Read Iban Sabak Kenang 2 Bible Online

Sabak Kenang 2 - Iban bible

Sabak Kenang 2

¹TUHAN ringat lalu mungkur Sion ngena pemetang. Nengeri ti manah gaya nya udah diubah Iya nyadi tembawai. Indah Rumah Sembiang deh ditinggalka TUHAN lebuh Iya ringat.

²TUHAN nadai pengasih mimit ngerusak semua genturung pendiau di menua Judah Lalu ngeruntuhka kuta ti dikena nyaga menua nya. Iya mechat perintah enggau bala orang ke megai perintah di menua nya.

³TUHAN ngeransi lalu nganchurka pengering Israel. Iya enggai nulung kitai lebuh munsuh datai. Iya balat amat ngelaban kitai baka api, lalu ngerusak semua utai.

⁴Iya nyelintingka laja Iya ngagai kitai baka munsuh. Iya munuh semua orang ke dikegagaka sereta dikerinduka kitai. Di Jerusalem ditu kitai ngasaika pengeringat Iya.

⁵TUHAN udah nyadi baka munsuh. Iya udah ngerusak Israel. Iya udah ngaga semua kuta enggau istana di menua Israel nyadi tembawai. Iya udah ngasuh orang Judah enda ngetu-ngetu ditinggang penusah.

⁶Iya udah ngerusak Rumah Sembiang alai kitai ti udah nyembah Iya. Iya enda ngasuh orang ngintu hari ti kudus enggau Hari Sabat. Raja enggau imam udah sama ngasaika pengeringat Iya.

⁷TUHAN enggai agi begunaka alta Iya, lalu Iya ninggalka Rumah Sembiang Iya ti kudus. Iya nejuka munsuh ngeruntuhka dinding Rumah Sembiang. Sida manjung ke diri ke menang ba endur alai kitai, enggau ati ti gaga, udah besembah.

⁸TUHAN udah mutuska runding deka ngeruntuhka dinding kuta Sion. Iya nyukat dinding kuta nya, kena nentuka semua dinding nya dirusak magang. Diatu menara enggau dinding kuta nya udah nyadi tembawai magang.

⁹Pintu nengeri dilamun rapuh, lalu alang pintu redak magang. Raja enggau bala pemesai diatu udah dibuai ngagai menua bukai. Adat nadai agi diajar, lalu sida nabi nadai nerima genera ari TUHAN.

¹⁰Orang ke tuai umur di Jerusalem duduk ba tanah, enda engkeretik. Pala sida dikerabuka enggau amau lalu sida begari ngena kain guni. Indu ke agi biak ngendukka pala sida ke tanah.

¹¹Mata aku nyau bangkung laban aku enda ngetu nyabak. Ati aku balat tusah. Ati aku balat tusah laban bala aku udah dirusak, laban sida ke nembiak enggau anak mit luput ba sebelah jalai raya.

¹²Lapar sereta aus, sida nyabak minta pemakai enggau utai diirup ari indai sida. Sida rebah ba sebelah jalai raya baka ke bakal, dipangku indai sida, lalu mati.

¹³O Jerusalem, Jerusalem ti dikesayauka aku, baka ni ku jalai aku bejaku? Baka ni ku jalai aku merindang nuan? Nadai orang patut merinsa baka tu. Penusah nuan nadai sekat baka tasik, nadai pengandal agi.

¹⁴Bala nabi nuan nadai madahka utai bukai ngagai nuan, semina pemula aja. Jaku ajar sida semina nipu nuan, laban ajar nya enda kala madahka dosa nuan. Sida nyungkak nuan berunding ngumbai diri enda ibuh nesal ati ke dosa nuan.

¹⁵Orang ke mansa nuan merening lalu ngeleseka nuan. Sida ngilikka pala, lalu ketawaka Jerusalem ke nyau nyadi tembawai: “Kati tu amat nengeri ti manah nya suba? Kati tu nengeri ti dikemegahka dunya?”

¹⁶Semua bala munsuh nuan ngeleseka nuan, lalu melut mata begedika nuan. Sida enchebirka mulut lalu ngelese, “Kami udah ngerusak nengeri nya! Tu meh hari ti dianti kami ngelamatu!”

¹⁷Diatu TUHAN udah ngereja utai ti deka dikereja Iya: Iya udah ngerusak kitai enggau nadai pengasih, nitihka jaku tangkan ti disebut Iya ngagai kitai dulu kelia. Iya ngasuh bala munsuh kitai menang, ngasuh sida gaga ati meda kitai alah.

¹⁸O Jerusalem, asuh dinding kuta nuan nyabak ngangauka TUHAN![5] Awakka ai mata nuan lilih baka ai sungai ti rarat siang malam. Awakka nuan lelak nyabak tusah ati!

¹⁹Awakka nuan semalam-malam enda ngetu angkat ngangauka TUHAN. Bantaika semua utai ari ati nuan ngagai TUHAN, minta Iya kasihka bala anak nuan, anak ke mati keberuran ba genap sukut jalai raya!

²⁰TUHAN, peda Nuan! Nama kebuah Nuan ngukum kami baka tu? Sida ke indu nyau bepakaika anak ke dikesayauka sida! Bala imam enggau bala nabi dibunuh dalam Rumah Sembiang!

²¹Orang ke biak enggau ke tuai nyau betegaring mati ba sebelah jalai raya, Lelaki enggau indu ke biak, dibunuh munsuh ngena pedang. Nuan munuh sida enggau nadai pengasih lebuh Nuan ringat.

²²Nuan ngasuh bala munsuh aku begawai ngelingi aku lalu ngemba aku, Lalu nadai orang ulih ngerarika diri ba hari Nuan ringat. Bala munsuh munuh bala anak aku, ti udah ditupi sereta dikerinduka aku.