Read Iban Jeremiah 51 Bible Online

Jeremiah 51 - Iban bible

Jeremiah 51

¹Ku TUHAN bejaku, “Aku deka ngasuh ribut pengerusak[71] datai ngelaban menua Babilon enggau orang ke diau dia.

²Aku deka ngasuh orang kampar ngerusak menua Babilon baka ribut ti ngebuka rumput ti rangkai. Lebuh hari pengerusak nya datai, sida deka ngelulung lalu nyerang, lalu ngabiska semua utai di menua nya.

³Anang meri bala soldadu iya peluang nimbakka panah tauka ngerasukka baju kebal sida. Anang ngalau sida ke bujang! Bunuh semua bala soldadu sida!

⁴Sida deka bakal lalu mati ba sebelah jalai raya di semua nengeri sida.

⁵Aku TUHAN ti Pemadu Bekuasa, sigi enda ninggalka Israel enggau Judah, taja pen sida udah bedosa ngelaban Aku Allah Taala ke disembah orang Israel ti kudus.

⁶Rari meh kita ari menua Babilon! Rari ngidupka nyawa diri! Anang nejuka diri dibunuh ketegal dosa menua Babilon. Aku diatu malas lalu ngukum menua Babilon laban iya endang patut diukum.

⁷ Menua Babilon nya baka mangkuk emas ba jari Aku, ti ngasuh semua dunya mabuk. Semua bansa bela ngirup wain iya, lalu gila.

⁸Menua Babilon udah ngenyit alah, lalu dirusak! Ngulit meh kita ke iya! Ambi meh ubat kena ngubat bakal iya, nyangka iya ulih digeraika.

⁹ Ku orang kampar ti diau dia bejaku, ‘Kami udah nguji nulung menua Babilon, tang udah kelalu laun. Aram kitai angkat ari tu lalu pulai ngagai menua kitai empu. Enggau pengabis pengering Iya, Allah Taala udah ngukum menua Babilon, lalu udah ngerusak iya.’ ”

¹⁰Ku TUHAN bejaku, “Bala nembiak Aku manjung, ‘TUHAN udah nunjukka kitai tu endang amat ngena. Aram kitai mansang lalu madahka ngagai orang di Jerusalem pasal utai ti udah dikereja TUHAN Allah Taala kitai.’ ”

¹¹TUHAN udah nyungkak bala raja di menua Media, laban Iya deka ngerusak menua Babilon. Nya meh jalai Iya deka bebalaska Rumah Sembiang ti udah dirusak. Ku bala pemesai soldadu bejaku, “Ansah laja kita! Sediaka terabai kita!

¹²Tuatka menira kena ngepunka serang ngelaban dinding kuta nengeri Babilon. Tambahka pemayuh tubuh jejaga! Asuh orang nyaga nengeri! Asuh bala soldadu ngeramka ipa!” TUHAN udah ngereja utai munyi ti deka dikereja Iya ngagai orang Babilon.

¹³ Menua nya mayuh sungai, sereta kaya reta tengkira, tang timpuh iya udah abis, lalu tali seput iya udah putus.

¹⁴TUHAN ti Pemadu Bekuasa udah besumpah atas nama Iya Empu, madahka Diri deka ngasuh mayuh orang nyerang menua Babilon baka bala buntak, lalu sida deka manjung menang.

¹⁵TUHAN ngaga dunya ngena kuasa Iya. Ulih penemu-dalam Iya, Iya ngaga dunya lalu mintarka langit.

¹⁶Lebuh TUHAN bejaku, ai ti di langit[72] besegum. TUHAN mai mua hari ari tisi dunya. Iya ngasuh kilat nyelar lebuh hari ujan lalu ngirumka ribut ari bilik setor Iya.

¹⁷Lebuh orang meda nya, nya baru sida nemu diri beli sereta enda nemu utai. Sida ke begagaka engkeramba deka asa ngapa laban bala petara ti digaga sida nya utai ti pelesu sereta enda nemu enseput.

¹⁸Petara sida nya nadai guna, lalu patut dipechat. Sida deka dirusak lebuh TUHAN datai ngukum sida.

¹⁹Tang Allah Taala Jakop enda baka sida petara nya, laban Iya Empu ke nempa semua utai, lalu Iya udah milih Israel nyadika nembiak Iya. Nama Iya TUHAN ti Pemadu Bekuasa.

²⁰Ku TUHAN bejaku, “Menua Babilon, nuan tu tukul Aku, senyata ti dikena Aku beperang. Aku udah ngena nuan ngeredakka mayuh bengkah bansa enggau perintah,

²¹ngeredakka kuda enggau orang ke nepan sida, ngeredakka kerita perang enggau orang ke ngemudika sida,

²²munuh lelaki enggau indu, munuh sida ke tuai enggau ke biak, munuh nembiak ti lelaki enggau ti indu,

²³munuh pengibun bedus enggau raban bedus sida, munuh orang bumai enggau kuda ti dikena sida ngeradu tanah, ngalahka bala pemerintah enggau pemesai ti tinggi pangkat.”

²⁴Ku TUHAN bejaku, “Kita deka meda Aku malas menua Babilon enggau malas orang ke diau dalam iya ketegal semua penyai ti udah dikereja sida ngagai Jerusalem.

²⁵Menua Babilon, nuan tu baka bukit ti ngerusak semua dunya, tang Aku ti TUHAN tu munsuh nuan. Aku deka nangkap nuan, ngeruntuhka nuan, lalu nunu nuan nyadi amau.

²⁶Batu ari tembawai nuan nadai agi dikena baru begagaka rumah. Nuan deka nyadi menua puang belama iya. Aku ti TUHAN udah bejaku.

²⁷“Tuatka menira kena nesau orang mansang beperang! Sepu terumpit ngambika semua bansa ulih ninga! Sediaka semua bansa nyerang menua Babilon! Asuh perintah menua Ararat, Mini, enggau Askenas nyerang. Pilih siku pemesai nguluka bala nyerang. Bai kuda datai ke sida nyau ngemayuh bala buntak.

²⁸Sediaka semua bansa nyerang menua Babilon. Pesanka bala raja ari Media, bala tuai enggau bala pemesai sida, enggau bala soldadu ari semua menua ti dipegai sida.

²⁹Tanah begetar sereta berenyang laban TUHAN agi benung bejalaika pelan Iya ti deka ngaga menua Babilon nyadi menua puang, lalu enda agi diuan mensia.

³⁰Bala soldadu menua Babilon udah badu ngelaban, lalu mengkang dalam kuta sida. Sida nyau takut sereta nadai daya agi. Pintu nengeri udah runtuh, lalu rumah di nengeri nya nyau diempa api.

³¹Bala seruan nyau betangkan-tangkan belanda ngagai raja menua Babilon madahka nengeri iya udah dipasuk munsuh.

³²Munsuh udah ngalahka pemeraka ba sungai, lalu udah nyelup kuta ngena api. Bala soldadu menua Babilon udah begau abis ati.[73]

³³Enda lama da agi, munsuh deka mantap lalu ngindik sida baka ke nungku gandum. Aku TUHAN ti Pemadu Bekuasa, ti Allah Taala ke disembah orang Israel, udah bejaku.”

³⁴Raja menua Babilon udah mepat Jerusalem lalu makai iya. Iya udah ngambi semua utai ari nengeri nya baka ke nuang benda. Baka jelu ti besai, iya nelan nengeri nya. Iya udah nabanka utai ti dikedekaka iya lalu muai semua utai bukai.

³⁵Awakka orang Sion nyebut: “Awakka menua Babilon betanggungjawapka pemalat sida udah kasar enggau kitai!” Awakka orang Jerusalem nyebut, “Awakka menua Babilon betanggungjawapka semua pemerinsa ti udah ditatka kitai!”

³⁶Nya alai ku TUHAN bejaku ngagai orang Jerusalem, “Aku deka nyaga kita, lalu deka mejalka bala munsuh kita mayar utai ti udah dikereja sida ngagai kita. Aku deka ngerangkaika penatai ai di menua Babilon, lalu ngasuh sungai dia rangkai.

³⁷Menua nya deka nyadi tembawai alai jelu babas diau. Orang deka geli meda iya. Nadai orang deka diau dia, lalu semua orang ke meda iya deka takut magang.

³⁸Bansa orang Babilon bemunyi nginggar singa ti negung, lalu ngengar munyi anak singa.

³⁹Kati sida bam? Aku deka nyendiaka pengerami makai besai ke sida, lalu numi sida mabuk sereta rami. Sida deka tinduk lalu enda dani agi.

⁴⁰Aku deka mai sida ngagai endur alai sida deka disayat, baka anak domba, kambin, enggau bedus ti lelaki. Aku ti TUHAN udah bejaku.”

⁴¹Ku TUHAN bejakuka pasal Babilon: “Nengeri ti dipuji semua dunya, diatu udah alah! Naka meh penyai gaya Babilon ba mata bansa bukai!

⁴²Tasik udah ngampuhka Babilon lalu ngelamun iya ngena gelumbang ti besegum.

⁴³Semua nengeri nya jai amat dipeda, baka menua puang ti nadai ai, ti enda diuan tauka ditengah mensia.

⁴⁴Aku deka ngukum Bel, petara menua Babilon, lalu ngasuh iya nyerahka semua barang ti udah dichuri iya. Semua bansa enggai agi nyembah iya. “Dinding nengeri Babilon udah runtuh.

⁴⁵Orang Israel! Rari meh kita ari nengeri nya! Rari ngidupka nyawa diri ari pengeringat Aku ti balat.

⁴⁶Anang lemi semengat tauka takut ketegal berita ti selebubu ngapa. Tiap taun orang nusui mayuh bengkah berita ti selebubu ngapa, pasal pengachau ti nyadi di menua nya, enggau pasal raja ke nyerang pangan diri.

⁴⁷Nya alai maya deka datai alai Aku deka ngukum bala engkeramba menua Babilon. Semua menua nya deka dipechat, lalu semua orang ke diau di menua nya deka dibunuh magang.

⁴⁸ Semua utai di dunya enggau di langit deka manjung gaga ati lebuh Babilon alah laban orang ke datai ari utara deka ngerusak iya.

⁴⁹ Menua Babilon udah ngasuh orang mayuh dibunuh di serata dunya, lalu diatu menua Babilon empu deka alah laban iya udah ngasuh mayuh amat orang Israel dibunuh. Aku ti TUHAN udah bejaku.”

⁵⁰Ku TUHAN bejaku ngagai nembiak Iya di Babilon: “Kita udah ulih ngidupka nyawa diri! Nya alai mupuk meh kita diatu! Anang ngerindang diri agi! Taja pen kita jauh ari menua kita empu, kingatka Aku ti TUHAN kita, lalu kingatka Jerusalem.

⁵¹Ku kita, “Kami udah dipechat lalu kami malu. Kami ngasaika diri nadai daya agi laban orang kampar udah tama ngagai endur ti kudus dalam Rumah Sembiang.’

⁵²Nya alai, Aku madahka ngagai kita, maya deka datai alai Aku deka ngukum engkeramba menua Babilon, lalu orang ke bakal deka bedemuh di serata menua nya.

⁵³Enti sema Babilon ulih niki ke langit lalu ngaga kuta ti tegap din, agi meh Aku deka ngirumka orang ngerusak iya. Aku ti TUHAN udah bejaku.”

⁵⁴Ku TUHAN bejaku, “Dinga munyi sabak orang di Babilon, munyi orang ke ngulit ketegal rusak menua.

⁵⁵Aku ngerusak Babilon ngambika iya enda bemunyi agi. Bala soldadu belanda tama baka gelumbang lalu manjung nyerang.

⁵⁶Sida udah datai deka ngerusak Babilon. Bala soldadu Babilon ditangkap, lalu panah sida dipatahka. Aku tu Allah Taala ti ngukum penyai, lalu Aku deka ngukum Babilon laban iya endang patut diukum.

⁵⁷Aku deka numi bala pemerintah iya mabuk, iya nya orang ke bepenemu-dalam, bala tuai, enggau bala soldadu. Sida deka tinduk lalu enda dani agi. Aku ti Raja udah bejaku. Aku tu TUHAN ti Pemadu Bekuasa.

⁵⁸Dinding kuta nengeri Babilon ti tegap deka diruntuhka, lalu pintu iya ti tinggi ditunu retung. Pengawa ti dikereja semua bansa sigi nadai guna. Utai ti digaga sida diempa api ti mau. Aku TUHAN ti Pemadu Bekuasa udah bejaku.”

⁵⁹Orang ke nyempulang Raja Sedekiah nya Seraiah anak Neriah, uchu Mahseiah. Dalam taun ti keempat Sedekiah nyadi raja menua Judah, Seraiah nyempulang raja ngagai Babilon, lalu aku meri ajar ngagai Seraiah.

⁶⁰Aku nulis dalam siti bup jerita pasal semua pengerusak ti deka ninggang menua Babilon, sereta enggau semua utai bukai pasal menua nya.

⁶¹Ku aku madahka ngagai Seraiah, “Lebuh nuan datai di Babilon, nuan enda tau enda macha enggau nyawa ti inggar ngagai orang mayuh semua utai ti ditulis ditu.

⁶²Udah nya besampi, ‘TUHAN, Nuan udah madahka Diri deka ngerusak endur tu, ngambika utai nadai agi idup ditu, nemuka nya mensia tauka jelu, lalu endur tu deka nyadi baka menua puang belama iya.’

⁶³ Seraiah, lebuh nuan udah tembu macha bup tu ngagai orang mayuh, tanchangka sigi batu ngagai bup tu, lalu tikauka iya ngagai Sungai Eupratis

⁶⁴lalu sebut, ‘Tu meh gaya utai ti deka nyadi ngagai menua Babilon: iya deka tengelam lalu enda pansut agi laban TUHAN deka ngerusak iya.’ ”[74] Jaku Jeremiah abis naka tu.