Read Iban Jeremiah 8 Bible Online

Jeremiah 8 - Iban bible

Jeremiah 8

¹“Lebuh maya nya ila, rangkah tulang sida raja enggau rangkah tulang bala pemesai orang Judah, sereta enggau rangkah tulang sida imam, sida nabi, enggau rangkah tulang orang bukai ti udah diau di Jerusalem, deka diambi pansut ari kubur sida.

²Rangkah tulang sida nya enda digempuru lalu dikuburka, tang deka digaga nyadi baka baja, betegaring ba sebelah tanah. Rangkah tulang nya deka diachirka lalu dipanchar mata hari, bulan, enggau bintang, ti udah dikerinduka bala orang tu, lalu dipetuaika sida, sereta udah alai sida betanya enggau disembah sida.

³Lalu orang ke agi idup ari bansa ti jai tu, ti diau ba endur alai Aku udah ngachirka sida, deka minta diri mati ari ke idup. Aku TUHAN ti Pemadu Bekuasa, udah bejaku.”

⁴TUHAN ngasuh aku nyebut utai tu ngagai bala nembiak Iya, “Lebuh orang rebah, kati iya enda angkat baru? Enti orang enda tetemuka jalai raya, kati iya enda nikal?

⁵Nya alai, nama kebuah kita ke nembiak Aku, ninggalka Aku, lalu enda pulai baru ngagai Aku? Kita bepegai teguh ba engkeramba kita, lalu enggai pulai baru ngagai Aku.

⁶Aku mending enggau bebendar, tang kita enda nyebut utai ti bendar. Nadai siku kita udah nesal ati ke penyai diri. Nadai siku kita udah kala nanya, ‘Nama penyalah ti udah dikereja aku?’ Genap iku kita bela nitihka jalai diri empu magang, baka kuda ti belanda ngagai endur alai beperang.

⁷Indah burung undan deh nemu maya diri pulai. Burung achang, lelayang, enggau engkerasak nemu maya sida patut mindah ngagai menua bukai. Tang kita ke nembiak Aku enda nemu adat ti dikena Aku merintah kita.

⁸Baka ni ku kita tau ngumbai diri bepenemu-dalam, lalu madahka diri nemu Adat Aku? Peda kita, adat tu udah diubah bala tukang tulis ti enda betul ati.

⁹Bala kita ke bepenemu-dalam deka dipechat. Runding sida nyau charut, lalu sida nadai nemu berunding agi. Sida udah nulak jaku Aku, nya alai nama penemu-dalam ti dikembuan sida diatu?

¹⁰Nya alai Aku deka meri tanah umai sida ngagai orang bukai, lalu meri bini sida ngagai lelaki bukai. Genap iku sida, ke besai enggau ke mit, bela nguji nipu ngulihka duit. Indah sida nabi enggau sida imam empu deh nipu orang mayuh.

¹¹ Sida ngumbai bakal bala nembiak Aku nya semina rajai aja. Ku sida, ‘Nya nadai ngawa,’ ku sida bejaku. Tang utai nya tau ngawa.

¹² Kita ke nembiak Aku, kati kita nemu malu ngereja utai ti jai nya? Enda. Kita nadai nemu malu. Indah mua kita deh enda bebali mirah! Nya alai kita deka dirusak baka orang bukai. Lebuh Aku ngukum kita, nya meh pengujung kita. Aku ti TUHAN, udah bejaku.

¹³“Aku ingin deka ngempuruka bala nembiak Aku, baka orang bumai ke ngetau, tang bala nembiak Aku baka batang anggur ti nadai buah, baka kayu ara ti rumbau. Indah daun sida deh abis layu. Nya alai Aku udah ngemendarka orang bansa bukai bempu menua sida.”[7]

¹⁴“Nama kebuah kitai duduk ngapa?” ku bala nembiak Allah Taala nanya. “Aram kitai mansang ngagai nengeri ti bekuta, lalu mati dia. TUHAN Allah Taala kitai udah ngukum kitai mati. Iya udah ngasuh kitai ngirup ai ti berachun laban kitai udah bedosa ngelaban Iya.

¹⁵Kitai ngarapka diri bisi maya pemaik enggau maya suman, tang nya nadai guna, laban utai ti balat ngenakut datai.

¹⁶Bala munsuh kitai udah datai di nengeri Dan. Kitai ninga munyi kesuh idung kuda sida. Semua menua tu begetar magang lebuh kuda sida bemunyi. Bala munsuh kitai udah datai deka ngerusak menua kitai, enggau semua utai di menua tu, nengeri kitai enggau semua orang ke diau di menua tu.”

¹⁷Ku TUHAN bejaku, “Bejaga kita! Aku deka ngirumka ular ngagai kita, ular ti bisa ti enda ulih dipejinakka, lalu sida deka mantuk kita.”

¹⁸Ati aku enda nemu badu sinu. Ati aku balat tusah.

¹⁹Pendingka ulih kita! Di serata menua tu bala nembiak Aku nyabak, “Kati TUHAN nadai agi di Sion? Kati raja nengeri Sion nadai agi dia?” Ku TUHAN ti Raja sida nyaut, “Nama kebuah kita nyungkak Aku ringat? Kita besembahka engkeramba, lalu meremi ngagai petara orang bansa bukai ke nadai reti.”

²⁰Ku orang mayuh ngangau, “Musin panas nyau udah lepas, maya ngetau nyau udah abis, tang apin ga kami tu dilepaska.”

²¹Ati aku asai ti runtuh laban bala nembiak aku udah kelalu tusah ati. Aku ngulit. Ati aku balat sinu.

²²Kati menua Giliat[8] nadai ubat? Kati menua Giliat nadai lutur? Enti bisi, nama kebuah bala nembiak aku lalu apin digeraika?