Read Iban Jeremiah 50 Bible Online

Jeremiah 50 - Iban bible

Jeremiah 50

¹ Tu pesan ti diberi TUHAN ngagai aku pasal nengeri Babilon, enggau pasal orang ke diau dalam nengeri nya:

²“Tusui berita tu ngagai semua bansa! Padahka berita tu! Tuatka menira, lalu padahka berita tu! Anang ngelalaika berita tu! Babilon udah alah! Petara iya ke benama Maduk udah pechah! Bala engkeramba Babilon udah dipechat. Anak patung iya ti jai, udah redak!

³“Siti bansa ari utara udah datai nyerang menua Babilon, lalu ngaga menua nya nyadi menua puang. Mensia enggau jelu deka rari, lalu nadai orang deka diau dia agi.”

⁴Ku TUHAN bejaku, “Lebuh maya nya ila, orang Israel enggau orang Judah deka datai enggau sabak, ngiga Aku ti Allah Taala sida.

⁵Sida deka nanyaka jalai ngagai Sion, lalu mupuk ngagai endur nya. Sida deka ngaga siti sempekat ti meruan belama iya enggau Aku, lalu sida enda ngelanggar sempekat nya.

⁶“Bala nembiak Aku baka bedus ti udah ditejuka pengibun tesat ba sebelah bukit. Sida udah bejalai segau-segau ari bukit sigi ngagai bukit sigi, lalu sida enda ingatka endur alai rumah diri.

⁷Sida diserang semua orang ke tetemuka sida. Ku bala munsuh sida bejaku, ‘Sida udah bedosa ngelaban TUHAN, nya alai utai ti udah dikereja kitai enda salah. Aki ini sida udah manggaika pengarap sida ba TUHAN, lalu sida empu patut mengkang tetap ati ngagai Iya.’

⁸ “Orang Israel, rari meh kita ari orang Babilon! Angkat meh kita ari menua nya! Awakka kita nyadi orang ke terubah-rubah angkat ari nya.

⁹Aku deka nyungkak berapa buah bansa ti kering di utara nyerang menua Babilon. Sida deka berintai nyerang lalu ngalahka menua nya. Sida nya orang ke landik ngasu, nimbakka laja ti nadai kala salah.

¹⁰Utai di menua Babilon deka dirampas, lalu semua orang ke ngerampas utai ari menua nya deka puas ati. Aku ti TUHAN udah bejaku.”

¹¹Ku TUHAN bejaku, “Orang Babilon, kita udah ngerumpak bansa Aku. Kita lantang ati sereta gaga, bejalai kia-kia baka sapi ti ngindik gandum, baka kuda ti inggar bemunyi,

¹²tang nengeri nuan empu ti besai tu deka dikemaruhka lalu dipechat. Babilon deka nyadi bansa ti pemadu mit. Iya deka nyadi menua puang ti rangkai nadai ai.

¹³Ketegal pengeringat Aku, nadai orang deka diau di Babilon. Nengeri nya deka nyadi tembawai, lalu semua orang ke mansa deka temati-kutu sereta alit ati.

¹⁴“Kita ti landik ngena panah, berintai meh kita ngelaban Babilon lalu kelulung iya. Timbakka semua laja kita ngagai Babilon, laban iya udah bedosa ngelaban Aku ti TUHAN.

¹⁵Manjung meh kita ngelingi nengeri nya! Diatu Babilon udah nyerahka diri. Dinding kuta iya udah kebus lalu runtuh.[68] Aku diatu malas orang Babilon. Nya alai balas meh sida, lalu kereja ngagai sida baka ke udah dikereja sida ngagai orang bukai.

¹⁶Anang nejuka benih ditanam di menua nya, lalu anang nejuka utai diketau. Semua orang kampar ti diau dia deka takutka bala soldadu ti nyerang, lalu deka pulai baru ngagai menua sida empu.”

¹⁷Ku TUHAN bejaku, “Orang Israel baka bedus, digagai raban singa lalu pambar pendiau. Keterubah iya, sida diserang raja menua Asiria, lalu udah nya Raja Nebukadnesar ari menua Babilon ngerit tulang sida.

¹⁸Ketegal nya, Aku TUHAN ti Pemadu Bekuasa, ti Allah Taala ke disembah orang Israel, deka ngukum Raja Nebukadnesar enggau menua iya, baka Aku ti udah ngukum raja menua Asiria.

¹⁹Aku deka mai orang Israel pulai baru ngagai menua sida empu. Sida deka makai asil ari Bukit Karmel, enggau ari kandang menua Basan, lalu sida deka makai enggau sepeneka ati sida utai tanam ti tumbuh di menua Epraim enggau di menua Giliat.

²⁰Lebuh maya nya ila, dosa nadai ditemu di menua Israel, lalu penyai nadai ditemu di menua Judah, laban Aku deka ngampun orang ke diasuh Aku idup. Aku ti TUHAN udah bejaku.”

²¹Ku TUHAN bejaku, “Serang orang ke diau di Merataim enggau orang ke diau di Pekot. Bunuh lalu rusak sida.[69] Kereja semua utai ti diasuh Aku. Aku ti TUHAN udah bejaku.

²²Munyi orang ke beperang bisi didinga di menua nya, lalu pengerusak balat amat nyadi.

²³Babilon udah ngeredakka semua dunya ngena tukul, tang diatu tukul nya udah patah! Semua bansa tekenyit ati magang meda gaya utai ti udah nyadi di menua nya.

²⁴Babilon, nuan udah ngelaban Aku, tang nuan udah disintak panjuk ti ditan Aku kena Aku nangkap nuan, taja pen nuan enda nemu nya.

²⁵Aku udah muka endur alai Aku ke nyimpan senyata Aku, lalu enggau ati ti pedis Aku ngambi senyata nya pansut, laban Aku TUHAN ti Pemadu Bekuasa, bisi pengawa ti deka dikereja Aku di menua Babilon.

²⁶Kelulung lalu serang menua nya, lalu pechahka tibang gandum iya! Tugungka perapasan baka ke nugungka gandum! Rusak menua nya! Rusak magang semua utai di menua nya!

²⁷Bunuh semua soldadu sida! Kelar sida! Orang Babilon nadai penyadi agi! Tulah meh sida, laban maya udah datai alai sida deka diukum!” (

²⁸Orang ke tasah ngerarika diri ari menua Babilon lalu datai di Jerusalem, lalu sida nusui pasal jalai TUHAN Allah Taala kitai malas orang Babilon ketegal utai ti udah dikereja sida ngagai Rumah Sembiang.)

²⁹ “Asuh bala orang ke nemu ngena panah nyerang Babilon. Asuh semua orang ke nemu ngena panah enggau laja nyerang. Kelulung nengeri nya lalu anang nejuka orang ngerarika diri ari nengeri nya. Balas nengeri nya ngena penyai ti udah dikereja iya ngagai orang, lalu kereja ngagai iya baka ke udah dikereja iya ngagai orang, laban Babilon udah sumbung ngelaban Aku ti Kudus, ti Allah Taala ke disembah orang Israel.

³⁰Nya alai sida ke bujang di nengeri Babilon deka dibunuh ba sebelah jalai raya di nengeri nya, lalu semua soldadu iya deka dibunuh ba hari nya. Aku ti TUHAN udah bejaku.

³¹“Babilon, nuan sumbung. Nya kebuah Aku, TUHAN ti Pemadu Bekuasa, ngelaban nuan! Maya udah datai alai Aku ngukum nuan.

³²Bansa nuan ti sumbung deka tesangkut lalu tetingkap, lalu nadai orang deka ngangkatka nuan. Aku deka nunu semua nengeri nuan, lalu semua utai ti ngelingi nengeri nya deka dirusak magang.”

³³Ku TUHAN ti Pemadu Bekuasa bejaku, “Orang Israel enggau orang Judah ditekanka munsuh. Semua orang ke nangkap sida, nyaga sida lalu enggai ngelepaska sida.

³⁴Tang Iya ti deka ngelepaska sida nya kering. Nama Iya TUHAN ti Pemadu Bekuasa. Iya Empu deka nyaga sida, lalu mai pemaik ngagai dunya, tang deka mai penusah ngagai orang Babilon.”

³⁵Ku TUHAN bejaku, “Bunuh Babilon! Bunuh orang ke diau dalam iya, bala pemerintah iya enggau orang ke bepenemu-dalam.

³⁶Bunuh bala nabi iya ti bula! Sida nya endang amat beli! Bunuh bala soldadu iya! Naka meh pemalat sida takut!

³⁷Rusak semua kuda enggau kerita perang iya! Bunuh semua soldadu ke digaji iya! Naka meh pengelemi sida nya! Rusak semua reta tengkira iya. Rumpak lalu rampas.

³⁸Awakka kemarau nyadi di menua nya lalu ngerangkaika semua sungai. Babilon nya menua ti mayuh engkeramba, ti udah ngemelika orang mayuh.

³⁹ “Nya alai Babilon deka diuan bala antu enggau roh ti jai,[70] enggau burung ti enda tuchi. Menua nya enda agi diuan mensia, datai ke belama iya.

⁴⁰ Utai ti deka nyadi di Babilon nya sebaka enggau utai ti udah nyadi di Sodom enggau Gomorah, lebuh Aku ngerusak nengeri dua buah nya enggau semua nengeri ti mit semak nya dia. Nadai orang deka diau dia agi. Aku ti TUHAN udah bejaku.

⁴¹“Orang datai ari sebuah menua ti di utara, bansa ti kering di menua ti jauh. Mayuh raja sedia deka beperang.

⁴²Sida udah ngambi panah enggau pedang. Sida nya mangah lalu nadai nemu kasihka orang. Sida munyi segum pangka gelumbang, lebuh sida nepan kuda sida. Sida sedia deka beperang ngelaban Babilon.

⁴³Raja menua Babilon ninga berita nya lalu lembut tulang. Ati iya balat tusah, lalu ngasaika diri pedis baka indu ke radai deka beranak.

⁴⁴“Baka singa ti pansut ari babas ti repa ba tebing Sungai Jordan lalu mansang ngagai padang rumput ti galak, baka nya meh Aku ti TUHAN deka datai, lalu orang Babilon deka rari tekala nya ari nengeri sida. Nya baru tuai bansa ke dipilih Aku deka megai perintah di menua nya. Sapa ulih dibandingka enggau Aku? Sapa berani nyakap Aku? Ni raja ke ulih ngelaban Aku?

⁴⁵Nya alai pendingka pelan ti udah digaga Aku kena Aku ngelaban nengeri Babilon, enggau utai ti deka dikereja Aku ngagai orang ke diau di nengeri nya. Indah bala anak sida deh deka diirit, lalu semua orang deka takut.

⁴⁶Penginggar munyi Babilon alah deka ngasuh tanah berenyang di serata dunya, lalu munyi orang ke nyabak takut deka didinga bansa bukai.”