Read Iban Jeremiah 7 Bible Online

Jeremiah 7 - Iban bible

Jeremiah 7

¹TUHAN ngasuh aku mansang ngagai mua pintu Rumah Sembiang, ba endur alai orang Judah besembiang. Iya ngasuh aku bediri dia lalu madahka ngagai sida utai ti udah disebut TUHAN ti Pemadu Bekuasa, ti Allah Taala ke disembah orang Israel: “Ubah jalai pengidup enggau utai ti dikereja kita. Nya baru Aku deka ngasuh kita meruan diau ditu.

⁴Badu agi arapka jaku ti nipu tu, ‘Kami likun! Tu Rumah TUHAN, tu Rumah TUHAN, tu Rumah TUHAN!’

⁵“Ubah jalai kita idup, lalu badu agi ngereja utai baka ke dikereja kita diatu. Anang enda lurus ati enggau pangan diri.

⁶Badu agi ngambi ulih ba orang bukai, orang ke patu balu. Badu agi munuh orang ke nadai penyalah di menua tu. Badu agi nyembah petara bukai laban pengawa nya deka ngerusak kita.

⁷Enti kita berubah, nya baru Aku deka meruan diau enggau kita di menua ti udah diberi Aku ngagai aki ini kita nyadika pesaka sida belama iya.

⁸“Peda kita, kita bekering ba jaku tipu.

⁹Kita ngenchuri, munuh orang, butang, besaksi bula lalu ngelanggar sumpah diri empu, ngenjuk piring ngagai Baal, lalu nyembah petara ti nadai kala ditemu kita.

¹⁰Kita ngereja utai ti dipegedika Aku, lalu udah nya kita datai lalu bediri di mua Aku, dalam Rumah Aku Empu, lalu nyebut, ‘Kami likun!’

¹¹ Kati kita ngumbai Rumah Aku endur alai perumpak belalai? Aku udah meda utai ti dikereja kita.

¹² Alai kita mansang ngagai Siloh,[6] ti terubah endur alai Aku patut disembah, lalu peda kita utai ti udah dikereja Aku ngagai nengeri nya ketegal dosa nembiak Aku orang Israel.

¹³Kita udah ngereja semua dosa nya, lalu taja pen Aku udah suah bejaku ngagai kita, kita enggai mending. Kita enggai nyaut lebuh Aku ngangauka kita.

¹⁴Nya alai, Aku deka ngereja ngagai Rumah Aku, Rumah Sembiang ti dikarapka kita, baka ke udah dikereja Aku ngagai Siloh. Ba endur tu, ti udah diberi Aku ngagai aki ini kita enggau ngagai kita empu, Aku deka ngereja utai baka ke udah dikereja Aku ngagai Siloh.

¹⁵Aku deka muru kita ari mua Aku, baka Aku ti udah muru bala kaban belayan kita, iya nya orang Israel. Aku ti TUHAN, udah bejaku.”

¹⁶Ku TUHAN bejaku, “Jeremiah, anang besampika bala orang tu. Anang nyabak tauka besampi ngarika sida. Anang minta kasih ngagai Aku, laban Aku enggai mendingka nuan.

¹⁷Kati nuan nadai meda utai ti dikereja sida dalam berapa bengkah nengeri di menua Judah, enggau ba sebelah jalai raya di Jerusalem?

¹⁸ Bala anak mit begumpulka kayu api, sida ke lelaki betungkunka api, lalu sida ke indu betunyauka tepung kena ngaga roti ke petara indu ke dikumbai sida Kuin Menua Serega. Sida mega nuang piring wain ke petara bukai, kena sida ngemediska ati Aku.

¹⁹Tang kati sida amat ngemediska ati Aku? Ukai. Sida semina ngemedis sereta ngemaluka diri empu.

²⁰Nya alai Aku, TUHAN ti Pemadu Tinggi, deka mubuhka pengeringat Aku ngagai Rumah Sembiang tu. Aku deka mubuhka pengeringat Aku ngagai mensia, ngagai jelu, ngagai kayu enggau ngagai utai ti ditanam. Pengeringat Aku deka mau baka api ti enda nemu padam.

²¹“Nembiak Aku, kita nunu sekeda piring retung ba alta, lalu sekeda piring nya tau diempa kita. Tang utai ti disebut Aku ti TUHAN nya, manah agi enti kita terus makai semua piring nya.

²²Laban Aku nadai meri pesan pasal piring tunu tauka pasal piring bukai ngagai aki ini kita lebuh Aku mai sida pansut ari menua Ejip.

²³Tang Aku amat ngasuh sida ngasika Aku, ngambika Aku nyadika Allah Taala sida, lalu sida nyadi nembiak Aku. Lalu Aku ngasuh sida diau nitihka jaku Aku, ngambika sida mujur.

²⁴Tang sida enda ngasi tauka mending, tang ngereja sebarang utai nitihka pengekieh enggau penyai ati sida, lalu sida majak jai-sejai, ukai majak manah-semanah.

²⁵Kenyau ari maya lebuh bala aki ini kita pansut ari menua Ejip nyentuk ngagai sehari tu, Aku udah majak ngirumka nembiak Aku, iya nya sida nabi, ngagai kita.

²⁶Tang nadai siku kita deka ninga tauka mending, tang kita mansang lebih agi kieh, sereta lebih agi deka angkat ngelaban ari aki ini kita kelia.

²⁷Nya alai, Jeremiah, nuan deka nyebut semua leka jaku tu ngagai bala nembiak Aku, tang sida enggai mendingka nuan. Nuan deka ngangauka sida, tang sida enggai nyaut.

²⁸Nuan deka madahka ngagai sida pasal bansa sida ke enda ngasika Aku, TUHAN ti Allah Taala sida, tauka belajar ari ukum sida. Penetap ati udah mati. Penetap ati nya nadai agi dikenang.

²⁹“Ngulit meh kita orang Jerusalem. Guntin lalu buai buk kita. Nyabak meh kita ngena leka sabak kenang ba tuchung bukit, laban Aku ti TUHAN, ringat lalu udah nulak bala nembiak Aku.

³⁰“Orang Judah udah ngereja utai ti jai. Sida udah ngengkahka engkeramba sida ke dipegedika Aku dalam Rumah Sembiang Aku, lalu udah ngamahka Rumah nya.

³¹ Sida udah ngaga siti alta ti dikumbai Topet, ba Lebak Hinom ngambika sida ulih nyerahka anak lelaki enggau anak indu sida nyadika piring tunu. Aku nadai ngasuh sida ngereja utai tu. Indah berundingka utai nya deh Aku enda.

³²Nya alai, maya deka datai alai endur nya enda agi dikumbai Topet tauka Lebak Hinom, tang Emperan Alai Bebunuh. Sida deka nguburka orang dia, laban sida nadai endur bukai alai nguburka bangkai.

³³Bangkai sida deka nyadika pemakai ke burung, enggau jelu babas, lalu burung tauka jelu nya nadai orang muru.

³⁴ Menua tu deka nyadi menua puang. Aku deka ngasuh semua munyi mensia ti rami gaga, enggau munyi mensia ti lantang ati nikah, lesap magang ari semua nengeri di menua Judah, enggau ari semua jalai raya di Jerusalem.