Aku Empu udah besumpah madahka nengeri Bosrah deka ngasuh orang geli, lalu nyadi menua puang. Orang deka beduan iya, lalu ngena nama iya nyadika leka jaku sumpah.[65] Semua genturung pendiau ti semak nya deka nyadi tembawai belama iya. Aku ti TUHAN udah bejaku.”

¹⁴Ku aku bejaku, “Edom, aku bisi udah nerima pesan ari TUHAN. Iya udah ngirumka siku seruan ngasuh semua bansa ngempuruka bala soldadu sida, lalu besedia nyerang nuan.

¹⁵TUHAN deka ngasuh nuan lemi, lalu nadai orang deka bebasaka nuan.

¹⁶Penyumbung nuan udah nipu nuan empu. Nadai orang takutka nuan munyi ti disangka nuan. Nuan diau ba tingkah batu, ba tuchung bukit ti tinggi. Tang taja pen nuan diau ba endur ti tinggi baka burung menaul, TUHAN deka narit nuan ke baruh. TUHAN udah bejaku.”

¹⁷Ku TUHAN bejaku, “Pengerusak ti deka ninggang Edom amat balat, datai ke semua orang ke mansa deka temati-kutu sereta takut.

¹⁸ Utai ti deka nyadi ba Edom nya sebaka enggau utai ti udah nyadi ba Sodom, enggau Gomorah lebuh nengeri dua buah nya enggau semua nengeri ti mit semak nya dia, dirusak. Nadai orang deka diau dia agi. Aku ti TUHAN udah bejaku.

¹⁹ Baka singa ti pansut ari babas ti repa ngimbai Sungai Jordan lalu mansang ngagai padang rumput ti galak, baka nya meh Aku deka datai lalu ngasuh orang Edom rari tekala nya ari menua sida. Nya baru tuai bansa ke dipilih Aku deka megai perintah di menua nya. Sapa ulih dibandingka enggau Aku? Sapa berani nyakap Aku? Ni raja ke ulih ngelaban Aku?

²⁰Nya alai pendingka pelan ti udah digaga Aku kena Aku ngelaban orang Edom, enggau utai ti deka dikereja Aku ngagai orang ke diau di nengeri Teman. Indah bala anak mit sida deh deka diirit kebukai, lalu semua orang deka geli meda nya.

²¹Lebuh Edom alah, utai deka bemunyi inggar, datai ke semua dunya berenyang, lalu munyi sabak orang ke takut ulih didinga ari Teluk Akaba.

²²Munsuh deka nyerang Bosrah baka menaul ti nyambar. Lebuh maya nya ila bala soldadu menua Edom deka takut baka indu ke radai deka beranak.”

²³ Tu jaku TUHAN pasal Damaskus: “Orang di nengeri Hamat enggau Arpat irau sereta tusah ati laban sida udah ninga berita ti enda manah. Ati ti balat irau nyau ngalun baka gelumbang ti di tasik.

²⁴Orang Damaskus nyau lemi, nguing deka rari, lalu begau abis ati.[66] Sida natka pemedis enggau pemerinsa baka indu ke radai deka beranak.

²⁵Nengeri ti tebilang sereta selalu lantang[67] nya nadai agi diuan mensia.

²⁶Ba hari nya sida ke bujang di nengeri nya deka dibunuh ba jalai raya di nengeri nya empu, lalu semua bala soldadu nengeri nya deka dibunuh magang.

²⁷Aku deka nyelup dinding kuta Damaskus, lalu nunu istana Raja Benhadat. Aku TUHAN ti Pemadu Bekuasa udah bejaku.”

²⁸Tu utai ti disebut TUHAN pasal raban bansa Kedar enggau pasal semua pelilih menua ti dipegai Hasor, ti udah alah laban Raja Nebukadnesar menua Babilon: “Serang orang ke diau di Kedar, lalu rusak raban bansa orang ke diau di timur!

²⁹Rampas langkau kain, jelu tupi, tirai langkau kain, enggau semua utai dalam langkau kain sida. Ambi jelu unta sida, lalu padahka ngagai orang mayuh, ‘Utai ti balat ngenakut bisi ngelingi kita!’

³⁰“Kita orang Hasor, Aku ti TUHAN meri kita jaku tangkan ngasuh kita rari lalu belalai, laban Raja Nebukadnesar menua Babilon udah bepekat deka ngelaban kita, lalu tu utai ti disebut iya,

³¹‘Aram kitai nyerang orang nya ke ngumbai diri likun nadai utai ngawa! Nengeri sida nadai pintu tauka kunchi, sereta nadai orang nyaga.’

³²“Rampas jelu unta sida enggau semua jelu tupi sida! Aku deka ngachirka semua orang ke netak buk diri pandak, ngagai semua endur, lalu Aku deka ngasuh penusah ti besai ninggang sida.

³³Hasor deka nyadi menua puang belama iya, nyadi endur alai semina pasun aja diau. Nadai orang deka diau dia agi. Aku ti TUHAN udah bejaku.”

³⁴Lebuh Sedekiah baru belabuh nyadi raja menua Judah, TUHAN ti Pemadu Bekuasa bejaku ngagai aku pasal menua Elam.

³⁵Ku Iya, “Aku deka munuh semua orang ke landik ngena panah, ti udah ngasuh menua Elam kering.

³⁶Aku deka ngasuh ribut muput ari semua endur lalu mangka ngagai Elam, lalu Aku deka ngachirka orang ari nengeri nya ngagai semua endur, ngambika sida tasah ngagai semua menua.

³⁷Aku deka ngasuh orang Elam takutka munsuh ti deka munuh sida. Ulih pengeringat Aku, Aku deka ngerusak orang Elam, lalu ngasuh mayuh bala soldadu ngelaban sida, datai ke Aku udah ngeluska sida.

³⁸Aku deka ngerusak bala raja enggau bala tuai sida, lalu nudukka kerusi diraja Aku dia.

³⁹Tang udah bekau nya ila Aku deka ngasuh Elam nyadi kaya-raja baru. Aku ti TUHAN udah bejaku.”