Read Iban Jeremiah 6 Bible Online

Jeremiah 6 - Iban bible

Jeremiah 6

¹Orang Benjamin, rari meh kita ngagai endur ti likun! Rari ari Jerusalem! Sepu terumpit di Tekoa lalu tungkun api di Bet Hakerem kena megau orang mayuh. Penusah ti besai enggau pengerusak nyau deka datai ari utara.

²Nengeri Sion endang manah gaya, tang iya deka dirusak.

³Bala raja enggau bala soldadu sida deka nirika kem sida dia. Sida deka nirika langkau kain ngelingi nengeri nya, lalu genap iku sida deka nirika kem sida ba sebarang endur sida deka.

⁴Sida deka bejaku munyi tu, “Kita mesti besedia nyerang Jerusalem! Angkat! Kita deka nyerang ba urung tengah hari!” Tang udah nya sida deka nyebut, “Kelalu laun. Hari nyau deka lemai.

⁵Kitai deka nyerang lebuh malam hari, lalu ngerusak kuta nengeri nya.”

⁶TUHAN ti Pemadu Bekuasa udah ngasuh sida raja nya nebang kayu, lalu nugungka tanah kena ngelulung nengeri Jerusalem, laban ku TUHAN bejaku, “Aku deka ngukum nengeri tu, laban iya penuh laban pengawa ti nekanka pengidup orang.

⁷Baka telaga ti seruran mansutka ai ti beresi, baka nya meh Jerusalem seruran mansutka penyai. Aku ninga munyi pengachau enggau pengerusak di nengeri nya. Semina penyakit enggau telih aja ti dipeda Aku.

⁸Kita orang Jerusalem, awakka penusah nya nyadika jaku tangkan ke kita, laban enti enda pia Aku deka ngelengkaka kita. Aku deka ngaga nengeri kita nyadi menua puang, ti enda diuan mensia.”

⁹Ku TUHAN ti Pemadu Bekuasa bejaku ngagai aku, “Orang Israel deka diruruhka abis lengis ari menua tu, baka ke ngeruruhka buah anggur. Nya alai nuan enda tau enda ngidupka semua orang enggau naka ulih nuan, kala peluang agi bisi.”

¹⁰Ku aku nyaut, “Sapa deka mendingka aku enti aku bejaku ngagai sida lalu meri jaku tangkan ngagai sida? Sida tu kieh lalu enggai mendingka pesan Nuan. Sida ketawaka utai ti diasuh Nuan sebut aku.

¹¹Nuan ringat ngagai sida, lalu aku pen ringat mega ngagai sida, TUHAN, lalu aku enda ulih nagang diri ringat.” Udah nya TUHAN lalu bejaku ngagai aku, “Bubuhka pengeringat Aku ngagai bala anak mit ti ba jalai raya, enggau ba gempuru bala orang ke biak. Laki enggau bini deka ditabanka. Indah sida ke tuai deh deka ditabanka.

¹²Rumah sida deka diberi ngagai orang bukai, lalu baka nya mega umai enggau bini sida. Aku deka ngukum orang di menua tu.

¹³Semua orang ke besai enggau ke mit bela nipu ngulihka duit. Indah sida nabi enggau sida imam deh nipu orang mayuh.

¹⁴ Sida ngumbai bakal nembiak Aku nya semina rajai aja. Ku sida, ‘Nya nadai ngawa,’ tang utai nya tau ngawa.

¹⁵ Kati sida nemu malu ke diri ti udah ngereja utai ti jai nya? Enda, laban sida endang enda nemu malu. Indah mua sida deh enda nemu bebali mirah. Nya alai sida deka rebah baka orang bukai. Lebuh Aku ngukum sida, sida deka mati. Aku ti TUHAN, udah bejaku.”

¹⁶Ku TUHAN bejaku ngagai bala nembiak Iya, “Alai kita bediri ba simpang jalai raya, lalu peratika utai dia. Tanyaka dini alai jalai raya ti dulu kelia, enggau endur alai jalai raya ti pemadu manah. Bejalai nengah jalai raya nya, nya baru kita deka diau nadai utai ngachau.” Tang ku sida, “Kami enggai!”

¹⁷Udah nya TUHAN ngasuh bala jejaga mendingka munyi terumpit. Tang ku sida, “Kami enggai mending.”

¹⁸Nya alai TUHAN bejaku, “Anang enda mending, kita semua bansa, ngambika kita nemu utai ti deka nyadi ba bala nembiak Aku.

¹⁹Anang enda mending, dunya! Aku deka ngerusak bala orang tu nyadika ukum sida ketegal semua penyai ti udah dikereja sida, laban sida udah nulak ajar Aku lalu enda ngasika jaku Aku.

²⁰Aku enda begunaka menyan ti dibai sida ari Sheba, tauka rempah ti dibai ari menua ti jauh. Aku enggai nerima pemeri sida, tauka rinduka piring sida.

²¹Nya alai Aku deka ngasuh orang tu tesangkut lalu tetingkap. Apai indai enggau bala anak sida deka mati, lalu baka nya mega bala pangan enggau orang ke berimbai pendiau enggau sida.”

²²Ku TUHAN bejaku, “Bala orang bisi datai ari sebuah menua ti di utara. Siti bansa ti kering di menua ti jauh, nyendiaka diri mansang beperang.

²³Sida besenyataka panah enggau pedang. Sida tu jai enggau orang, sereta nadai pengasih. Sida munyi segum pangka gelumbang lebuh sida nepan kuda. Sida sedia deka nyerang Jerusalem.”

²⁴Ku orang Jerusalem bejaku, “Kami udah ninga berita nya, lalu kami nyau lembut tulang. Ati kami balat irau lalu kami berasai pedis baka indu ke radai deka beranak.

²⁵Kami enda berani pansut ngagai menua pesisir, tauka bejalai nengah jalai raya, laban bala munsuh kami mai senyata, lalu kami dikelingi utai ti balat ngenakut.”

²⁶Ku TUHAN bejaku ngagai bala nembiak Iya, “Rasukka kain guni, lalu baringka diri malai amau. Ngulit meh kita enggau ai mata, baka ke ngulitka anak tunggal kita, laban iya ti deka ngerusak kita, deka nyerang kita enggau ngenyit.

²⁷Jeremiah, abas ati bala nembiak Aku, baka nuan ke ngabas pengering besi, lalu peratika gaya sida.

²⁸Semua sida nya seruran deka angkat ngelaban sereta kieh magang, kering baka temaga enggau besi. Semua sida nya jai magang, bejalai kia-kia bejakuka orang.

²⁹Api menyadi mau amat, tang tai besi nya enda luluh lalu enda mega lilih. Nadai guna majak nuchi bala nembiak Aku, laban sida ke jai enda dibuai.

³⁰Sida deka dikumbai tai besi ti nadai rega, laban Aku ti TUHAN udah nulak sida.”