Read Iban Jeremiah 9 Bible Online

Jeremiah 9 - Iban bible

Jeremiah 9

¹Naka meh pemanah enti sema pala aku baka telaga ti penuh laban ai, lalu mata aku penuh laban ai mata, ngambika aku ulih nyabak siang malam ke orang ari bansa aku ti udah dibunuh.

²Naka meh pemanah enti sema aku bisi endur alai diau di menua puang alai aku ulih nyeraraka diri ari bansa aku empu. Semua sida bela enda tetap ati, orang ke bejualka bansa diri.

³Sida semampai deka nusui utai ti bula. Ati ti bingkuk, ukai pengelurus, ti merintah menua tu. Ku TUHAN bejaku, “Bala nembiak Aku enda ngetu-ngetu ngereja penyai, sida enda ngelala Aku.”

⁴Awakka genap iku orang bejaga ari pangan diri, lalu enda ngarapka diri menyadi, laban genap iku menyadi bela nipu magang, lalu semua orang bela bejai pangan diri.

⁵Genap iku sida bela nipu pangan diri, lalu nadai siku sida nusui utai ti bendar; Sida udah ngajar dilah sida bejaku bula; Sida ngereja penyai datai ke sida nyau kelalu lelak lalu enda ulih nesal ati ke dosa sida.

⁶Sida enda ngetu-ngetu nekanka orang, enda ngetu-ngetu nipu orang, lalu enggai ngelala Aku, ku TUHAN bejaku.

⁷Nya alai ku TUHAN ti Pemadu Bekuasa bejaku, “Aku deka nuchi lalu nguji sida, laban nama utai bukai ulih dikereja Aku ke bala nembiak Aku?

⁸Dilah sida baka laja ti bisa. Sida bejaku nipu orang; Genap iku sida bejaku manah enggau pangan diri, tang iya ti bendar, sida manjuk pangan diri.

⁹Kati Aku enda patut ngukum sida ketegal utai nya? Ku TUHAN bejaku; Kati Aku enda patut malas bansa orang nya?

¹⁰Ku aku bejaku, “Aku deka ngulitka bukit lalu nyabakka padang rumput, laban sida udah rangkai, lalu nadai orang bejalai nengah sida. Munyi nyawa jelu tupi nadai agi didinga. Burung enggau jelu babas udah rari lalu nadai agi.”

¹¹Ku TUHAN bejaku, “Aku deka ngeruntuhka Jerusalem nyadi tembawai, nyadi endur alai jelu pasun diau. Semua nengeri di menua Judah nadai orang nguan, nadai orang diau dia.”

¹²Aku lalu nanya, “TUHAN, nama kebuah menua rusak lalu rangkai baka menua puang, datai ke orang nyau nadai agi bejalai nengah iya? Sapa orang ke chukup bepenemu-dalam ke ulih meretika utai tu? Ngagai sapa Nuan udah nerangka utai tu, ngambika sida ulih madahka ngagai orang bukai?”

¹³Ku TUHAN nyaut, “Utai tu nyadi laban bala nembiak Aku udah ngelengkaka Adat ti diberi Aku ngagai sida, lalu sida enda ngasika jaku Aku, sereta enda nitihka Adat Aku,

¹⁴tang udah kieh, lalu udah nyembah Baal, nitihka ajar aki ini sida.

¹⁵Nya alai, baka tu ku jaku TUHAN ti Pemadu Bekuasa, ti Allah Taala ke disembah orang Israel: Aku deka meri ngagai bala nembiak Aku utai ti pait nyadika pemakai sida, enggau ai ti berachun nyadika ai irup sida.

¹⁶Aku deka ngachirka sida ngagai semua menua ti nadai kala didinga aki ini sida tauka didinga sida empu, lalu Aku deka ngasuh bala soldadu ngelaban sida datai ke Aku udah ngerusak semua sida abis lengis.”

¹⁷Ku TUHAN ti Pemadu Bekuasa bejaku, “Uji perundingka utai ti nyadi! Kangauka tukang sabak, sida indu ke nyabakka orang ke mati.”

¹⁸Ku orang mayuh bejaku, “Asuh sida datai enggau jampat lalu nyabakka kitai, datai ke ai mata kitai nyau meili-ili, lalu kulit mata kitai nyau basah laban ai mata.”

¹⁹Pendingka munyi sabak orang di Sion: “Kami tu rusak! Kami udu malu laban kami udah ninggalka menua, laban sida udah ngerubuh rumah kami.”

²⁰Ku aku bejaku, “Pendingka TUHAN, kita ke indu, lalu peratika leka jaku Iya. Ajar anak indu kita chara ngulit, enggau bala pangan kita chara nyabakka orang ke mati,

²¹laban pemati udah tama nengah lubang jenila kitai lalu udah tama ngagai istana kitai. Iya udah munuh bala anak mit ba sebelah jalai raya enggau sida ke bujang di pasar.

²²Bangkai mensia nyau ngachir di semua endur, baka tugung tai jelu ti di padang, baka gandum ti udah dikempat, ti enda digumpul orang. Tu meh utai ti udah diasuh TUHAN sebut aku.”

²³Ku TUHAN bejaku, “Orang ke bepenemu-dalam enda patut temegahka penemu-dalam sida, lalu orang ke kering enda patut temegahka pengering sida, lalu orang ke kaya, enda patut temegahka pengaya sida.

²⁴ Enti orang deka temegah, sida patut temegahka diri ti bepenemu-dalam, lalu nemu Aku rindu ngayanka pengerindu enggau pengelurus di dunya tu, laban nya meh utai ti ngasuh ati Aku gaga. Aku ti TUHAN, udah bejaku.”

²⁵Ku TUHAN bejaku, “Maya deka datai alai Aku deka ngukum orang ke udah ditutus: orang Ejip, Judah, Edom, Amon, Moap, enggau orang ke diau di menua puang, ti udah netak buk sida pandak.[9] Semua sida tu, nyengkaum orang Israel, udah ditutus magang, tang sida dikumbai enda ditutus, laban sida enda nitihka sempekat Aku.” [10]