Read Iban Sabak Kenang 1 Bible Online

Sabak Kenang 1 - Iban bible

Sabak Kenang 1

¹ Sunyi amat meh nengeri Jerusalem diatu. Dulu menya iya penuh laban mensia! Dulu menya iya dibasa semua bansa, tang diatu iya nyau baka indu ke balu. Nengeri ti pemadu manah tu udah nyadi ulun.

²Iya nyabak semalam-malam. Ai mata iya nyau nelusur kuyu iya. Ari semua bala pangan iya, nadai siku agi tinggal ngaum iya. Orang ke setanah enggau iya udah nipu iya, lalu semua sida ngelaban iya diatu.

³Orang Judah nyau nyadi ulun ti nadai daya agi lalu dipejalka ninggalka menua diri.[1] Sida diau di menua bukai, nadai agi menua ti tau dikumbai sida menua diri, dikelingi munsuh, lalu nadai jalai ngerarika diri.

⁴Nadai agi orang datai ngagai Rumah Sembiang diatu lalu nyembah Allah Taala lebuh hari kudus. Bala indu ke biak ke belagu dia, natka pemerinsa, lalu bala imam semina ulih bedemuh aja. Pintu nengeri nadai orang nengah, lalu Sion natka diri pedis.

⁵Bala munsuh iya udah menang, lalu merintah iya. TUHAN udah ngasuh iya merinsa ketegal semua dosa iya. Bala anak iya udah ditangkap lalu ditabanka ngagai menua bukai.

⁶Pemanah gaya nengeri Jerusalem nyau nadai agi. Bala tuai iya nyau baka rusa ti lemi ketegal lapar, Ke nyau deka abis pengering lebuh sida ngerarika diri ari orang ke ngasu.

⁷Jerusalem diatu nyau nyadi tembawai, lalu iya ngingatka pemanah gaya diri ti dulu menya. Lebuh iya alah laban munsuh, nadai orang nulung iya. Orang ke ngalahka iya ketawaka iya lebuh iya alah.

⁸Iya enda agi dibasa orang. Iya telanjai lalu dikeleseka orang. Iya bedemuh lalu mampul mua diri laban malu. Jerusalem udah ngamahka diri ngena dosa ti udu jai.

⁹Pengamah iya nyata dipeda, tang iya enda irau mimit ke utai ti deka nyadi ba iya jemah ila. Iya balat amat alah. Nadai orang ulih ngaum iya. Bala munsuh iya udah menang, lalu iya nyabak minta TUHAN kasihka iya.

¹⁰Bala munsuh udah ngerampas semua reta tengkira iya. Iya tepedaka sida tama ngagai Rumah Sembiang, Ti enda disagi TUHAN pasuk orang bansa bukai.

¹¹Bala nembiak iya bedemuh lebuh sida begigaka utai diempa. Sida nyilih reta tengkira sida enggau pemakai kena sida beridup. “Peda aku tu, TUHAN,” ku nengeri nya nyabak. “Peda pemerinsa aku tu.”

¹²“Malik ngagai aku!” ku iya nyabak nunga ngagai semua orang ke mansa.[2] “Nadai orang udah kala pedis baka aku tu, Pemedis ti udah diasuh TUHAN ninggang aku lebuh Iya ringat.

¹³“Iya ngirumka api ari langit, api ti mau dalam aku. Iya nan panjuk kena nyintak aku, lalu ngerebahka aku ke tanah. Udah nya Iya ninggalka aku, lalu nejuka aku seruran pedis.

¹⁴“Iya meda semua dosa aku, lalu merekaska sida nyadi siti berekas. Iya nanchangka berekas dosa nya ba rekung aku, lalu aku nyau lembut tulang ditating dosa nya. TUHAN nyerahka aku ngagai bala munsuh aku, lalu aku nadai daya ngelaban sida.

¹⁵“TUHAN ketawaka semua soldadu aku ke pemadu kering. Iya ngirumka bala soldadu ngerusak bala soldadu aku ke agi biak. Iya ngeredakka bala aku baka ke mitan buah anggur.

¹⁶“Nya kebuah ai mata aku nyau lilih. Nadai orang ulih ngaum aku, lalu nadai orang ngangkatka semengat aku. Bala munsuh udah ngalahka aku. Bala nembiak aku nyau nadai utai agi.

¹⁷“Aku ngangkatka jari, tang nadai orang deka nulung aku. TUHAN udah mesanka bala munsuh ari sepiak-sepiak ngelaban aku. Sida ngaga aku baka utai ti kamah.

¹⁸“Tang TUHAN endang lurus, laban aku udah enda ngasika Iya. Pendingka aku, kita di semua endur. Peda kita pemedis aku tu. Bala nembiak lelaki enggau bala nembiak indu aku ke biak, udah ditabanka nyadi orang tangkap.

¹⁹“Aku ngangauka orang ke setanah enggau aku, tang sida enggai nulung aku. Bala imam enggau bala tuai bansa mati ba sebelah jalai raya di nengeri, begigaka pemakai kena beridup.

²⁰“Peda, O TUHAN, penusah ati aku, penusah semengat aku! Ati aku runtuh tusah ke dosa aku. Orang bebunuh ba sebelah jalai raya, lalu dalam rumah pen bisi mega pemati.

²¹“Pendingka[3] aku ke bedemuh. Nadai orang deka ngaum aku. Bala munsuh aku gaga ati meda Nuan ngasuh penusah ti besai tu ninggang aku. Asuh datai meh hari ti udah disemaya Nuan.[4] Awakka bala munsuh aku merinsa baka aku.

²²“Peda Nuan semua penyai sida, lalu ukum meh sida baka Nuan ti udah ngukum aku ketegal dosa aku. Aku bedemuh ketegal merinsa, lalu ati aku balat tusah.”