Read Iban Jeremiah 5 Bible Online

Jeremiah 5 - Iban bible

Jeremiah 5

¹Kita orang Jerusalem, belanda meh kita nengah jalai raya kita! Palik ke kiba, palik ke kanan! Awakka kita empu meda! Giga ba sebelah pasar! Kati kita bisi tetemuka orang ti ngereja utai ti ngena sereta nguji tetap ati ngagai Allah Taala? Enti kita bisi tetemuka orang ke baka nya, TUHAN deka ngampun Jerusalem.

²Taja pen kita ngumbai diri nyembah TUHAN, tang kita enda ngereja utai nitihka jaku kita.

³TUHAN endang ngiga ati ti tetap. Iya malu kita, tang kita enda bedulika Iya. Iya ngeredakka kita, tang kita enggai diajar. Kita kieh, lalu enggai nesal ati ke dosa kita.

⁴Udah nya aku berunding, “Sida tu orang ke nadai nemu utai. Sida beli. Sida enda nemu utai ti dipinta Allah Taala, utai ti diasuh TUHAN kereja sida.

⁵Aku deka mansang ngagai orang ke nyadi tuai lalu bejaku enggau sida. Enda patut sida enda nemu utai ti dipinta Allah Taala, utai ti diasuh TUHAN kereja sida.” Tang semua sida enggai diperintah TUHAN lalu enggai ngasika Iya.

⁶Nya kebuah singa deka datai ari utan lalu munuh sida. Ukui kampung ari menua puang deka nyarikka sida, lalu engkuli deka nyubuk utai ti deka diempa sida ba sebelah nengeri. Enti orang dia pansut ke luar, sida deka dipecharikka jelu laban sida mayuh dosa sereta udah suah ninggalka Allah Taala.

⁷Ku TUHAN nanya, “Nama kebuah Aku patut ngampun dosa nembiak Aku? Sida udah ninggalka Aku lalu udah nyembah engkeramba. Aku nupi nembiak Aku datai ke sida kenyang, tang sida butang lalu bekendak enggau indu sundal.

⁸Sida nyau baka kuda lelaki ti kenyang sereta kanji. Genap iku sida inginka bini pangan diri.

⁹Kati Aku enda patut ngukum sida ketegal semua utai nya? Ku TUHAN bejaku. Kati Aku enda patut malas ngagai bansa orang nya?

¹⁰Aku deka ngasuh munsuh mampat kebun anggur nembiak Aku tang ukai ngerusak sida abis lengis. Aku deka ngasuh sida nyarau dan, laban dan nya ukai enggi Aku.

¹¹Orang Israel enggau orang Judah enda tetap ati ngagai Aku. Aku ti TUHAN, udah bejaku.”

¹²Nembiak TUHAN udah besangkalka Iya, lalu udah nyebut, “Nadai Iya deka ngereja utai. Nadai penusah deka ninggang kitai, lalu kitai enda diserang munsuh tauka laban lapar pungkang.”

¹³Sida udah bejaku ngumbai nabi semina kutap-kutap ngapa, lalu nadai mai pesan ari TUHAN. Ku TUHAN Allah Taala ti Pemadu Bekuasa bejaku ngagai aku, “Jeremiah, laban orang tu udah nyebut nya, Aku deka ngasuh leka jaku Aku nyadi baka api dalam nyawa nuan. Orang mayuh deka nyadi baka kayu, lalu api nya deka nganguska sida.”

¹⁵Orang Israel, TUHAN deka mai siti bansa ari menua ti jauh nyerang kita. Bansa nya kering sereta lama udah nguan dunya tu, bansa ti enda ditemu kita jaku.

¹⁶Bala soldadu sida besenyataka panah, kering, lalu munuh enggau nadai pengasih.

¹⁷Sida deka makai utai ti ditanam kita enggau pemakai kita. Sida deka munuh anak lelaki enggau anak indu kita. Sida deka munuh raban jelu bedus enggau raban jelu sapi kita, lalu ngerusak batang anggur enggau kayu ara kita. Nengeri ti bekuta, ti dikarapka kita, deka dirusak bala soldadu sida.

¹⁸Ku TUHAN bejaku, “Tang taja pia, lebuh maya nya ila Aku enda ngerusak semua nembiak Aku abis lengis.

¹⁹Lebuh sida nanyaka kebuah Aku ngereja semua utai tu, padahka ngagai sida, Jeremiah, baka sida ke udah ninggalka Aku lalu betuaika petara orang bansa bukai di menua sida empu, baka nya meh sida deka betuaika orang bansa bukai di menua orang.”

²⁰Ku TUHAN bejaku, “Padahka ngagai bala peturun Jakop, padahka ngagai orang ke di menua Judah:

²¹ “Anang enda mending, kita orang ke beli sereta lap, ke bisi mata, tang enda ulih meda, ke bisi pending, tang enda ulih ninga.

²² Aku tu TUHAN. Nama kebuah kita enda nangika Aku? Nama kebuah kita enda getar-getar di mua Aku? Aku ngengkahka pasir nyadika garis entara darat enggau tasik, entara ti tan, lalu enda ulih dilangkah tasik. Tasik nyangka begelumbang, tang iya enda ulih ngelangkah garis entara nya. Gelumbang nyangka besegum, tang iya enda ulih ngelanggar garis entara nya.

²³Tang kita tu kieh sereta ngelaban. Kita udah limpang, lalu ninggalka Aku.

²⁴Kita nadai kala berunding deka nangika Aku, taja pen Aku meri kita ujan lebuh musin ruruh daun, enggau lebuh musin bungai, lalu meri kita musin alai kita ngetau genap taun.

²⁵Tang dosa kita udah nagang kita bulih utai ti manah.

²⁶“Orang ke jai diau enggau bala nembiak Aku. Sida nan pukat[4] baka ke deka nangkap burung,[5] tang sida udah nan panjuk kena nangkap mensia.

²⁷Baka orang ke ngasu ke ngisi sangkar sida enggau burung, baka nya meh sida udah ngisi rumah diri enggau utai ti dichuri sida. Nya kebuah sida bekuasa sereta kaya,

²⁸gemu sereta chukup utai diempa. Penyai pengawa sida endang nadai sekat. Sida nadai ngayanka pengelurus lebuh sida ngakim orang ke nadai apai indai, lalu sida enda nyaga hak orang ke seranta.

²⁹Kati Aku enda patut ngukum sida ketegal utai nya? Ku TUHAN bejaku. Kati Aku enda patut malas ngagai bansa tu?

³⁰Utai ti udu jai udah nyadi di menua tu:

³¹sida nabi benabi ngena jaku ti bula, lalu sida imam merintah nitihka asuh sida nabi; nembiak Aku rindu diperintah baka nya, tang nama utai ti deka dikereja sida lebuh pengujung dunya ila?”